¹ फासे शब्बाथ दिही येशु खेतामने जाहलो ताहा तिया चेला खेतामने कोअहे मुळीन आथाकी चोलीन खाअला. ² ताहा परूशी माहाय आख्यो “शब्बाथ दिहा दिही जो केनु हारो नाहा, तो तुमा काहा केअताहा?" ³ ताहा येशुय तियाहान आख्यो, "तुम्हाहाय वाच्यो नाहा का दाविद आने तिया आरी माहा आथा तियाहान पुख लागली ताहा तियाहाय काय केअलो? ⁴ तो परमेहेरा कोआमे गियो आने परमेहेराल अर्पन केअलो मांडो जो याजका सिवाय केडालुज नाय खावातलो तो मांडो तियाय बी खादाे आने तिया आरी माहीआथे तियाहान बी खा देदो" ⁵ आने आजी येशुय तियाहान आख्यो, “माअहा पाेयरो (आय) शब्बाथ दिहाआ बी प्रभु हाय” ⁶ एहकी वेअयो की ,फासे एका शब्बाथ दिहा दिही येशु देवाअकोआ जायने हिकवा लाग्यो. तिही एक एहेडो माहु आथो जिया हुदो आथ हुकाय गेहलो आथो. ⁷ ताहा शास्त्री आने परूशी माहा येशुल चुकीम सापडावा खातोर शाब्बाथ दिहा दिहीम केडा दु:ख्याल हारो केअतो का नाहा अे वेअरा केअता टेपी रेहला. ⁸ पेन येशु तिया मोना विचार जाअतलो आने ती एका आर्धा हुकाला माहाल येशुय आख्यो. “उठीन आख्या हुबुंर उबो रेअ “आने तो माहु उठीन उबो रियो. ⁹ येशुय आख्यो, “माय तुमनेहेन फुचुहु, शब्बाथा दिही केल्लो काम केअरा जोजे? हारो काम का खराब काम? केल्लो कायदा रीती की हाय, एगदा जिव वाचावा हाय का नाश केअरा? ¹⁰ ताहा येशुय सोमकी होग्गाहान वेअयो आने ती माआहाल आख्यो “तु तो आथ लांबो केअ” ताहा ति माहाआय तेहेकीज केअयो आने तिया आथ हारो वीअ गियो. ¹¹ पेन परूशी आने शास्‍त्री माहाइ येशुप खुब खिजवाया आने इया माहाल आपु काय केजी तियाहा गोठ्या केअरा लाग्या. ¹² तिया दिहाम एहकी वेअयो का, येशु प्रार्थना केरा डोगाहाम गियो. तियाय ती रातपोय परमेहेरा प्रार्थना केअयी ¹³ जाहा दिही निग्यो, ताहा तियाय तिया चेलाहान हाद्यो. तियामने तियाय बारा जाअ निवड्या आने तियाहान 'प्रेषित' इ नाव देदो. ¹⁴ तियाहा नावे शिमोन (इयाय येशुय पेतर इ नाव थोव्यो), अंद्रिया ( पेतरा पावहु), याकोब आने योहान, फिलीप्प, बर्थलमय, ¹⁵ मत्तय, थोमा अल्फी पोयरो याकोब, शिमोन जीयाले जिलोत बी आखतोलो. ¹⁶ याकोबा पोयरो यहुदा आने यहुदा इस्कर्योत, जो येशुल तेरावी देनारे तो. ¹⁷ तो तियाहा आरी एठा उतीन सपाट जागाप उबी रियो आने तिया चेलाहा खुब मोडो टोलो तिहि आलो आने यहुदा प्रांतामने यरूशलेम शहर, सोर आने सिदोन दरीया ती तोडीने एहेडा खुब माहे तीही आल्ले आथे. ¹⁸ ते तीही तिया उनाया आने दुख्ये हारे केअरा खातोर आल्ले आने तियाहान पुतडा की बांधला आथे तियाहान तिया बीमारी मेने हारो केरूलाम आलो. ¹⁹ आख्या माहे तियाल आथला खातोर होदतला, काहाका तियामने (सामर्थ) शक्ती निगंतीली आने ते होग्गेने हुदरुतले. ²⁰ हाती येशुल तिया चेला होवे विइन आख्यो, तुम्हा जे गरीब हाय, ते धन्य काहाका देवा राज्य तुमा हाय. ²¹ धन्य तुमा जे आमी पुखे हाय, काहाका तुमा ताराय जाहा, धन्य तुमा जे आमी रोडते हे, काहाका तुमा ओहआ. ²² जाहा माहा पोयरामुळे माहा तुमनेहेन तारास केरावी आने जाहा ते समाजामने तुमनेहेन दुर केअरी आने निंदा केअरी आने तुमा नाव माठाहोस टाकी दी आने माहा पोयरा होस तुमनेहेन ते दुर केअरी, ताहा तुमा धन्य हाय. ²³ त्या दिही खुब खुष विइन कुदा, काहाका खरेखर स्वर्गाम तिया प्रतिफोल खुब मोडो हाय! काहाका तियाहा पुर्वजाही जे संदेष्टा आथा तियाहान बी एहेकीज केअलो. ²⁴ पेन मालदार माअहा, तुमनेहेन दु:ख वेअरी काहाका तुमनेहेन पेअलाज सुख मिली गेहलो हाय ²⁵ जे तुम्हा ताराला हाय त्या तुमान दुःख वेरी, काहाका तुमनेहेन पुख लागी. जे आमी ओअहते तियाहा दुःख वेअरी काहाका तुम्हा बोंबलीन रोडी. ²⁶ जा होग्गा माहा तुमनेहेन हारो आखी ताहा तुमहान दुःख वेरी, काहाका तियाय आगला डाअया बी खोटा निरप्याहान तेहेकीज केअले. ²⁷ पेन मा गोठया उनानाराहान आय आखहु, तुमा दुश्मनावे प्रीती केजा, जे तुमा विरोध केअतेहे, तियाहा खातोर हारो काम केअजा. ²⁸ जे माहा तुमनेहेन हाराप दिइ तियाहान आशिर्वाद देजा. जे तुमा आरी निंदा केअतेहे तियाहा खातोर प्रार्थना केअजा. ²⁹ जाहा तुमा एका गालाप केडोबी ठोकी तिया आगला बिहीरो गाल बी केअजा, जर केडो तुमा डोगली मांगतो वेअरी ता तियाल तुमा फाराक बी खुषी की लीइ जा देजा, ³⁰ जो केअडो बी कायबी मांगे, तियाल देजे, आने एगदो तोवेने वस्तु जबरदस्ती बुजी तिज तियावेने ती फासे मांगो नाहा. ³¹ आने जेहेकी माहाय तुमा आरी वेहवार केअरा जोजे एहेकी तुमनेहेन लागतो वेअरी तेहेकीज पेअला त्याअ आरी वागा. ³² तुम्हाप जो प्रीती केअहे तियाप तुमा बी प्रीती केअराहा, ता तियाम केल्लो मोडो काम केअयो? पापी लोक बी तेहेकीज केअताहा. ³³ जो तुमा खातोर हारो काम केअतो वेरी, तिया खातोर तुमा बी हारो काम केअतेहे तियाय केल्लो मोडो काम केअयो? तुम्हाहाय पापी लोक बी तेहेकीज केअताहा. ³⁴ जीयाहापने फासे मीली एहेकी आशा किइन लोकाहान तुमा उसनो देताहा, तियाय तुमा काय हारो केअताहा? फासे मीली इ आशा राखीन पापी लोक बी उसनो देताहा. ³⁵ पेन तुमा कोठो केनारावे प्रीती केअजा आने तिया हारोज केअजा आने निराश नेय केअता उसनो द्या ताहा तुमाहान होरगाम मोडो इनाम मिली आने तुमा जोलामजुग्यो परमेहेरा पोयरे वेराहा काहाका तो आभार नेय माननारे माहे आने खोटो काम केअनारे माहे तियाहावे बी प्रीती केअहे ³⁶ जेहेकी तुमा होरगामने बाहको मोयालो हाय तेहेकी तुमा बी मोयाले बोनजा. ³⁷ केडा बी चुक्या काअडा नाहा, ताहा तुमाही न्याय वेनअरो नाहा. केडालुज गुनेहगार ठरवाहा नाहा ताहा तुमनेहेन बी केडो गुनेहगार नाय ठरवे. तुमा बिहीरान माफ क्याहा ताहा तुमनेहेन बी माफ केअेराम आवी. ³⁸ तुमा बिहीरान द्याहा ताहा तुमनेहेन बी मिली, हारा मापाकी दाबी-दाबीन आलवी-आलवीन आने शींग पोयीन तुमा पदराम टाकी काहाका जी मापाकी तुमा बिहीरान मापीन द्या त्याज मापाकी तुमनेहेन बी मापीन दीइ. ³⁹ तियाय तियाहान एक दाखलो आख्यो, "एक आंधलो बिहीरा आंदलाल रस्तो देखावी सकेहे का? ते बेनी बी खाड्डाम नाय पोअडे का? ⁴⁰ केल्लो बी चेलो गुरूकेअेता मोडो नाहा रेअतो. पेन जाहा तो चेलो पुरो हिकी जाअहे ताहा तो गुरूहोस बोनी जाअहे. ⁴¹ तु तो डोवामेने कोचरा नाय वेअता तो पावुहु डोवाआमने कोचरा केअहकी वेअतोहो? ⁴² एहेकीज तु तो डोवामेने कोचरा नाय वेअता तो पावाहाल केअहेकी आखोहो का, पावाहा तो डोवाआमने कोचरा मान काडा दे? अरे ठोंग तु तो डोवाआमने कोचरो पेअहला काड ताहा तुल तो पावाहा डोवाआमने कोचरो हारो देखाय. ⁴³ कल्लोज चाडो एहेडो हारो चाडो नाहा तियाल खाराब फोलवो आवे आने तेहेकी केल्लोज खराब चाडो का जियाल हारो फोलवो आवे. ⁴⁴ केल्लो बी चाडवो तिया फोलवाहापने ओहकाय, काटाला चाडवापने केडो बी अंजीर नाहा तोडतो तेहेकीज काटाला चाडवामने केडो बी द्राक्षे नाहा टोलवुतो. ⁴⁵ हारो माअहु तिया मोनाअमेने हाऱ्या गोठया बारे काअडेहे तेहेकी, खोटो माहु तिया खाराब मोनामेने खाराब गोठ्या काडहे, जो मोनाम पोअलो हाय तोंज तिया मुयामेने निगहे. ⁴⁶ तुमा माअ आखली गोठ नाहा मानता आने मान ओ "प्रभु, प्रभु" एहेकी काहाल आखताहा? ⁴⁷ जो केडो बी माहु मां इही आवेहे आने तो मा गोठ्या उनायन मानेहे तो केडाहोस हाय इ आय तुमाहान आखी देखावुहु. ⁴⁸ तो एका पोंगो बांधनारा होस हाय तियाय पोंगो बांदा खातोर तोरतीम खुब उंडे लुगु खाेदीन खोडकाप पायो बांद्यो, हाती जाहा खाडों आलो आने खाडो पोंगाल लागीन गियो तेबी पोंगो नाहा पोड्यो, काहाका ते हरखी बाधले आथो. ⁴⁹ पेन जो केअडो मा वचने उनाहाय पेन तियानुसार चालतो नाहा तो एहेडो माहा होस हाय जो तिया पोंगो पायो नेय टाकता कादुमुज बांदेहे आने पायपोडीन खाडो आवेहे आने खाडो त्या पोंगा जागेने जाहे आने पोंगो पोडीन चुवाय जाय.