¹ फासे ऐहेकी वीयो की, तो गनेसरेत फुगारा तोडीप उबो आथो माहे देवा वचन उनाया खातोर येशु चोमखी टोलो वेरा लाग्ये, ² ताहा तियाहाय फुगाराम बेन नावड्या वेअया, पेन नावडीमेने मासे तेराने बारे तोडीपे आने तिया जाले तोवऊतुला आथा. ³ तियामने एक नावडीमे येशु गीयो ती शिमोना आथी आने तियाय तोडीपने जाराक ढुर लइजाय आख्यो, फासे तो नावडीम बोठो आने माहाले शिक्षण दा लाग्यो. ⁴ तियाय गोगनु पारव्यो व्यो फासे तो शिमोनाल आख्यो, नावडी उडां पायाम लिइ चाल आने मासे तेराकेअता तो जाले ऐठा टाक, ⁵ शिमोनाय उत्तर देदो, "साहेब, आख्यी रात आमाय खुप मेहनत केअयी पेन कायच मासे तेराये नाहा. तेबी तो आखल्यावाय आय जाले ऐठा टाकुह." ⁶ फासे तियाहाय तेहेकीज केअयो तिया जालाम मासा मोडो टोलो सापड्यो आने तिया जाल फाटा लाग्ये, ⁷ ताहा तियाहा बीहीरी नावडी वालाहाल आपु हेंगत्यान मदत केरअ खातोर हाद्ये. ते आला आने ते बेनी नावडी मासा की ओत्या पोराया की, ते बुडा लाग्या. ⁸ ई बीइन शिमोन पेत्र येशुअ पागे पोडीन आख्यो, "प्रभु माहीयने दुर जो काहाल आय पापी माहु हाय." ⁹ काहाका तियाहाय तेअले मासा टोलो वीइन तो आने तियाआरी आथा होग्गा जाआ बोगलाय गिला आथा. ¹⁰ ताहाज शिमोना गोवाद्यो जब्दी पोयरो याकुब आने योहान ऐ बी तिया सारका बोगलाय गिया, फासे येशुय शिमोनाल आख्यो, "भियो नाहा, काहाका ऐहीने आगला तु माहे तेनारो उपजो," ¹¹ फासे नावडी तोडीप लागवीन तियाय होग्गा काम सोडीन आने फासला गीये. ¹² आने ऐहेकी वेयो का, येशु केल्ला एका गावाम आथो तिही कोडला रोगा की पोअलो एक माहु आथो, जाहा तियाय येशुल वेअयो ताहा तो उबडु पोडीन तियाय रांवांया केअयी, "प्रभु जर तो इच्छा वेरी तर माल हारो केअेरा आपु समर्थ हाय." ¹³ ताहा येशु आपु आथ लांबो कीइन तियाल आथल्ली लेदो आने आख्यो, "मा इच्छा हाय तु हारो वीअ जो" आने चालुज तिया कोड मने हारो वीइ गीयो. ¹⁴ फासे येशुय तियाय तागुतो दिनआख्यो, "तु केडाल नाहा आखाहा, पेन जायन सोता याजकाल देखाव आने तियाकेअता की साक्षी आख्य केअता मोशेय नेमी देदेले आज्ञा हारो वी गीयो तियाकेअता अर्पण केअ" ¹⁵ पेन येशु बाराम बातमी जाहकीज फेली गीयी आने मोडो टोलो तिया उनाया केअतअ आने आपु रोग हारो वेअरा जोजे याकेअता माहे गोलो वेअतुले. ¹⁶ पेन येशु जोगलाम जाइन शांत जगाप प्रार्थना केअरा आथो. ¹⁷ ऐहेकी वेअयो की, एक दिही तो शिक्षण देतुलो तीह परूशी आने नियमशास्त्रा शिक्षक बोठले आथे ते गालील आने यहुदी हिवालामने आने यरूशलेम शहरा इया भागामने कोअता जागामने आल्लेआथे. प्रभु सामर्थ तियाम आथो तियाखातोर तो रोग हारे केअतुले आथे . ¹⁸ काही माहा एका लकवा वाला माहाल खाटलाम लीइन आले आने तियाय तियाल माजमे लि आवा आने येशु हुबंर ऐठा थोवाकेअता प्रयत्न केअयो, ¹⁹ पेन मोडा टोलांम माजमे जावुला वाट तियाल सापडुतली नेय, तियाल तियाय कोआवा उपे चोडीन तिया खाटलो आरी उच्चेने ऐठा उतावे येशु हुबंर ऐठा सोड्या. ²⁰ तिया विश्वास विइने, येशुय आख्यो, "पोयरा, तो पापाहा माफी मिलली हाय." ²¹ नियमशास्त्राआ शिक्षक आने परुशी सोते विचार केअरा लाग्या," ओ आज्ञा केनारो केडो? देवाशिवाय केडो पापाहा माफी किइ सकतो नाहा?". ²² पेन येशुय तिया मोनामने विचार जायइन तियाल उत्तर दिइन आख्यो, "तुमा आपु मोनाम ऐहेडो विचार काहा केअताहा? ²³ तो पापाहा माफी वीइ गीयीली हाय का उठ आने चालतो वेअे इया गोठीमने काय आखनु सोपी हाय ²⁴ पेन तुम्हाल ई मालुम वेराज जोजे की मनुष्याआ पोयराल इया तोरतीपे पापाहा माफी केराकेअता अधिकार हाय, तीइयाले तो लकवावाला माहाले आख्यो, आय तुल आखु उठ, आपु खाटलो उखलीन आपु कोआ जो." ²⁵ चाल्लुज तो उबी रीयो आने ज्या खाठ्लाम तो हुतलो आथो तो उसलीन देवाआ गौरव केअतो आपु कोआ गीयो. ²⁶ ते होग्गे बोगलय गीये आने देवाआ स्तुती केअरा लाग्ये, ते खुप बीइ जायीन आख्यो, आमाहाल आज किदीह वेल्या नाहा ऐहड्या गोठ्या आमा हुबंर वेअयाहा. ²⁷ ई गोठ्या वीइन येशु बारे गीयो आने तियाय लेवी नावाआ एक सरकारी माहु नाकाप कर वसुली केअनारो बोठलो वेअयो, येशुय तियाल आख्यो माआ फासला आव! ²⁸ ताहा लेवी होग्गे काही तिहीज सोडीन तो उठीन तिया फासला गीयो, ²⁹ फासे लेवीय तिया कोआमे येशुकेअता जेवणा मोडी वेवस्था केअयी आने तो पोयसा वसुली केअनारो बीहेरे माही मोडो टोलो तिया आरी मांडो खातुलो. ³⁰ फासे परुशी आने नियमशास्राआ शिक्षक ईहाय तिया चेलाहाल तक्रार केअयी, ते आखा लाग्यो, तुम्हा करवसुल केअनारा आने पापी माहाआरी काहा खायरीआ? ³¹ येशु तियाहान आख्यो," जे दु:खी नाहा तियाहाल दावादुरीवालाआ गरज नाहा, पेन जे दु:ख्ये हाय तियाहाल दावदुरीवालाआ गरज हाय. ³² आय देवाल नितीमानाल हादा नाहा आलो तर पापी माहाल पास्तावो केराकेअता हादा आलो", ³³ ते तियाल आखा लाग्ये, योहाना चेला कायम उपास आने प्रार्थना केअताहा आने परूश्या चेला बी तेहकीज केताहा, पेन तो चेला तर खातापीता हाय, ³⁴ येशुय तियाल आख्यो केडो ऐहेकी केअरी वोऱ्हाडावाला आरी वोडलो हाय ताव तुम्हाल तियायहाल उपास आखता आवी काय? ³⁵ पेन ऐहेडो दिही आवी की, वोडलाल तियापेन लिजाय आने त्या दिहापने ते उपास केअरी, ³⁶ तियाय तियाल आजी एक गोठ आखी, केडो बी नवो पोतडा कुटको फाडीन जुनाल लागवुतो नाहा, जर तो तेहेकी केअतो तर तो पोतडाल फाडतो पेन नवा पोतडाआ ठिग्लो जुना पोतडाल तो हारो नाय देखाय. ³⁷ आने केडो बी नवा द्राक्षारोह जुना द्राक्षारोहा चामंडा पिशवीम पोवतो नाहा जर तो ऐहेकी केअतो वेअरी तर नवा द्राक्षारोह चामंडा पिशवी फुटीन बारे उबराय ³⁸ नवा द्राक्षारोह नोवा चामडा पिशवीम थोवा जोजे. ³⁹ केडाल बी जुनो द्राक्षारोह पिईन हाती तियान नोवा रोह नेय जोजे काहाका "जुना द्राक्षारोहज हारो रेहे."