¹ येशु पवित्र आत्माआकी पुरो पोरायन यार्देन खाडीमेने निगीन आलो, आत्माहाय तियाल जोगलाम लिइ गीयाे, ² तिह सैतानाही तियाल चालीस दिही परीक्षा लेदी. तिया दिहाम येशुय कावीज खादलो नेय आथो आने ती टेम पारवायाे ताहा येशुल पुख लागी. ³ ताहा सैतान तियाल आखे, जर तु देवा पोयरो हाय तर या दगडाला मांडो उपजीजो, ऐहेकी आज्ञा के. ⁴ येशुये तियाल उत्तर देदो, पवित्र शास्त्राम ऐहिकी लिखालो हाय की, माहुव फक्त मांडाकीज जीवी ऐहेकी नाहा. ⁵ फासे सैतान तियाल उच्चे जागापे लीइ गीयाे आने ऐकुज घेडी जगामिने होग्गा राज्ये तियाल देखाव्यो. ⁶ सैतानही तियाल आख्यो, "आय तुल इया होग्गाज राज्याहा अधिकार आने वैभव देहे काहाका तो मान देंदलो हाय आने माआ मर्जीकी ते दि शेकुहु ⁷ काहाका जाहा तु माअ पागे पडोहो आने माआ उपास केअवहो तहा ई होग्गा काही तो वेरी". ⁸ येशुय उत्तर देदो, "पवित्र शास्त्राम ऐहिकी लिखलो हाय. प्रभु तो देव इयाज भक्ति केअे आने केवळ तियाज सेवा केअे." ⁹ फासे सैतानाय येशुल यरूशलेम शहराम लीइ गीयो आने परमेश्वराआ कोआ उच्चे चाेडवीन उबो केयो आने तियाल आख्यो, "जर तु देवाआ पोयरो हाय तर इहने ऐठा कुदीपोड! ¹⁰ ऐहेकी लेखलो हाय की, तो कालजी केराकेअता आपु दुताहाल तो आखी ¹¹ आने तो पाग दगडावे आसाटाय नेय तिया खातोर ते तिया आथाम चेलीली थोवी." ¹² येशुय उत्तर देदो, "पवित्र शास्त्राम ऐहेकी बी आखालो हाय; तो देव परमेश्वर इयाआ परिक्षा नाहा लेअहव, ¹³ ताहा सैतानाय जुद्या प्रकारा परिक्षा लेद्या तो तेहेडो वेळ आवे ताहा लोग तो येशुल टाकीन निंगी गीयो. ¹⁴ ताहा पवित्र आत्म्याआ सामर्थ्या की येशु गालीला हिवांळाम आलो आने तिया विषयी होग्गा होवे माहती वेयो, ¹⁵ तियाय तियाल देवाकोअमे हिकव्या अने होग्गाये स्तुती केयी. ¹⁶ ताहा जी तो हानापेने मोडो वेयो तिया नासरेथ इया गावाम तो आलो आने शब्बाथ दिहा तिया रूडी प्रमाणे देवाकोआ जाईन शास्त्र वांचाकेअता उबी रीयो ¹⁷ आने यशया संदेष्ट्याआ ग्रंथपट तियाल देवाम आलो, तियाय तो पुस्तक उघडावे आने जो भाग होदी काड्यो तिया जगाप ऐहेकी लीखलो हाय. ¹⁸ प्रभु आत्मो मापे आलो हाय, काहाका, याकेअता की, गरिब महाहान हारी गोठ आखाकेअता त्याय माल अभिषेक केअेलो हाय. कैदी आखीन ली गयेलान सुडकारा समाचार आखाकेअेता आने आंदलाले फासे वेरा आवा जोजे, जियावे जुलुम वेलो हाय तियाहा सुटको केरा केअेता ¹⁹ आने प्रभु कृपाआ वर्षआ आखा केअता तियाय माल अभिषेक केअलो हाय माल मोकलओलु हाय" . ²⁰ फासे तियाय ग्रंथपट बंद केअयो सभास्थाना सेवकाल फासे दिइन तो ऐठा बोठो, सभास्थानामेने हरऐक जाअ तिया वेला एकसारखे वेअेतले आथे ²¹ तीयाय तिया अरी गोगा शुरवात केयी की, "तुमा उनाये इया खातोर आज ई शास्त्रलेख पुराे वेयोलो हाय" . ²² ताहा होग्गे माहे तिया बाराम साक्षी द्या लाग्या आने तिया मुखाअवाटे आवनारा कृपाआ शब्दा बद्दल ते आश्रर्य चकित वेअया आने तियाय आखायो ओ योसेफा पोयरो नाहा काय? ²³ येशु तियाल आख्यो, "नेक्की, तुमा मेने काहीक जअ एहेकी आखाहा; ऐ दवादुरीवाला तु खाजगी हारो केअ. कफर्णहुमाम जे गोठ्या तुयय केअया आमाय उनाया ते गोठ्या तो खाजगी गावाम जाईन तु केअे. तो आगला आखा लाग्यो," ²⁴ माय तुमाहाल खेरो आखुहु, केडो बी संदेष्ट्यो (भविष्यवक्ता) तिया काजकी गावाम मानपान नाहा. ²⁵ आय तुम्हाल खेरो आखे, इस्राएलाम एलीयाआ कालाम खुबज विधवा आथ्या, जाहा साडेतीन वोअरेहुद वादलामने पाय पोडयो नाहा आने होग्गा देशाम मोडाे दुष्काळ पोडलो आथो, ²⁶ तेबी एलीयाले बिहऱ्या केल्लीआ बी विधवअ पाही मोकलुथा अलो नाहा. तियाले सिदोना हीवालाम सारफथ तीहने विधवेहेय मोकलवाम आलो ²⁷ अलिशा संदेष्ट्याआ वेले इस्त्राएलाम कोअते तेबी कोडलो रोगी आथे पेन तियामने केडोआ ऐहेकी हारो नाहा वियो. पेन सुरीया नामान कोडले रोग वालाल हारो केअराम आलो आथो. ²⁸ ई उनायने सभास्थामने होग्गा माहाने रोग आली ²⁹ ते माही उठईने आने तियाहाल तियाय येशुल शहरा बारे काडी देदो आने जीया बोडीपे तिया गाव आथो तिया पाही तियाल पोचवी आले. ³⁰ ताहा तो तियामने निगीन आपु वाटीवाय गीयो ³¹ फासे तो गालीला हीवालाम कफर्णहुमा गावाम गीयो, तो शब्बाथ दिही सभास्थानाम तियाल हिकवुतो आथो ³² तो तिया हिकवुलो वीने बोगलाये आने तिया गोगणु अधिकाराकी आथो. ³³ त्या दिही सभास्थानाम, अशुध्द आत्मा लागलो एक माहु आथो आने तो जोरमे बोंबलिन अखायो, ³⁴ ओ नासरेथकर येशु तु आम्हाम काहा पोडतोह? तु आम्हा नाश केअरा आलो का? तु केडो हाय ई माल मालुम हाय! देवाआ पवित्र! तो तुज हाय. ³⁵ येशुय तियाय धमकाविन आखे ठको रेअ आने तियाम ने नीग! ताहा तो अशुध्द आत्माहाय तीया माहाल एठा तोरतीप पाडी टाक्यो आने तिया महाल काईज दुखापत नैय केअता तो तीयामेने निगी गियो. ³⁶ ताहा होग्गे जाआ बोगलाय गीअले आने एकबीहीरा आरी गोगा लाग्या, ई केल्ला प्रकारा शब्द हाय? अधिकाराकी आने सामर्थ्या की तो अशुध्द आत्माहाल देखिन आज्ञा ( हुकुम) केअहे, आने ती बारे आवेहे . ³⁷ एअेकी तिया बाराम सेवा चारी चोमखी देशाम मालुम पोडतो गीये, ³⁸ येशु सभास्थामने निगीन शिमाेना कोआ गीयो, शिमोना हावडील खुप बोरो आथो, तियाय तिईल हारो केराकेअता तियाल आख्यो, ³⁹ येशु तिइयी पाही उबी रीयो आने त्याय बोराल धमकाव्यो आने तियामने बोरो निगी गीयो. चालुज ती उठीन तिया सेवा चाखरी केअरा लागी. ⁴⁰ दिही बुडअ आथो, हरेक बहिरे बिहिरे रोगवाय बीमारी आथे होग्गा माहअने तिया पाही लाआले. तियाय हरेख मुनकापे आथ थोवीन तियान हारे केअये ⁴¹ कोताहामने अशुध्द आत्मे बारे आले ते अशुध्द आत्मे, बोंबला लाग्यो, आने आखा लाग्यो तु देवा पोयरा हाय. पेन तो ख्रिस्त हाय ई तियान मालुम आथो तियाले तियाने बीयावीन कायज गोगा देदो नाहा. ⁴² दिही नीगताज तो शांत जागाम गीयो, पेन माहे तियाल होदान लग्गे. तो जीही आथ्यो तीही ते चालुज आले आने तियाहामने तियाल निंगी नेय जआ जोजे तियाय प्रयत्न केअयो, ⁴³ पेन तो तियाहाल आख्यो, "देवाआ राज्या सुवार्ता माने बिहिरा गावाम बी आखाया जोजे काहाका याकेअता माल मोकलुलु हाय." ⁴⁴ फासे तो होग्गा यहुदीया हिवालाम सभास्थाम हारा गोठ्या आखतो गेयो.