¹ येशुये तिया चेलाहान एक दाखला आखी, एक मालदार माहु आथो, तीया एक कारभारी आथो. माहाये मालीकुल आख्यो, ई जो कारभारी तो पोयसा मोज्या मारीन खोरची टाके हे. ² तियाल त्या मालदार माहाये तीया कारभाऱ्याले हाद्यो आने आख्यो, तो बद्दल माय ई काय काय ऊनाय रीयो हो? तीयाल तु मान तो कामु हिसाब देअे, काहाका माय तुल ईया आगला कारभारी नाहा थोऊला हाय. ³ ताहा तीया कारभारीय मोनाने विचार केयो, मा मालीक मावेने कारभार मागी लेनारो हाय ता माय आमी काय किवु? खेतुम काम केरुला ओती मा डीलाम शक्ती नाहा आने भीक मागुला माने लाज आवे. ⁴ माने कारभाऱ्या कामापेने ते काडी टाकी तेबी माहाय माने तीया कोअमे ला जोजे तीया वाटो माने काय केरा पोडी तो माने मालुम हाय. ⁵ पासे कारभार्याये तीया मालकावेने जीयाय कौरजो लेदोहो तीयान होग्गान हादे. पअेलाल तीयाय आख्यो तुयु मा मालीकावेने कोतो कौरजो लेदाहो तो तुल फेडुला हाय. ⁶ तीयाय आख्यो तीन हजार लिटर तेल. तीयाय तीयाल आख्यो, ई तो हिशाबा वोही ले आने माहरी बोहीन ईयावे दीड हजार लिख. ⁷ हाती बीहीराल आख्यो, "तुल कोअता देऊला हाय?" तीयाय आख्यो, "वीस हजार किलो गोव" तीयाय तीयाल आख्यो, "तो हिशोब वोही ले आने सोला हाजार लिख." ⁸ खोटो काम केनाऱ्या कारभाऱ्याये ओखली की काम केयो. इ वीइन तीया मालीकाय वाहवा केई; काहाका या जोगामने लोक आपु सारखा बोद्दल होरो आखनारा माहा हेने खुपे शाहाने रेताहा. ⁹ पासे येशुये आख्यो माय तुमान आखु, तुमा वाटो, तुमाहा ईया जोगाम कामावली मीलकती की तुमा हेगात्या होदी काडजा, ईया खातोर का, जाहा ती मिलकत पारवाय ताहा तीयाय तुमाने रेऊला खातोर सर्वकालिक कोअ मे राअ हादी ली. ¹⁰ एखाद्यापे थोडो भोरुसो थोऊला शक्य वेअेरि ता तियावे जास्ती भरोसो थोवलो शक्य रेहे आने जो केडो थोड्या गोठीम अन्याय रेहे तो जास्ती गोठीम बी अन्याय रेहे. ¹¹ इयाखातोर तुमा दुनीयामेने कामावली मिलकत खातोर विश्वासु नाहा, तो हाती खेरी मिलकत खातोर तुमापे केडो भोरुसाे थोवी? ¹² जो बिहीराअ हाय तिया खातोर तुमा विश्वासु नाहा ता जो तुमा हाय तो तुमाल केडो दीइ? ¹³ केल्ला बी मोजउराल बेन मालका सेवा केअता आपती नाहा एकाल तो रोग केअे आने बीहीरापे तो माया केअे नेअता एकाल तो मानीन चाली आने बीहीराल हारो मानीन नाय चाली.तुमा एकाज टेमाल तुमा देवा आने पोईसा सेवा की नाहा साकता". ¹⁴ परुशी माहा जे पोइसा लोबी आथा तीयाय ये आख्या गोठ्या ऊनाय ने तीयाय येशु निंदा केअरा लाग्या. ¹⁵ येशु तियान आख्यो तुमा सोताल माहा हुबुंर धर्मी काय ऐहेकी देखावता, पेन देव तुमा मोने ओहखेहे जीया माहा हान तीया नोजरीम मोडो मानेहे ते देवा नजरेम बाटालो हाय. ¹⁶ योहानालुग नियमशास्त्र आने संदेष्टे आथे आने तीहीने देवा राज्या गोठ्या आखतेहे आने होग्गे माहे तीया विहुला जोरमे प्रयत्न केताहा. ¹⁷ नियमशास्त्रा एक बी कानो नेअता मात्रो नाहीसो वेरुलाकेअेता आकाश आने पृथ्वी नाहीसो वेरलो सोपो हाय. ¹⁸ "जो केडो आपु थेईल सोडी देहे आने बीहीरी आरी वोराड केहे तो व्याभिचार केहे आने जो केडो माहाय तीया सोडली थेई आरी वोराड केहे तो व्यभिचार केहे." ¹⁹ एक मालदार माहु आथो तो जाभंळा रोंगा माेगाम ने मोगे कोपडे वापरुतलो. रोज दिही तो माेजा मारीन आराम कीइ रेतलो ²⁰ तीया बाना जागे लाजर नावु एक गरीब माहु पोडी रेतलो आने तीया डीलापे फोड आल्ला आथा. ²¹ तीया मालदार माहा मांडो खाऊला टेबलापेने जो कावी नीचे पोडी तो तेबी मान खा मिली ऐहेकी आशा केअेतलो वोतोज नाहा पेन कुत्रे आवीन तीया फोड चाटतले. ²² पासे ऐहेकी वेयो का, तो गरीब माहु मोअई गियो आने देवादुताय तीयाल अब्राहामा उंगाम लावीन थोव्यो, इपाये मालदार माहु बी मोअई गीयो आने तीयाल पुरी देदो. ²³ मालदार माहु नाेरकाम दु:ख भोगा लाग्यो, तीहीने तीयाय ऊचे वेयो आने आब्राहामाल आने लाजराल तिया उंगाम वेयो. ²⁴ तो बोंबलीन आखा लाग्यो, हे आब्राहामा बाहाका, माअपे दया केअे आने लाजराल मोकले ईया खतोर का तो तीया आकड्या पायाम बुडवीन मा जीभ हेली कीइ, काहाका इया आगीम माय खुबुजे दु:ख भोगी रीयो हो. ²⁵ ताहा आब्राहामाय आख्यो, मा पोयरा, ध्यानुम ले की तो जीवनाम जेहेकी तुल हाऱ्या गोठ्या मिल्या तेहेकी लाजराल खाराब गोठ्या मिल्या. पेन तीयाल आमी आराम मिली रीयो हो आने तु दु:खाम हाय ²⁶ आने इया होग्गाशिवाय, तुमहा आने आमा वोच्चे एक माेडो उंडो खाडो थोव्यो हो, इया खतोर का, ईहीने तुमा जागे केडाल जाता आवा नाय जोजे आने तुमायने केडाल आमालुग आवता आवे नाय. ²⁷ तिया श्रीमंत माहाय आख्यों, फासे आय तुल विनंती किहु,ओबा, लाजराल ता मा बाहाका कोअ मोकले, ²⁸ लाजराल मा पाच पावुहुन जाईन तियहान सावध केअरा दे तियाले ते तेबी ईया दु:खा जागावे नाय आवे. ²⁹ अब्राहामाय आख्यो, तो पाऊहु जागे मोशे आने संदेष्टे हाय तीयाहा तियाय ऊनाया जोजे. ³⁰ तीया मालदार माहु आख्यो, नाहा हे बाहको आब्राहाम, मोई गीयोहो ने केडो मा पाऊला जागे गीयो ता ते पाहु तिया मानी ली. ³¹ अब्राहामाय तियाल आख्यो जर ते मोशे आने संदेष्टा हा उठीन जाई तेबी तिया नाय माननारा.