¹ हाती येशु तीया शिषांले आख्यो, "जीयाकी माहाये पाप केअरी ते आवीज पेन जीयाकी ते आवते त्याआ कोअती खराब दशा वेरी! ² त्याये ईया वायहाना मेनी एकाले पाप केअरावा लागवा पेन तियाहा कोअगीमे कोहटी पुडको बादीने त्याले दोऱ्यामे टाकी द्ये इयामेज फायदो हाये. ³ सोतहापे द्यान देजे ! जर तो पाहु पाप केअेतो वेरी ते त्याले ताबलुजे आने जो जहा पश्चाताप केअतो वेरी ते त्याल माफ केअेजे. ⁴ जाहा तो दिहामेने सात वाऱ्या तो विरुध पाप केअेतो वेरी आने सात वाऱ्या तो वेले आवेहे आने आखे,आये पाश्चाताप किहीवु, तेबी तु त्याले माफ केअेजे. ⁵ हाती प्रेषित (शिषय ) प्रभु येशुले आख्यो, आमा विश्वास वादोव. ⁶ प्रभु येशुये आख्यो, "जर का तुमा विश्वास बारीक दाना (मोहरी) ओतो वेरी ते तुमा इया तुती झाडाले आखी शकतो, मुलासकट उपटीन दोऱ्यामें टाकाय जो, तेबी तोओ चाड तोअ उनाये. ⁷ तुम्हामेने अेहेडों केडों हाय का, तीया खेत नांगरनारो नेअते मेंडे चाआनारो आवत्यों खेतामेने आलो का तो त्याले आखी, आमी आवताजे मांडो खा बोह.' ⁸ उलटो मा मांडो तीयार केअे, 'आये खाय उठे ताअ लगु कोंबोर बादीने माआ चाकुरी केअेजे आने हाती तु खो आने पीजे; अेहेकी तो त्याले आखी नेअय का? ⁹ ज्या गोठ्या केअरा केअता तुमा आवत्याले आखता ते तो केअरा पोड्यो का तुमा तिया बद्दल त्याला धन्यवाद आखता का? ¹⁰ तुमा बाबत बी तेहेकीज हाय. जहा तुम्हाले आखाम आलो होग्गा कामे पारवा वीइन तुमा अेहेकी आखा जोजे, आमा केल्ला बी लायक नाहा फोक्त अमा आवात्या होस काम केअेलो हाय." ¹¹ हाती अेहेकी वेयी का, तो येरूशलेम शहरा होवे चालतलो ताहा, शमरोन आने गालील प्रांता हिवाळामने गयो. ¹² तो अेगा खेडागांवाम जाहालो तहा तीही त्याले कोडले बीमारीवाले दोहो माहाये मिले. ¹³ आने ते दुर उबी रिहीने मोठमोठाकी बोबलीन आखा लाग्या, "येशु स्वामी आम्हावे दया केअे," अेहेकी आखीन त्याही त्याहील बोंबली वोल्या. ¹⁴ तहा येशुये कोडला बीमाऱ्याले वेअेयो, ताहा तो त्याहाल आख्यो "जा आने खुद स्वताले याजकाले देखावा" ते याजका होवे जाहला ताहाज हुदरी गीये, ¹⁵ ताहा एकाये वेअयो का आमा हारा वेअलो हाय ताहा तो फासे आलो आने तो मोडा ने बोबलीत देवा गौवरव केअरा लाग्यो. ¹⁶ तो येशु पाही आलो आने तिहीया पागे पोड्यो. आने तेहेकीज त्याये त्याआ उपकार मानी लेदो. तो एक शोमरोनी आथो. ¹⁷ येशु त्याले आख्यो, "दोहो जाआ हारा (शुध्द) वेअेले नाय का? बाकी नऊ जाआ किही हाये? ¹⁸ ईया पारका माहा शिवाय केडो बी नाहा देवा गौरव केरा केअेहेता फासो आलो नाहा? ¹⁹ तो त्याले आख्यो, "उठ आने जा, तो विश्वासाये तुल हारो केलो हाय". ²⁰ परूश्यांये येशुल फुस्यो, देवाराज किदी आवी, येशुये त्याहाले आख्यो, "देवा राज देखातामे आवतो नाहा. ²¹ व्याआ, तो इही हाय का तीही हाय! अेहेकी आखनारो नाहा काहाका देवा राज ता तुम्हा मे हाये." ²² शिष्यांने त्योये आख्यो, "माहा पोयरा आवुलो दिहा मे एका दिहीआ तुमा खुबे वाट जोवते हे पेन तो दिही तुमा वीई शकनारे नाहा, अेहेडो दिही आवी. ²³ आने लोक तुम्हाले आख्यी, वेजा, तो ते ईही हाय, वेजा तो तीही हाय, ताहा तुमा माल वेरा केअहेता त्याहा फाचला जाहा नाहा. ²⁴ काहाका वीज जेहेकी वादलामे एका जागा मेने बीहीरा जागे हुद चोमकुती जाहे तेहेकी माहाआ पोअरा आवुलो त्या दिहीयामे वेरी. ²⁵ पेन पेअला तियाय खूप दु:ख भोगा जोजे आने इया पिढीद्वारे नाकारो जाय इ खुप-गोरजे हाय. ²⁶ जेहेकी नोहा दिहीयामे वेअेलो तेहेकीज माहा पोयरा दिहामने बी वेअरी. ²⁷ नोहाले उड्याने प्रवेश केअेयो आनी हाती महापुर आलो आने त्यहा होग्गा नाश वेअयो त्या दिहीलगु ते खातले, पीतले, वोराड लागवी लेहेले, आने वोराड लागवी देहेले आथे. ²⁸ त्या प्रमाने लोटा दिहा मे वेअलो तेहेकी वेरी: ते खातला, पीतला, विचतो लेतला, विचतो देतला, लागवड केअेतला. बांधतला आथा. ²⁹ पेन ज्या दिहीयाम लोट सदोम सोडीन बारे निग्यों त्या दिहीयामे बादलामे आग आने गंधक याआ पायाहोस पोड्यों आने होग्गाहा नाश वेअयो. ³⁰ माहा पोयरा प्रगट वेरुला दिहीयामे अेहेकीज वेरी ³¹ त्या दिही अेगोंहो पोंगा पाहावे वेरी आने तीया त्या सामान पोंगामे वेरी, तर त्याये तो बारे काढा केअहता कोअमे जाय नेय. तिया प्रमाने जो खेताम वेरी त्याये फासे जाय नेय. ³² लोटा थेअई ईत केरा. ³³ जो केडो आपु जीव वाचावा वेहे तो आपु जीव गोमावी आनी जो केडो आपु जीव गोमावी तो त्याल बाचावी. ³⁴ आय तुम्हाल आखु, तीया राती फातारीपे बेनी वेरी तीयामेने एक लेवामे आवी आने बीहीराले थोवाम आवी. ³⁵ बेन थेअेया दोअनो दोत्यावेरी ते त्यामेने एक लेवामे आवी आनी बेहीरी थोवामें जाय." ³⁶ खेतामे बेनी वेरी ऐकाले लेवामें आवी आने बेहीराले थोवाम आवी. ³⁷ शिष्याये त्याल फुच्यो, किही प्रभु? येशुये उत्तर देदो, जो मुरदो वेरी तीही गीद जमा वेरी ।