¹ जाहा होग्गा करपेट्टी लेनारा आने पापी माहे येशु गोठ्या उनाया आवतला. ² ताहा परूशी आने नियमशास्त्रा गुरुजी कुरकूर केरा लाग्या. ते आखा लाग्या, "ओ पापी लोकान जागे किइने तीया आरी मांडो खाहे!" ³ पासे येशुये तियान बी गोठ्या आख्या. ⁴ तुमापने केडा एका जागे शंभर मेडे हाय आने तियामने एक मेडो गोमायो. ता तो नव्याणणाव मेडान जोगलाम सोडीन गोमाला मेंडा पाचला तो सापडुतो नाय तावुकलुग जाय नाय का? ⁵ आने जाहा तियाल तो सापळे ताहा तो खुशीकी तीयाल खादापे लीइ लेहे. ⁶ आने जाहा तो कोअ आवे, ताहा आहील्या पाहील्याआने एकत्र कीइने आखे हे, आरी खुशीया मोनावा काहाका मा गोमालो मेंडो सापडी गीयो हो, ⁷ तीयाल आवा तुमान आखु हु जीयाने पासतावो केरुलो गोरोज नाहा हाय ऐकदाय नव्याण्णाव धर्मी लोकाहा बद्दल वेनारा खुशी की पासतावे केनारा एका पापी लोकाहा बोद्दल स्वर्गामे खुबुजे खुशी वीइ, ई माय तुमाहाने आखु. ⁸ जेहेकी का एका बाई पे चांदी दहा पोईसा हाय आने तीयाम ने एक पोईसा गोमाय गीयो ता ती दीवो लागवीन कोअमे बाईने तो मीलतो नाहा तावुकलुग मोन लागवीन ती होदे नाय का? ⁹ आने तीयुल जाहा तो पोईसा मिल्लो ताहा ती तीयु आरीने आने कोअवा जागऱ्याने हादीने आखी, "माआरी खुशी केरा काहा का मा गोमाला पोइसा मान मिली गीया." ¹⁰ इयाहोस पासतावो केनारा एका पापी माहा बोद्दल देवा हा दुता हुबुंर खुशी वीइ, ई माय तुमाहान आखु हु. ¹¹ पासे येशु आख्यो एका माहा बेन पोयरे आथे. ¹² तीया बेन्यामने एक हाना पोयराय आख्यो, "बाबा, मान मीलकत मेने मा हिसो बाहाकाय मान दिइ दे."आने पासे तीया बाहाकाय तिया मीलकत बेनी पोयरा ने वाटी देदी. ¹³ पासे वाहीक दिही वेया ताहा हानो पोयरो तिया मिलकत पोयसा टोलवीन तो बिहीरा देशुमे नीगी गियो. तीही तियाय तिया मिलकत पोयसा मौजा मारीन जीविन आखी उडवी टाकी. ¹⁴ तीही तीयाय आखा पोईसा खोरची टाक्या फासे तीया देशुम खुप मोडो दुष्काळ पोड्यो आने तो पुखे मोरा लाग्यो. ¹⁵ तीया देशुम एका माहा जागे तो गीयो आने तीया साहारो लिइन तो तिया जागे राअ लाग्यो तीया माहाये तीयाल तिया खेतुम डुक्करे चारा मोकल्यो. ¹⁶ जाहा केडो तीयाल काय बी खा नाय देतलो, ताहा डुकरे जे हेंग्या खातले त्या हेंग्या खाईने ते बी आपु डेठ पोऊ ऐहेकी तीयाल वाटा लाग्यो. ¹⁷ पासे तीयाल होमजाया लाग्यो आने तो ईतवा लाग्यो आने आखा लाग्यो, "मा बाहाका कोअ कोता ते बी नौकर हाय तिया डेड तराईन मांडो खाय आने आरदो रिइ जाता ओतो मांडो रेहे आने माय ता ईही पुखो माेई रीयो हो! ¹⁸ आमी माय ई सोडीन मा बाहका जागे जाहे आने आखेहे, "ओबा माय देवा विरुध्द आने तुमा विरुध्द पाप केयो हो. ¹⁹ तुमाहा पोयरो होमजुनो बी मा लायकी रीई नाहा. ता माने तो रोजीपे रेनाऱ्या एका मोजऱ्या होस तेबी थोवीले." ²⁰ पासे तो हानो पोयरो तीया बाहका जागे जा गीयो. ताहा तो तिया कोअवा दुरूज आथो तुरतज तीया बाहका ये तियाल वेयो आने तियाल तीयापे किंवा आली आने दोवळुतो तीया जागे जाइने तिया गाेले लागव्याें आने तीयाल चुंबन द्या लाग्यो. ²¹ पोयराय आख्यो ओबा मायु स्वर्गा विरुध्दाम आने तुमा विरुध्दाम पाप केयो हो आने मान तुमा पाेयरो होमजीन रेवुला बी मा लायकी नाहा रीई." ²² पेने तिया बाहकाल मोजऱ्यान आख्यो, "माहार माहार जा, आने ईया खतोर हारे पोतडे लीइ आवा आने तियाल तियार केरा आने आथुम मुन्दी पोअवी द्या आने पागाम चापले पाेवी द्या. ²³ आने मोडो भाडारो द्या, आपु खाईने खुशीया मोनाऊ हुं! ²⁴ काहा का ओ मा पोयरो मोई गेहलो तो जीवतो वीइ आलो तो गोमाई गेहलो आथो, पेन तो सापडी गीयो हो तीयाल ते खुशीया मोनावा लाग्ये". ²⁵ तीया टेमाल, तीया मोडो पोयरो खेतुम आथो. तो तीया कोअवा वेल आवतलो आने कोअवा जागे आलो आने तीयाय गाणे वाजुला आने नाचुला आवाज तीयाय ऊनायो. ²⁶ तीयाय एका मोजऱ्याल हाद्यो आने फुचा लाग्यो, ई आखो काय चाली रियोहो? ²⁷ तीया मोजऱ्याय आख्यो तो पावु आलो हो तो तुमा बाहकाल हारीरीती फासे मिली गीयो तीया खातोर मोडाे भाडारो देदाे हो." ²⁸ ताहा तीयाल रोग की आली आने तो कोअमे नाय जा लाग्यो ताहा तिया बाहको बारे आलो आने तीयाल होमजावा लाग्यो. ²⁹ तीयाय तिया बाहकाल आख्यो, वेअते वोरेहे माहु तो सेवा चाकरी केई आने मायु किदीज तुमा आज्ञा मुडी नाय! आने मा हेंगात्या आरी आनंद मोनावा तुमाय मान किदी सादो भाडारो बी नाहा देतो. ³⁰ आने जीयाय तुमा आखी मीलकत वेश्या वे उडवी टाकी तो तुमा पोयरा फासे आलो ताहा तुमाय तीया वाटो मोडो भाडारो देदो. ³¹ ताहा बाहकाय तियाल आख्यो, मापोयरा, तु सदा मा आरी हाय आने जो मा हाय तो आखो तोज हाय. ³² पेन आपु आज आनंद किहु आने खुशीया मानावा जोजे काहा का तो पाऊ मोई गेहेलो आथो तो जीवतो वेयो, तो गोमाय गेहेलो आथो, तो सापडी गीयो.