¹ तियाज टेमापे येशुल तिही आथा, तिया लोकाहामने बाकी लोकाहाय जिया गालील प्रांतामने पिलात राज्यपालांय यरूशलेम मंदीराम बलीदान केअनु टेमापे लोकाहान माय टाकावुला आने तिया रोक्त आने यज्ञपशु आरी मिसले ती गोठ आखी देखावी. ² ताहा येशुय तियाहान आख्यो तुमाहान एहेंकी लागेहे इया गालील प्रांतामने लोकाहाय एहेडो दु:ख भोग्यो इयाकी बाकी गालील्याहा से ते वाद पापी आथा का? ³ आय तुमाहान आखुहु एहेंकी नाहा, पेन जर तुमाहाय केला पापाहा पासतावो नाय केयो ता, तुमा बादे ते मोअये तिया होस तुम्हा बी मोअराहा. ⁴ तेहेकीज तिया आठरा माहाहांपे शिलोह सेहेरामने उचो पितडो पोडीन दोबाय मोअय गिया ते यरुशलेम सेहेराम रेनारा होग्गा माहाहा से वाद पापी आथा, एहेंकी तुमाहान लागेहे का? ⁵ आय तुमाहान आखुहु, एहेंकी नाहा पेन जर तुमाहाय बी पापाहा पासतावो नाय केयो ता, तुमा होग्गा तिया होसज मोअराहा. ⁶ फासे येशुय इ गोठ आखी, “ एका माहाय दाराक्षा मोलाम एक अंजीरा चाडवाे लागव्यो तिया चाडावे फोलवे लागे का नाहा इ वेरा तो आलो पेन तियाल एक बी फोलवो नाहा मिल्यो. ⁷ ताहा तियाय दाराक्षाहा राखवाल्याल आख्यो, तीन वोरेहे वी गियेहे, तेहे आय इया अंजीरा चाडवापे फोलवे वेरा आवुहु पेन मान काविज सापडुतो नाहा, तो चाडवो रोंडी टाकजे तो नोकामा जागो गेरवी रियोहो? ⁸ ताहा राखवाल्याय तियाल आख्यो मालिक ओतोहो वोरोहो राअ दद्या आय तिया चारी सोमकी खोदीन खत पोय देहे. ⁹ फासे आगल्या वोराहाल फोलवे लागे ता ठिक आने नाहा लागे ता आपु तियाल रोंडी टाकुहु. ¹⁰ शब्बाथ दिहा-दिही येशु एका देवलाम परमेश्वरा हाऱ्या गोठ्या हिकवुतलो. ¹¹ ताहा देखा तिही एक बाय आथी जियुल कमजोर केअनारो पुतडो लागीन आठरा वोरेहे वीइ गेहले. ती कोमबरामने वाकडी वी गेहेली इया खातोर तियुल नीट उबी नाय रेअवातली. ¹² येशुय तियुल विइन, पाही हादीन आख्यो, “ओ बायी, तु तो दु:खामने हारी वीइ गिईही. ¹³ तियाय तियुप आथ थोवतांज ती नीट उबी वी गियी आने परमेश्वरा स्तुती केरा लागी. ¹⁴ येशुय शब्बाथ दिहा-दिही तियुल हारी केयी, इयाखातोर देवलामने अधिकाऱ्यान खुबुज रोग की आली काहाका शब्बाथ दिहाल केल्ले बी काम नाय केरुला एहेडा यहुदिया नियम हाय, आने ते लोकाहान आखा लाग्या “जे सोव दिही काम केनू खातोर हाय तिया दिहयाहाम आवीन हारे विइन जाजा पेन शब्बाथ तिहयाल नाहा." ¹⁵ इ उनाइन येशुय तियान आख्यो “ओ ढोंगी माहाहा, तुमाहामने केडो बी शब्बाथ दिहाल तुमा बोयलाल नेअता फुरक्याल ओखडामने सोडीन पाआय पाजा नाहा लीइ जाता का? ¹⁶ इ बाय ता आब्राहामा पोयरी हाय देखा इयुंल सैतानाय आठरा वोरेहे बांअदी थोवली आथी. शब्बाथ दिहाल इयुल बंधनामने सोडवुनु इ काम हारो नाहा का?" ¹⁷ जाहा तियाय ए गोठ्या आख्या ताहा ते विरुध्द केनारा लाजवाय गिया आने, तियाय जे नोवाय लागे एहेंडे कामे केये ते विइन होग्गा माहा खुश वी गिया ¹⁸ फासे येशुय आख्यो “ परमेश्वरा राज्य केहेडा होस हाय? आय तियाल केल्ली गोठी आरी साराबरी किंवु? ¹⁹ तो राई एका दाणा होस, एका माहाय तो राई दाणो ली जाईन तिया मोलाम पोअयो, ताहा तो वादीन एक मोडो चाडवो वी गियो आने आकाशामने चिडे आवीन तिया डाहागीपे कोअवुरे बांधे." ²⁰ फासे येशुय बिहीरी गोठ आखा लाग्यो, "आय परमेश्वर राज्याल केल्ली गोठी आरी साराबरी किंवु? ²¹ तो खमिरा होस हाय, जो लोट नेअता बिऱ्या वस्तु फुगवा खातोर वापरूतेहे, एकी बायीय तीन मापले खमिर लोटुम टाके आने खमिराकी होंग्गो लोट फुगी गियो." ²² येशु गावाहाम आने खेड्यापाडाहामने माहाहान हाऱ्या गोठ्या हिकवुतो-हिकवुतो यरुशलेम सेहेरावेल जाहालो. ²³ ताहा एका माहाय फुच्यो, ”ओ प्रभु तारण थोडोक माहाहानुज मिली का? ²⁴ तियाय तियहान आख्यो, “हाकडा बाणामने परमेश्वरा राज्या माज जा खातोर प्रयत्न केजा, काहाका आय तुमाहान आखुहु, खुबुज माहे माज जा होदी, पेन ते नाय जाय सेकनारा. ²⁵ कोअवा मालिक उठीन बाआणो बुजी दी, ताहा तुमा बारे उबीरीइन बाआणो ठोकीन आखाहा ओ मालिक आमा खातोर बाआणो उगडी दे! ताहा तो तुमाहान आखी, तुमा काहीने हाय आय ओहखुतो नाहा. ²⁶ ताहा तुमा आखाहा, आमाहाय तो आरी बोहीन मांडो खादलो, आने पाई पीअतलो आने तु आमा गावाम आविन इ हिकवुतलो!. ²⁷ पेन तो तुमाहान आखी, आय तुमाहान आखुहु, तुमा काहीने हाय आय ओहखुतो नाहा ओ बादे खोटे कामे केअनाराहा तुमा मां इहीने दुर निंगी जो.. ²⁸ तिही रोडनु आने दात पिहीनु वेरी, जाहा तुमा आब्राहाम, इसहाक, याकोब आने बादा निरोप्याहान परमेश्वरा राज्याम व्याहा पेन तुमा बारे काडी देदेला देखायाहा. ²⁹ चारी ओरीने माहा आवीन परमेश्वर राज्याम मांडो खा बोही ³⁰ आने देखा, जे लोक पेहेला हाय ते शेवट्या वेरी आने जे शेवट्या हाय ते पेहला वेरी. ³¹ ताहा थोडाक परुशी लोक येशुय आवीन तियाल आखा लाग्या “तु इहीने निंगी जो, काहाका हेरोद राजा तुल माय टाका खातोर होदेहे." ³² येशुय तियाहान आख्यो, “ तिया कोलाल जाईन आखजा ,'वेअरा, आय आज आने हाकाल पुतडे काडेहे आने दु:ख्याहान हारे केहे पेन तिसरा दिही आय मा काम पुरो केहे. ³³ तेबी मान आज आने हाकाल नेअता पोरू दिही आगाडी जावायांज जोजे काहाका यरूशलेम सेहेरा बारे परमेश्वरा निरोप्याहान माय टाक्यों एहेंकी वेरा नाय जोजे". ³⁴ ओ यरुशलेम, ओ यरुशलेम मायुय मोकलुला परमेश्वरा निरोप्याहान तुमा डोगडाहा की ठोकताहा आन तियाहान माअय टाकताहा जेहेंकी कुकडी तियु पिलकाहान फाकडाहा तुले खुुबुज दाव तुमाहान टोलवुन मा इच्छा आथी पेन तुमा इच्छा नाय आथी. ³⁵ देखा तुमा कोअवे हुअने वी जाय, आय तुमाहान आखुहु, जावलुग “परमेश्वरा नावाकी आवनारो तो आशिर्वाद हाय एहेंकी तुमा नाय आखाहा तांवलुग आय तुमाहान किदीहीज देखानारो नाय”