¹ ओतामुज हाजारो माहा टोलवाया गिया आने जाहा माहा तियाल तो ठेपला ठेपली केअतला, ताहा पेअलो येशुय तिया चेलाहान आख्यो; “परुशी पंथा लोकाहा खमीरा बाबतीम तुमा हाचवीन रेजा, ते ढोंगी हाय. ² जो खुलो नाय वेनारी एहेडो काविज बुजलो नाहा आने मालुम नाय पोडे एहेडो कावीज दोबलो नाहा. ³ जो काय बी तुमा आंदाराम आखहा तो उजवाडाम उनायी आने जो काय बी तुमा केडाल बी कोअमे ठाकाज दुदरीन आखाहा तो मोलापे चोडीन बोंबली दी." ⁴ “ओ मा हेंगात्याहा, आय तुमाहान आखुहु, जे माहा माहाल माय टाकताहा ते फाचे कावीज नाहा की सेकता तियाहान बियाहा नाहा. ⁵ तुमा केडाहाल बिया जो जे इ आय हारकी होमजावीन आखुहु मोअला माहाल नरकाम टाकनु जियाल अधिकार हाय, तियाल विजा, हा, आय तुमाहान आखुहु, तियालुज बिजा. ⁶ पाच चिड्या बेन रुप्याहाम वेचात्याहा का नाहा? तियाहामने एकी चिडील बी परमेश्वर विहीरातो नाहा. ⁷ ओतोज नाहा पेन तियाय तुमा मुनकापेने चोटे बी गोअले हाय, बियाहा नाहा. तुमा चिड्यासे बी खुब किमती हाय. ⁸ आय तुमाहान आखुहु जो केडोमी माहु मान माहाहा हुबुंर मानी लेतो, तियाल पोयरो बी परमेश्वरा दुताहा हुबुंर मानी लेहे. ⁹ पेन जो माहु मान लोकाहा हुबुंर नाहा मानी लेतो, तियाल तो परमेश्वर दुतांहा हुबुंर मानी नाय लेनारा. ¹⁰ जो केडो बी माहु माहा पोयरा विरुध्द कांवी गोगी, तिया माफी तियाल मीली, पेन जो केडो पवित्र आत्मा विरुध्द खोटो गोगी तिया माफी तियाल नाय मिलनारी. ¹¹ जहा तुमाहाल देवलाम, आने सारकारी अधिकाऱ्याहा हुंबुर लीइ जाय ताहा तियाहा हुंबुर केहेंकी आने काय आखाहा, इया चिंता माआ क्याहा. ¹² काहाका तुमा काय गोगा जोजे तो पवित्र आत्मों जियाज टेमापे तुमाहान हिकवी.” ¹³ फासे तिही टोलवाला माहाहामने एका जाहाय येशुल आख्यो, “ओ गुरूजी, मा बाहाका मालमोला हिस्सो वाटा मा पावाहाल आखी दे.” ¹⁴ ताहा येशुय तियाल उत्तर दिईन आख्यो, “माहा मान तुमा न्याय केनारो आने मिलकुत वाटी देनारो केडाय नेम्यो? ¹⁵ आजी तियाय तियाल आख्यों, “बादी जाती लोबाहीने दुर ऱ्या खातोर हाचवीन रेजा काहाका जो केडाय बी तिया खुब मिलकती की जीवन नाहा मिलतो." ¹⁶ येशुय तियाहान एक गोठ आख्यी, “एका मातला माहा खेताम खुब हारो धान्य पाक्यो, ¹⁷ ताहा तो सोता मोनाम विचार केरा लाग्यो, "आमी आय काय किवु, काहाका मान माल थोवनु जागो नाहा? ¹⁸ फासे तो आखा लाग्यो,'आमी आय एहेंकी केअहे, मा गोदामे तोडीन मोडे बांदेहे, आने तिही आय मा अखो धान्य आने माल थोवहे. ¹⁹ फासे आय मा जीवाल आखेहे, 'ओ जीवा, तुल खुब वोरेहे पुरी ओतो खुब टेमआ खतोर मायुय खुब हारी वस्तु हेंगलावी थोवलो हाय आराम केअे, खो,पी आने मोज्या केअे. ' ²⁰ पेन परमेश्वराय तियाल आखो, 'ओ मुर्खा, आज राती तो जीव तोमेने लेवाय जाय ता तुयु जो हेंगलावली हाय तो केडा वेनारो? ²¹ जो माहु सोता खोतोर मिलकत हेंगलावी थोवेहे तो परमेश्वरा नजरूम मालदार नाहा पेने तो तिया मुर्ख माहा होस हाय." ²² ताहा येशुय तिया चेलाहान आख्यो, इया खातोर आय तुमाहान आखुहु, आपु काय खाहु, केहेकी जीवुहु आने आपु केहेडे पोतडे पोवुहु इ होग्गा चिंता नाहा क्याहा. ²³ काहाका मांडा से जीव आने पोतडाहा से शरीर वाद किमती हाय. ²⁴ कागडाहान वेअजा ते पोअते नाहा आने वाडते बी नाहा. तियाहा कोअ नाहा आने गोदामे बी नाहा, ते बी परमेश्वर तियाहान पोअहे. तुमा ता चिडाहा से कोता ते बी वाद किमती हाय! ²⁵ तेहेकीज चिंता किइन आपु जीवन आथ पोय वादावा खातोर सोकतीवान एहेंडो आपुहुम एगदो हाय का? ²⁶ इया खातोर वायहानी गोठ बी तुमाहाकी वेअती नाहा, ता बिहीरी गोठीही खातोर काहाल चिंता केअता बोहताहा? ²⁷ जोंगलुमने फुलाहान वेजा. ते केहेकी वादतेहे ते काम नाहा केअते, आने पोतडे बी नाहा हीवते तेबी आय तुमाहान आखुहु शलमोन राजाय बी तियाय राज केयो तिया टेमापे तियाहामने एका फुलाहोस बी पोतडे पोव्ये नाहा. ²⁸ जो आज हाय आने हाकाल आगी की बाली टाकतेंहे तियाल जर परमेश्वर ओते हारे पोतडे पोवावेहे, ता ओ अल्प विश्वासु माहाहा तों तुमाहान फुलासे बी हाराम हारे पोतडे नाय पोवावी का! ²⁹ आमा काय खाहु आने काय पिहु इ गोठी मोनाम विचार आने वाय बी चिंता माआ क्याहा. ³⁰ काहाका दुन्यामने माहा ए होग्गाज वस्तु होदता फिरताहा पेन तुमाहान तिया वस्तुहु गोरज हाय, इ तुमा होरगा बाहाकाल मालुम हाय. ³¹ पेन तुमा तिया राज मिलवा प्रयत्न केजा ताहा तुमाहान ए होग्गा वस्तु मिली जाय. ³² ओ मेडाहा होस वाय हानी टोली, तुमा बियाहा नाहा, काहाका तुमाहान तिया राज्य देवनु तुमा बाहाकाल हारो लाग्यों. ³³ तुमा जी मालमत्ता हाय ती गोर गरीबाहाल दान की देजा. आने जुन्या नाय वेनाऱ्या थैल्या तुमा खातोर तियार की थोवजा. तिही बांड नाहा जाय सेकता आने किडे बी नाहा खाते. ³⁴ काहाका जिही तुमा मालमत्ता हाय तिही तुमा मोन बी लागलो रीइ” ³⁵ तुमा कंबर बांदीन तियारीम रेजा आने दिवा वोलता राअ देजा. ³⁶ जे नोकर तियाहा मालिक वोराडामने केहेडीवेल आवी तिया वाट जोवता रेताहा, आने जाहा तियाहा मालिक आवीन बानो ठोकेहे ताहा तियाखातोर तुरूतुज उगडी देताहा तियाहा होस वेजा. ³⁷ जाहा मालिक आवी ताहा जे नोकर तियारीम सापडी ते आशिर्वादीत हाय. आय तुमाहान खेरोज आखुहु, तिया मालिक आवीन तिया कंबर बांदीन तियाहान मांडो खा बोहावी आने तियाहा सेवा चाकरी केरी. ³⁸ तो मालिक राती केहेंडी वेला बी आवी आने तियाल जे नोकर जागता सापडी ते आशिर्वादीत हाय. ³⁹ पेन आजी इ होमजी लेजा; इयाज टेमापे बांड आवी एहेंकी कोअमे ते मालिकाय मालुम रेअतो ता तो तिया कोअमे चोरी नाय वेरा देतो. ⁴⁰ तुमा बी तियारीम रेजा काहाका जो टेम तुमाहान मालुम नाहा तियाज टेमापे माहा पोयरो आवी जाई. ⁴¹ ताहा पेतराय आख्यो, "ओ प्रभु, ई गोठ तु आमाहानुज आखतोहो का होग्गान?" ⁴² प्रभुय आख्यो, “जिया मालिकाय तिया नोकराहान टेमापे खावनु द्या जियाल होप्योहो एहेंडो खेरो विश्वासु आने ओकलीवालो कारभारी केडो हाय?" ⁴³ तिया मालिक आवी तांवलुग जो नोकर तेहेकी काम केअतो सापडी तो आशिर्वादीत हाय. ⁴⁴ आय तुमाहान खेरीज आखुहु, मालिक तिया होग्गा मालमत्ता तियाल होपी दी. ⁴⁵ पेन मां मालिक माहार नाय आवनारो एहेंकी नोकर मोनाम विचार किइन तो थेय वेरी नेअता पुरूष वेरी तीयान ठोकतो वेरी आने खाय-पिइन मोज्या केतो रीइ. ⁴⁶ तो वाट नाय जोवनारो तिया दिह्या-दिही आने तियाल मालुम नाय तिया टेमावे तो मालिक आवी आने तियाल खुब मार दीइ आने तियाल अविश्वासी माहाहा आरी जागो दीइ. ⁴⁷ तिया मालिक मोरजी काय हाय इ होमजीन बी जिया नोकराये तियारी नाहा केयी, आने तिया मोरजी की नाहा चाल्यो, तो खुब मार खाय. ⁴⁸ पेन जियाल काविंज मालुम नाहा तियाले तिया मालिकाल नाय पोटे अेंडो काम नोकराये केअेयो तो वायज मार खाय. जियाल वाद देदलो हाय तियापने वाद मागी आने तियाल वाद होपलो हाय तियापने वाद हिसाब मागी." ⁴⁹ आय तोरतीपे आग लागवा आलहो पेन ती पेहेलाज लागली वेरी ता मान अजुन काय जोसतलो आथो? ⁵⁰ मान बाप्तिस्मो लेवनु हाय, तो लेहे तावलुग आय खुब विचाराम हाय. ⁵¹ तुमाहान केहेकी लागेहे, आय तोरतीपे शांती द्या आलोहो? ऐहेडी नाहा, आय शांती द्या नाय पेन फाटाफुट केरा आलोहो ⁵² काहाका आजने एहेंकी कोमेने पाच जाहाम विरुध्द बी जाय, तीन जाआ बेन जाहा विरुध्द आने बेन जाआ तीन जाआ विरुध्द ⁵³ बाहको पोयरा आने पोयरो बाहाका विरुध्द केरी, याहकी पोयरी आने पोयरी याहाकी विरुध्द केरी, हावडी वोवडीही आने वोवडीही हावडी विरुध्द केरी," ⁵⁴ फासे येशुय लोकाहान आख्यो, जाहा तुमान वादंलो दिही बुडलो वेलने आवता देखायेहे ताहा तुरुतुज आखताहा, आमी पाय पोडी, आने तेहेंकीज वेहे. ⁵⁵ जाहा दक्षिनावेलने वारो सुटेहे, ताहा खुब तोपी एहेंकी आाखताहा आने तेहेंकीज वेहे. ⁵⁶ ओ ढोंगी माहाहा तोरतीपे आने आकाशाम काय वेहे तो तुमा होमजी लेताहा पेन इया टेमा निशानाी काहाल नाहा होमजी सेकता? ⁵⁷ इयाखातोर काय हारो हाय तो तुमा केहेकी नाहा होमजी लेता? ⁵⁸ तु तो विरुध्द केनारा आरी अधिकाऱ्याही जातोहो ताहा वाटीपुज तिया आरी होमजी जाजा नेअता तो तुम्हान न्याय केनारा अधिकाऱ्याही लीइ जाय आने ते तुल सिपाडाहा आथाम होपी दीइ आने शिपाडा तुल जैलुम टाकी दीइ. ⁵⁹ आय तुम्हाल आखुहु तुम्हा जावलुग होग्गा पोयसा नाय पोहा तावलुग तिहीने तुम्हा सुटनारा नाहा.