¹ फासी ऐहेकी वेअयो का, तो एक जागे प्रार्थना केअेतुलो. तो पारवायो ताहा शिष्‍यमंनु एक जाये यीशुल आख्यो, “प्रभु, जेहेकी योहनाये तिया शिष्यने हिकव्यो तेहेकी तुम्हा आम्हाल प्रार्थना केअेता हिकवा" ² फासी तियाय तिहाल आख्यो, "जाहा तुम्हा प्रार्थना केअेता ताहा ऐअेकी आखा; ओ आमा स्वर्गामेनु देवबाहाका, तो नाव पवित्र मानाय आने तो राज्य आवा दे, ³ आमा रोजी मांडो तु आम्हाले दे, ⁴ आमा पापा आम्हाल माफ के काहाका आमाबी आमा गुन्हेहाराल तिया गुन्हा माफ केअहताहा आमाले परिक्षणाम लावे नाहा पेन आम्हाल खराब गोठीमेने सोडाव," ⁵ फासे यीसु ये तियाल आख्यो, "होमजीले तुमा मे ऐहडो केडो हाय जिया हेंगात्या हाय आने तो तियाय आरदी रात्री गियो आने तियाल आख्यो, "हेंगात्या, माल तिन मांडा उसना दे, ⁶ काहाका मा हेंगात्या आमीज दुरने मा कोआ आलो आने तियाले खा माये कायज नाहा हाय'. ⁷ आने तिहीह माहाय काेआमेनुज आख्यो, 'माल वोहखो केअहो नाहा! माये पेअलाज दरवाजो लागवी देदलो हाय आने मा पोयरो मा उगाम हुतले हाय. माय तुल मांडो द्या खातोर उठी नाहा सेकतो. ⁸ माय तुम्हाल आखु का, जर तो उटीन तियाल कावी द्या खातोर खटखट केहेतो वेरी ते बी तिया हेंगात्या मानीन तो नकी उठी आने तियाले जोता माडा गरज वेरी तो ता मांडा तियाल दी. ⁹ आने तियाल माय तुम्हाल आखे, मागा ताहा तुम्हाल दीइ जाई. हाेदा तिईयाले तुम्हाल सापडी आने ठोका तियाल तुम्हा केअेता उगडावी ¹⁰ काहाका जो केअडो मागे तियाल मिली जो केअडो होदे तियाल सापडी आने जो केअडो ठोकेहे तिया केअता दरवाजो उगडावी. ¹¹ तुम्हामे ऐहेडो केअडो बाहको हाय का, तुम्हा पोयराल मासो मागी ताहा तियाले हापडो दीइ? ¹² नेअता जर पोयराे हाकवो मागी ताहा केल्लो बाहको तिया पोयराल विंचु दीइ? ¹³ जाहा तुम्हा खराब हाेस तेबी तुम्हा पोयराल हारो हारो देवनु केअेता तुमान मालुम हाय, ते फासा स्वर्गामने देवबाकाय जे मागता तियाल तो कोओतो खास पवित्र आत्मा दीइ?" ¹⁴ यीशु एक पुत काडतुलो, ते मुका आथा, फासी ऐंहेकी वेयो का, जो माहव गोगीज नेय सेकतुलो तो, पुत बारे निग्या ताहा गोगा लाग्यो आने माहा टोलआम नोवाय लाग्यो. ¹⁵ पेन त्या लोकाह टोलामनु काही माहाय आख्यो का, पुता राजो बालजबुल (शैतान) या मदता की तो पुताल काडे. ¹⁶ आने थोडाये तिया परिक्षा ल्ला खातोर तियाले स्वर्गामने कावी निशनी मागा लाग्ये. ¹⁷ पेन तियाह मोनाम काय आथो तोह यीशु जाआतलो तियाल तियाये तिहान आख्यो, जि जि राज्या मे बाग पोडता तो राज्य बरबाद वीइ जाये आने जि कोआ वाम बाग पोडता तोह नाश वीइ जाहाय. ¹⁸ आने तुम्हा आखता तेहेकी जर पुताहामे फुट पोडी ता तियाह राज्य केहेकी टिकी? माय तुम्हाल फुसुहु, काहाका तुम्हा आखता का माय बालजबुला (शैतान) मदताकि पुताहान काढुहु. ¹⁹ पेन माय जर बालजबुला (शैतानाप) मदतअकी काढुतो, ता तुम्हा शिष्य केहडा मदताकह पुताहान काढुता हा? तियाले तेज तुम्हा न्याय केअरी. ²⁰ पेन माय जर देवा मदतअकी पुत काढतो ता फासी यापने स्षस्ट हाय का, देवा राज्य तुम्हा हुबुंर होवे आलो हाय. ²¹ जाहा एक ताकतवालो माहव तिया हारो साबांलेहे होग्गा शस्त्रसामग्री पोवईने रअहे ताहा तिया धनसंपती सुरक्षीत रेअ. ²² पेन ऐगो तिया केअहेता वादार ताकतवालो तियावे लढीने तिया संपती जींकी लेहे, ताहा तिया जे हत्यार आथा तियापनु तियावे विश्वास थोवलो आथे, तोह ली जाहाय आने तियाले जो जिंकलो आथो तो तिया हेगंत्यान वाटी देअे. ²³ जो मा हेगाल्यो नाहा, तो मा विरुधाम हाय आने जो मा आरी टोलो केअेतो नाहा तो उबलावी दे. ²⁴ जाहा अशुध्द आत्मा माहा शरीरामनु बारे निगे ताहा राअ खातोर सुखी जागो होदतो फिरे, पेन तियाले शांती नाहा मिलती ताहा तो आखे माये ज्या कोअवामने बारे निग्यो तिज काओमे फासो जाये. ²⁵ तोह ती कोअवाल फासो जाय ताहा तो कोअवो बारे छुड किन चोखो केअलो रेहे. ²⁶ फासी तो जाय आने तियाकेअेता वादार ताकतवार आने दुष्ट ऐहेडा सात आत्माहान ले आवेहे तेहे ति काैअवाम जाता आने ‍तिहीज रेअताहा. ताहा तिह माहा पेअला केअहता खराब हालत वी जा हाय". ²⁷ तोह ऐ गोठया आखतोलो ताहा ऐहेडो बनाव बोन्यो का, गरदीमने एक बाय मोडेने बोबलीन तिहान आख्यो, "धन्य ताह गर्भ, जियाय तोह वोजो ऊखल्यो आने धन्य ती बुजला जो तुय चुबज्यो. " ²⁸ पेन तियाय आख्यो, "जो देवावचन उनाते आने पाळते तेज खेरे धन्य हाय." ²⁹ जेहकी जेहकी माहे टोलवा लाग्या ताहा तोह आखा लाग्यो, "ई पिढी दुष्ट पिढी हाय. ति निशानी मागे आने योना निशानी शिवाय केल्लोज निशानी तियाल देवाम नेय आवे. ³⁰ काहाका जेहकी योना निनवे लोकाहा केअहता निशानी आथो तेहकी माहा पोयरा बी इया पिढी खातोर निशानी वेरी. ³¹ दक्षिनामने रानी न्यायादिह इया पिढीआरी उटी आने तियाहान चुकीम ठेरवी काहाका तीह पृथ्वी छेडापने शलमोना ज्ञान उनाया खातोर आली, आने वेअरा ई ही शलमोना केहेता बी मोडो ऐहडो एक ई हाय. ³² न्यायादिह निनवे मेने महाहा ई पिढीआरी उबी रीइन तीयील चुकीम ठरवी काहाका योना संदेश उनायन तियाहाय पश्चताप केअलो आने वेअ योनाकेअेता बी मोडो ऐहेडो ई एक हाय. ³³ केडो बी दिवो शिलगावीन तोलकोअेमे नेअते बासना थुले नाहा थोवतो, पेन कोअमे माज आवनाराने उजवाळो देखाय तियाले ठेपलापे थोवते. ³⁴ डोवो ओ तुम्हा शरीरा दिवो हाय जर तुम्हा डोवा हारा हाय तर तुम्हा शरीर बी उजवाळा की पोअलो हाय. ³⁵ पेन तेह जर खराब हाय तर तुम्हा शरीर अंधाराम हाय तियाल तुम्हामने उजवाळो अंधारो तोह नाहा का, इया काळजी लेजा. ³⁶ जर तुम्हा होग्गा शरीर उजवाळो हाय आने तियामने केल्लो बी भाग आधाराम नाहा ताहा, जेहकी दिवा उजवाळा किरणे तुल प्रकाश देते तेहकी तेंह तुल आखी रिते प्रकाशित केअरी. ³⁷ यीशुय तिया गोगनु पारव्यो ताहा परूश्याये तियाल तिहा कोअ आवीन तियाआरी मांडो खा खातोर हादयो. तोह कोअमे गियो आने तिया जागापे खा खतोर बोय गियो. ³⁸ पेन तियाये खा पेअला आथ नाहा तोव्या तोह वीइन परुश्याल खुब नोवाय लगयो. ³⁹ ताहा प्रभुय तियाल आख्यो, "तुम्हा परुशी गिलास आने ठाली बारेने साफ केअहता पेन तुम्हा माजमे लोबाकी आने दुष्टता की पोराला हाय. ⁴⁰ ओ बीन बुध्दीमाहय! जियाये बारेने बोनव्यो तियाये माजमेने नाहा बोनव्यो का? ⁴¹ पेन जो माज हाय तोह, गरीबाल दे आने फासी आखो तुम्हा केअहता शुध्द वेरी. ⁴² पेन तुम्हा परुश्याल हाय काहाका तुम्हा फुदीना, जीरो आने आखी भाजीपाला दशमाश देता. पेन तुम्हा न्याय आने देवा प्रीती ई गोठीव दुरलक्ष केअता. तुम्हा नियमाकी जीवा आने देवावे माया केहनु इया गोठीव पेअला केअरा आवश्यक हाय तिह समयाये बिहीरी गोठीवे दुरलक्ष नाहा केरा. ⁴³ तुम्हा परुशी कोओती दशवेरी, काहाका तुम्हा सभास्थानाम महत्वा जागो बोहा खातोर होदता आने बाजाराम ससाल ल्याअ पोटेहे. ⁴⁴ तुम्हा कोओती दशवेरी काहाका तुम्हा नाहा देखनारी कबरा सारखा हाय, ऐहडो कबर तियापे माहे बुलमे पाग थोवी जाता". ⁴⁵ एक नियमशास्त्रा शिक्षकाये यीशुल आख्यो, "गुरुजी, तुम्हा ऐहकी गोगता ताहा तुम्हा आमा बी अपमान केहता." ⁴⁶ ताहा यीशुय आख्यो, "नियमशास्त्रा शिक्षकाहा तुम्हा बी धीकार वेरी काहाका तुम्हा माहान वाया कोठीन वोजो तियावे उसलावता आने तोह उसलाखातोर तुम्हा ऐगीही आकडी बी तुम्हा मदत केहता नाहा. ⁴⁷ तुम्हा धीकार हाय, काहाका तुम्हाय पुर्वजाय माय टाकला संदेष्टाखातोरे तुम्हा कबर बांदता. ⁴⁸ ऐहंडो किइन तुम्हा पुर्वजाहा केअला कामाल तुम्हा समर्थन केअहता. ⁴⁹ ईया कअेता देवा ज्ञानायसुध्दा ऐंहकी आख्यो, "माये प्रेषित आने संदेष्टे तियाय मोकलावे तियामने ते काही माहाहाने मारी टाकी आने कोअताक माहाहा ते ओहखो केअे! ⁵⁰ ता, संदेष्टाहा जो रक्त जगा पेअलापासुन जो रक्तपाडलो हाय त्या बद्दल ई पिढीन दंड पोरा पाेडी. ⁵¹ होव, माय तुम्हाल खेरोखेरो आखु का हाबेला रक्तापनु देवाकोअ आने वेदी इया मे मारालो जखऱ्या इया रक्तालुग ई पिढीले जबाबदार तेराम आवी. ⁵² तुम्हा नियमाशास्त्रा शिक्षकाहा कोओती खराब दशवेरी काहाका तुम्हा ज्ञाना कुची लीइन गिया, 'तुम्हा सोता माज नाहा गिया आने जे माज जावनु कोशिश केअहतला, तियान बी जाह नाहा देदो". ⁵³ यीशु तिहीने निगी जातोलो ताहा नियमशास्त्र सेवकाय आने परूशी तिया विरोध केरा लाग्या आने तियाल बिऱ्या गोठ्या फुसा लाग्या. ⁵⁴ तोह जो गोगी तियाल शब्दाम तेरा खातोर टेपी रेहेला.