¹ फासी प्रभु ये आजी सत्तर जाहले होदीने जी जी गावामे आने जी जी ठिकाणी तोह सोता जआनरो आथो तीही बेन जाहल आगला मोकल्या. ² तियाय तिहाल आख्यो, "खेतामे खुब पिक हाय पेन मजुर थोडा हाय, याह केअहता का पिंका प्रभुये आपु में मजुर मोकले तियहाल तुम्हा प्रार्थना केअरा". ³ जा; वेअरा, आने माय तुम्हाल मेडा होसे लांडग्यां ठोली मे मोकलु ⁴ पिशवी आने झोलो आने चापले, ल्याहा नाहा आने वाटीम जाता केअहडाल सलाम केअरा नाहा. ⁵ तुम्हा केल्लाबी कोअमे जो तिही पेअला, तियाल वेअताज, ई कोअमे शांती अेहेकी आखा, ⁶ जर तीह अेगो शांत माहव वेरीता तुम्हा शांती तियावरी पेन तो नेय वेरी ता ती शांती तुम्हावे फासी आवी. ⁷ तुमा तीयाल कोअ रीने ते जी काय दी तोह तुम्हा खाता पिता रेअजा; काहाका मजुरयाने तिहा मजुरी मिला जोजे; आने कोअ कोअ फिरा नेय पोडे. ⁸ आने तुम्हा केल्ला बी गावाम जो आने तिहीने माहा तुम्हाल स्वीकारे, आने ते जे काही तुम्हाल खा दी तोज खाजा, ⁹ आने तिहाम केडो बिमार, दुखी वेरी तियाल हुधरावा आने तियाल आखा का, देवा राज्य तुम्हाव पाही आलो हाय, ¹⁰ पेन तुमाह केल्ला बी गामे जो आने तीह तुमाह स्वागत नेय केअ तर बाजारोम जायन अेहकी आखा, ¹¹ तुमा गावामने काइ बी जर आमा पागाल लागी वेरी ता अमा तुमा हुबुंर झटकी टाकताहा; ते बी ई हमजी लेजा देवा राज्य पाही आलो हाय. ¹² माय तुमाह आखु का तइ दिही सदोमाल ती गावाहायने वादारे सहन केनु होस रीअ. ¹³ "ओ खोराजिना, तुल हाय ! ओ बेथसैदा, तुल हाय! काहाका तुमामनु जि सामर्था कामो वेअते ते जर सोर आने सिदोन याम वेअते तर तियाय खोतला डिलावे टाकीन खाहामे बोयन पश्चताप की लेअते ¹⁴ इया केअहता न्यायाकाळ सोर आने सिदोन इयाले बादार ओलको पोडी. ¹⁵ ओ कफर्णुहुम, तो आकासहुग उच्चो वी जाव का? तु नरकाम लुग पोचो ¹⁶ जो शिष्या गोठ उनाय तो मा उनाय आने जो शिष्या गोठ नाकारे तो माल नकारे आने जो माल नकारे तो जीयाय माल मोकल्यो तियाल नकारे." ¹⁷ ते सत्तर लोक खुशी की फिरी आला, "आने तियाय आख्यो, प्रभु तो नावा की पुते बी आमा कबजाम वेअते!" ¹⁸ ताह तियाय तिहाल आख्यो, "मायुय शैतानाय आकासामनु विजलीसारखो पोडतो देख्यो! ¹⁹ वेअरा, माय तुमाल हाप आने विंचु याहले पागा की चुद्दअ आने दुश्मना पुरी ताकताप अधिकार दे देअलो हाय आने तुमाल केल्लीज वस्तु की लुकसान नेय वेय. ²⁰ तेबी तुम्हा खुश नाहा व्याह का दुष्टा आत्मा तुम्हा ताबाम हाय पेन या गोठी की आनंद केअरा का तुम्हा नाव स्वर्गाम लिखलो हाय". ²¹ तोतामुज पवित्र आत्मा की भरपुर वीइन खुशी की पोरायो, "हे पिता, स्वर्ग आने तोरती प्रभु माय तोह स्तुती केरु, काहाका तुयुय ऐ गोठ्या ज्ञानी आने बुध्दीमान माहा की दोबावी राखल्या हाय आने हाने पाेयरामे प्रगट केले हाय, हा, पिता काहाका तुल जो योग्य लाग्यो तो तुय केयो. ²² मा बाहाका ये होग्गा गोठ्या माखातोर दे दल्या आथ्या आने पोयरा केडो हाय ही बाहाकाशिवाय केडालुज मालुम नाहा आने पोयराशिवाय केडाअलुज बअहाको केडो हाय इज मालुम नाहा आने जो केडाले तो प्रगट केनु पाेयरा ईच्छा वेरी तर तियालुल मालुम हाय." ²³ आने शिष्यावे वोलीन तियाये तिहाल आख्यो, "तुम्हा जो वेअता तो वेनाआरा डोवा धन्य. ²⁴ माय तुम्हाल आखे का, खुब राजाय आने संदेष्टाये तुम्हा जो वेअता तोह वेअरा खातोर तिहान ईष्या वेअयी, पेन तिहान तो वेअेरअ नाहा मिल्यो आने तुम्हा जो उनाहता तो तियाय उनाया ईच्छा केयी, पेन तिहाल तोह उनाया नाहा मिल्यो." ²⁵ फासी एक नियमशास्त्र शिक्षक उबो वेयो आने तियाय यीशु परीक्षा वेरी खातोर कोशिश केयी, तियाय आख्यो, "गुरूजी, अंनतकाला जिवन मिलवाखातोर माल काय केअरा पोडी?" ²⁶ ताहा यीशुय आख्यो, "नियमशस्त्राम काय लिखलो हाय? तु तिहाम काय वाचतो?" ²⁷ तियाय आख्यो, "तुजा देव प्रभु परमेश्वर या वे पुरा अन्तकरणा की पुरा आत्मा की पुरा शक्ती की प्रीती केअे आने सोता जेहकी प्रीती राखतो तेहकी पडोसीव प्रीती केअे. ²⁸ ताहा यीशु तिहाल आख्यो, " तुय बरोबर जवाब देदो, तेहकीज केअे काहाका तु जिवो". ²⁹ पेंन तियाय बरोबर प्रश्न पुछ्यो ऐहेकी बिहीरान देखवा खातोर येशुल पुछ्यो का, "मा पडोसी केडो हाय?" ³⁰ यीशु जवाब देदो एक माहव यरूशलेम शहरामने यरीहोस निगलो आथो, आने तो बांडाअ आथाम पोडियो. तियाय तिहा पोतडे काडी लेदे आने तियाल ठोक्यो तियाय आरदो मोअलो किईन टाकीन निंगी गीया. ³¹ तोअ.ताम एक याजक तीज रस्ताम जातुलो याजकाय तियाल वेअयो, पेन तो रस्ता बीहीरी वेलेने निंगी गियो. ³² तिज रस्ताल एक लेवी ती ठिकानाआप आलो. लेवी तियाल देख्यो आने तोबी रस्तापेने ती मेरेने निंगी गियो. ³³ फासी एक शोमरोनी तिज रस्तापेने तो फिरतो तीह माहय आलो आने तियाल वीइन तियाल किईवा आली ³⁴ तो तिया हुंबुर आलो तिया जखमाप तेल आने द्राक्षरोस लागव्यो आने तियाव पाटो बाद्यो आने तियाल तिया पुरक्या (गोदडावे) बोहावीन तियाल धरमशलामे ली गियों आने तिया हारखी सेवा केयी. ³⁵ बिहीरा दिह तियाय बेन चांदी होवाया काडया आने मालकाप दे दा आने आख्यो, इया हरखी देख-बाल केजे आने तु तिया से बी वादार खोरचो केरो ता आय फासी आवे ताहा तुल दी दे". ³⁶ लुटाराने जो माहाअ मिलियो आथो, तियामने ते तियाकेअेता कोन खेरो शेजारी आथो हेअेकी तुल लागे? ³⁷ तो नियमशास्त्रा शिक्षकाय आख्यो, "जियाय तिया वे दया केली तो, "ताहा यीशु तिहाल आख्यो, "जा आने तुबी तेहेकीज केजे." ³⁸ फासी यीशु आने तिया शिष्य तिया रस्ताकी जाहाला, तो एका गावुम आला. तिही एक मार्था नावा बाई ये तिया स्वागत किइन हादयो . ³⁹ तियीले मरीया नावा एक बाई आथी, ती प्रभु पागाय बोहीन तो काय आखतुलो तो उनातली. ⁴⁰ पेन मार्था वादार कामा केअता काटाळली आथी. ती यीशुही आली आने यीशुल आख्यो, "प्रभु, मा बोयीही आखो काम माल होप्यो इया तुल चिंता नाहा का? हाती तीयील आख का माल कामअमे मदत केअ" ⁴¹ प्रभुय जवाब देदो, "मार्था,मार्था तु खुब गोठी बाराम मे खुब कच कच केअती. ⁴² पेन एकुज गोठ महत्वा हाय आने आय आखु मरीया से तियी हारो वाटो निवडयोहो. ते यी तो तियीपने काढी लेवाम आवनारो नाहा".