¹ माआ पावुहु तुमाहामने खुबुज जाआ शिक्षक व्याहा नाहा काहाक आपुहुल खुबुज मोडी शिक्षा (दौंड) वेरी इं तुमाहाल मालुम हाय. ² काहाका खुब गोठीम आपु बांदाजाआ चुकताहा केडो जाहा गोगुलाम चुकतो नेय वेरीताहा तो पुरो माआह हाय. तो आपु बादो डील काबजाम थोवा खातोर हिमंत हाय. ³ व्या आपु गोदडा मुयाम लगाम पोवताहा का, तियाय आपु उनाया जोजे. आने तियापे आपु तिया बादा यारीराल वोलवुतेहे. ⁴ उड्याबी व्या, ते ओतेहे मोडे रेतेहे आने जाहाका मोडा वाराहाकी गोचालाय जातेहे पेन तो चालवुनाऱ्या सुकनादारा मोजी रेहे एक हाना जेहे जोजे तेहे तियाल वालवा आवेहे ⁵ तिया होस जीब एक हाने अवयव हाय आने मोड्या गोठ्या केहे व्या हानी आगे कोतोहो मोडो जोंगोल सिलगावेहे ⁶ आने जीब एक आग हाय, एक खराब निती कोओ हाय. जीब इं बांदा अवयवाहाकी ऐहेकी हाय का, ती बादा शरीराल खराब केहे, सृष्टी नियमाल आग लोवेहे आने नरका की सिलगावली ऐहेडी हाय. ⁷ काहाका हरऐक जाती अनावारे ने चिडे आने डेडिपे होरकुनारे ने दोरीयाम रेनारे प्राणी काबजाम केले जातेहे, आने माआहीबी काबजाम केराम आलेहे. ⁸ पेन केडोबी माआहु आपु जीब काबजाम राखी नाहा शकते. तीयुल रेवातो नाह ने दोगो देनारी हायने, ती जिवलेनारी जेहराहाकी पोराली हाय. ⁹ आपु तियुज वापोर किईन परमेश्वार बाहाका धन्यवाद केतेहे, आने देवा रुपाहोस उबजावला माआहा तिज हाराप देहे. ¹⁰ एकुज मुयाहाकी स्तुती आने हाराप बारे निगताहा माआ पावुहु ऐअ गोठ्या ऐहेकी वेरा नाय जोजे. ¹¹ चिरफामेने ऐकुज मुयामेने मिठो पाआय ने कोडवो पाआय निगे का? ¹² मा पावुहु, अंजीर चाडो जैतुना फोल दि का? नेता दाराक्षा वेल अंजिर दि का? तेहेकीज खारा पाआयामेने मिठो पाआय निगनारो नाय ¹³ तुमाम ज्ञानी ने होमजुनारो केडो हाय? तियाय हाऱ्या वागुलापने ज्ञानीपणाम सौग्यताम आपु सोताहा हारी चाली रितीकी देखावा ¹⁴ पेन तुमा मोनाम कोडव्या मोनामेने इच्छा आने सोताहा फायदो ऐहेकी वेरी ताहा सत्या विरुद अभिमान देखावीन खोटो गोगाहा नाहा. ¹⁵ ज्ञानीपण उच्चेने आवतो आवतो नाही ते तोरतीपने, जीवधारीस सभावा ने पुथा हिने रेतेहे ¹⁶ काहका मोनामने इच्छा आने सोताहान मोडोन हाय तिही रवागावागा ने ऐकएक खोटी गोठ रेहे. ¹⁷ पेन जो ज्ञानीपणे उंचेने आवेहे तो पेअला चोखो तियाहोस शांतीशील, सहनशील रेतेहे ते दोयाकी ने हाऱ्या फोलाहाकी पोराले रेतेहे, ते भेदभाव नय केनारे निर्दोष रेतेहे ¹⁸ आने शांती केनारा खातोर नितीमत्वरुपी फल देनारो बीयारो शांतीम पोराय जाते हे.