¹ मा पावुहू गौरवाकीपोरालो प्रभु येशू ख्रिस्तावे विश्वास थोवनारे तुमा भुदभावा की वागा नाहा. ² काहाका तुमा मोंडली मे अेगोहो होना अंगठी पोवनारो हारे नोवे कोपडे पोवीन आलो आने तीही मोलाले (जुने) कोपडा मे अेगोहो मोरीव बी आलो. ³ ते हारे नावे कोपडे पोवला माहा होवे तुमा मानपानाकी वेअेता आने तियाले आखता का ईही हारा जागावे बोहो आने गोरीबाल आखताहा तु तीही उबो रेअे नेते इही माआ पागाही बोहो. ⁴ ते तुमा आपसामे भेद (जुदा) थोवता हा आने खाराब विचार केनारा (न्यायादिश) गोठ्या मुळनारा वेअेता हा के ना ? ⁵ माआ मोयाला पावहू, उनाया देवाम जमामे जे गोरीब हाय त्याहाले विश्वासामे मोठो वेरा आणे जे त्यावे प्रेम (मोया) केअता तीहाले तियाये जीयाआ वचन देदलो हाय तीया (प्रभु) राजामे वारीस वेरा निवडुले हाय का नाहा? ⁶ पेण तुमा गोरीबाने कोमी होमजुले हाय जे श्रीमंत हाय ते तुमा वोखो देखावना आणे कोर्टाम खेचीली जा ता हा कानाहा. ⁷ आने तुमाले जो हारो नाव ख्रिस्तामे मिललो हाय त्या हारा नावा आ निदा केअेता नै का? ⁸ खेराखेर, “तु जेहेकी आपु वे तेहकीज आपु शेजाऱ्या वे मोया केअ” या शास्त्रलेखा मेनी राजमान्य नियम (बादाल खेरो पोट्यो अेहेडो निमन) नियम जर तुमा पुरो केअेता वेरी तरे तुमा हारो किई रियाहा. ⁹ पेन तुमा भेदभाव थोवता वेरी ते तमा पाप केअता आने नियमशास्त्राले (वचनाले) नैय माननारे गुनेगार ठेरवाता हा ¹⁰ काहाक केडोबी माहावु पुरो नियमशास्त्र (वचन) पालेहे आनारे ऐगोहो नियम की चुकवाये लेबी तो बांदाकी गुनेगार ठेरेहे. ¹¹ काहाका आखलो हाय का सिनालो केअहो त्यायेज आख्यो का खुन केअहो नाहा! आमी तु जर सिनालो केअयो नाहा, पेन तु खुन केअलो हाय ते तु नियमशास्त्र मे उमखालनारो वेअयो. ¹² तेबी स्वतंत्रता नियमाप्रमाने जीया न्याय वेनारो हाय त्याआ आरी गोगजा आने केरा. ¹³ काहाका जीयाये दया देखावी नाहा तीया न्याय दयाकी वेनारो नाहा आने दया न्यायावे विजय मिलवेहे. ¹⁴ माआ पावुहु ऐगोहो माआहु आखतो वेरी का माआवे विश्वास हाय पेन त्याआवे जर आगतो नाहा तर त्याले काम फायदो विश्वास त्याले तारी शक्ती का? ¹⁵ जर का ऐगोहा पावुहु उगाडो वेरी आने ऐगोहो बोही उगडी वेरी आने रोज्या आने ओडचनीम वेरी. ¹⁶ आने तुमामेनी केडो त्याहीले आरी का “शांती की जा” हेकाय ल्या आने ताराय ल्या पेन डेडी केअता लागनाऱ्या गोठ्या जर तुमा पुरूवता नाहा ते काय फायदो? ¹⁷ काहाका कृतीशिवाय विश्वास निर्गोव आहे. ¹⁸ आमी केडो माआवु आखी का तुमाहामे विश्वास हाय आने माआ कृती हाय तोओ कृती शिवाय तोओ विश्वास माल देखाव आने आय माआ कृतीमेने माआ विश्वास तुले देखावे हे. ¹⁹ एकुजे देव हाये अेहेकी विश्वास अेहेकी विश्वास तु तेअेतो का? पुथे सुध्दा विश्वास तेअेतेहे आने थुरथुर कापतेहे. ²⁰ पेन मुर्ख माहावे कृती शिवाय विश्वास निरर्थक हाये ई तुले होमजा जोजे अेहेडी तोओ इच्छा हाय का. ²¹ आपु वडील अब्राहाम याये आपु पोयरो इसाहाक इयाले जाहा यज्ञवेदीवे अर्पन केअेयो ताहा तो कृती की नीतीमान ठेरव्यो नाहाका? ²² आता त्याया कृती बरोबर विश्वासाने केहेकी काम केअेयो आनी तीया कृतीमेने विश्वास पुरो वी गीयो ई तुले देखायो का? ²³ अब्राहामाये देवावे विश्वास थोव्यो आने तो तीया होवे नीतीमान गोगाये गीयो ई आखनारो शास्त्रलेख पुरो वेअेयो आने त्याले देवा हे गात्यो आखामे आलो . ²⁴ ते तुमा ई वेसेंना का केडो माहावे एक विश्वास की नाहा पेन कृतीकी नितीमान ठेरेहे. ²⁵ तहेकीज राहांब वेश्येये जाहा जासुसाने कोओमे लेदा आने बीहीरी वाटीकी मोकली देदा तेव्हा ती कृतीकी नीतीमान ठेरी नै का? ²⁶ काहाका जीया प्रमाने आत्मा शिवाय शरीर निर्जीव हाय त्याच प्रमाने कृती शिवाय विश्वास निर्जीव हाय.