¹ माआ पावुहु, तुमाहामने खुबुज जाआ शिक्षक व्याहा नाहा काहाका आपुहुल खुबुज मोडी शिक्षा (दौंड) वेअरी इ तुमाहाल मालुम हाय. ² काहाका खुब गोठीम आपु बांदाजाआ चुकताहा. केडो जाहा गोगुलाम चुकतो नेय वेअरीताहा तो पुरो माआहु हाय; तो आपु होग्गो डील काबजाम थोवा खातोर हिमंत हाय. ³ व्या, आपु घोडा मुयाम लगाम पोवताहा का, तियाय आपु उनाया जोजे; आने तियापे आपु तिया होग्गा शरीराल वोलवुतेहे. ⁴ जहाजा बी व्या, ते ओतेहे मोडे रेतेहे आने जाहाका मोडा वाराहाकी गोचालाय जातेहे, पेन तो चालवुनाऱ्या सुकना द्वारा मोर्जी रेअहे तेअहे एक हाना सुकानु द्वारा जेअहे जोजे तेअहे तियाल वालवा आवेहे. ⁵ तिया होस जीब एक हाने अवयव हाय आने मोड्या गोठ्या केअहे. व्या, हानी आगे कोतोहो मोडो जोंगोल सिलगावेहे ⁶ आने जीब एक आग हाय, एक खराब निती जोग हाय. जीब इं होग्गा अवयवाहाकी ऐहेकी हाय का, ती होग्गा शरीराल खराब केअहे, सृष्टी नियमाल आग लोगवेहे; आने नरका की सिलगावली ऐहेडी हाय. ⁷ काहाका हरऐक जाती जनावारे आने चिडे आने डेडिपे होरकुनारे आने दोरीयाम रेअनारे प्राणी, काबजाम केअले जातेहे, आने माआहीबी काबजाम केअलो हाय. ⁸ पेन केडोबी माआहु आपु जीब काबजाम राखी नाहा शकते. तीयुल रेअवातो नाहा आने दोगो देनारी हायने, ती जिवलेनारी जेहराहाकी पोराली हाय. ⁹ आपु तियुज वापोर किईन परमेश्वार बाहाका धन्यवाद केअतेहे, आने देवा रुपाहोस उबजावला माआहा तिज हाराप देहे. ¹⁰ एकुज मुयाहाकी स्तुती आने हाराप बाआरे निगताहा.माआ पावुहु ऐअ गोठ्या ऐहेकी वेअरा नाय जोजे. ¹¹ चिरफामेने ऐकुज मुयामेने मिठो पाआय आने कोडवो पाआय निंगे का? ¹² मा पावुहु, अंजीर चाडो जैतुना फोल दिअ का? नेता दाराक्षा वेल अंजिर दिअ का? तेहेकीज खारा पाआयामेने मिठो पाआय निगनारो नाय ¹³ तुमाम ज्ञानी आने होमजुनारो केडो हाय? तियाय हाऱ्या वागुलापने, ज्ञानीपणाम सौग्यताम, आपु सोताहा हारी चाली रितीकी देखावा ¹⁴ पेन तुमा मोनाम कोडव्या मोनामेने इच्छा आने सोताहा फायदो ऐहेकी वेअरी ताहा सत्या विरुद अभिमान देखावीन खोटो गोगाहा नाहा. ¹⁵ ई ज्ञानीपण उच्चेने आवतो नाही. ते तोरतीपने, जीवधारी सभावा आने पुता हिने रेअतेहे ¹⁶ काहका मोनामने इच्छा आने सोताहान मोडोपण तिही हाय तीही खागावागा आने ऐकएक खोटी गोठ रेअहे. ¹⁷ पेन जो ज्ञानीपणे उंचेने आवेहे तो पेअला चोखो, तियाहोस शांतीशील, सहनशील आने विचारशील रेअतेहे. ते दोयाकी आने हाऱ्या फोलाहाकी पोराले रेअतेहे; ते भेदभाव नाय केअनारे निर्दोष रेअतेहे ¹⁸ आने शांती केअनारा खातोर नितीमत्वरुपी फोल देनारो बीयारो शांतीम पोराय जाते हे.