¹ तुमाहामे लोडाया आने भानगुड्या किहिने आवतेहे? तुमा आवयवाम ज्या खाराब वासना हाय तीयाकी लोडाया केतेहे तियामने नाय का ? ² तुमा लोब तेअताहा पेन तुमाहाल मिलतो नाहा, तुमा मायटाकताहा आने हेवा केअताहा, पेन तुमाहाल मिलवुता आवतो नाहा, तुमा भानगड आने लोडाया केअताहा तेबी तुमाल मिलतो नाहा, काहाका तुमा मागता नाहा. ³ तुमा मागतेहे आने तुमाहाल मिलतो नाहा; काहाका तुमा खाराब वासना राखीन मागतेहे, तेहेकी आपु चैनीखातोर खोर्चो तियाहाल मागतेहे. ⁴ ई देवा आरी हारो व्यवहार नैय केअनारी पीढी! जगा आरी चालुलो काहाका देवा आरी दुष्मनी हाय इ ताआ जाता नाहा का? काहाका जो केडो जगाआरी चाला इच्छा केअहे तो देवा आरी वैअरी दुष्मनी हाय ⁵ काहा आपुमे रेअनारो पवित्र आत्मो मोना इच्छा अेहेकी शास्त्रलेख तियाम कई अर्थ नाय का, अेहेकी तुमाहाल वाटे हे का? ⁶ पेन तो खुबुज कृपा केअहे, काहाका शास्त्रलेख ऐहेकी का, “देव गोर्वो केअनाराहा विरोध केअहे, पेन नम्रहाय तियावे कृपा केअहे." ⁷ तियाहान देवा आरी ऱ्याहा आने पुताल ओडकावा, ताहा तो तुमाहायने दुर नाही पोडी ⁸ तुमा देवा पाही आवा ताहा तो तुमापाही आवी, ओ पाप्याहा, तुमा आथ चोखो केअरा; ओ बेनमोना माआहा, मोने चोखे केअरा, ⁹ दु:खी व्या, शोक क्या आने रोडा, तुमा ओहवुलो शोकाम व्ये; तुमा खुशी नाराजीम व्ये. ¹⁰ परमेश्वरा हुंबुर नोमीन ऱ्या, ताहा तो तुमाहाल उच्यो केअरी. ¹¹ पावुहु, एकबिहीरा बोद्दल खराब गोगाहा नाहा. जो पावुहु बोद्दल खाराब गोगेहे आने आपु पावुहुल दोष लागवेहे नियमशास्त्रा बोद्दल खाराब गोगतेहे आने नियमशास्त्राले दोष लागवुतो. पेन जाहा तु नियम शास्त्राल दोष लागवुयो ताहा नियम पालनारों नाहा पेन न्यायाधिश हाय. ¹² जो तारण केरुलाम आने नाश केरुलाम ताकोत हाय ऐहेडो नियमशास्त्र देनारो आने न्यायाधीश एकुज हाय ताहा शेजाऱ्याल दोष लागवुनारो तु केडो? ¹³ ओ! तुमा जो आखताहा का, “आजे नेता हाकाल आपु इ गावाल जाहु, तिही वोरोह पोय रिहु आने वेपारो किइने कामावुहु. ¹⁴ पेन हाकाल काय वेअरी इ तुमाहाल मालुम नाहा रेअतो. तुमा आयुष्य कोअती हाय? तुमा काई वाफी होस हाय; ती एक घेडी देखाही आने देखाती नाहा. ¹⁵ तिया बोद्दलाम तुमा एहेकी आखा का, “परमेश्वरा इच्छा वेअरी ताहा आपु जिवते रिहु आने ई किहु का तो किहु". ¹⁶ आमी तुमा आपु योजना अभिमान (सोताहाल मोडो होमजुलो) देखावताहा ऐहेडा प्रकार होग्गा अभिमान (सोताहाल मोडो होमजुलो) वायबार हाय ¹⁷ ताहा हारो केअरुलो होमजायनेबी जो तो केअतो नाहा तियाल तो पाप हाय.