¹ मा पावुहु, गौरवाकीपोरालो प्रभु येशु ख्रिस्तावे विश्वास थोवनारे तुमा भेदभावा की वागा नाहा. ² काहाका तुमा मोंडली मे अेगोहो होना अंगठी पोवनारो हारे नोवे पोतडे पोवीन आलो आने तीही मोलवाले (जुने) पोतडे मे अेगोहो गोरीव माहु बी आलो, ³ ते हारे नोवे पोतडे पोवला माहा होवे तुमा मानपानाकी वेअेता आने तियाले आखता का, "ईही हारा जागावे बोहो" आने गोरीबाल आखताहा "तु तीही उबो रेअे", नेते "इही माआ पागाही बोहो". ⁴ ते तुमा आपसामे भेद (जुदा) थोवता हा आने खाराब विचार केअनारा (न्यायादिश) गोठ्या न्यायाकेअनारा वेअेता हा ने? ⁵ माआ मोयाला पावहु, उनाया; देवाये जमामे जे गोरीब हाय त्याहाले विश्वासामे मोडो वेअरा आने जे त्यावे प्रीती केअता तीहाले तियाये जीयाआ वचन देदलो हाय तीया राजामे वारीस वेअरा निवडुले हाय का नाहा? ⁶ पेन तुमा गोरीबाने कोमी होमजुले हाय. जे श्रीमंत हाय ते तुमा वोहखो देखावला आने कोर्टाम खेचीली जाताहा का नाहा? ⁷ आने तुमाले जो हारो नाव ख्रिस्तामे मिललो हाय त्या हारा नावाओ निंदा केअेता नैय का? ⁸ खेराखेर, “तु जेहेकी आपु वे तेहकीज आपु शेजाऱ्या वे मोया केअ” या शास्त्रलेखा मेनी राजमान्य नियम (होग्गाल खेरो पोट्यो अेहेडो नियम ) जर तुमा पुरो केअेता वेअरी तर तुमा हारो किई रिअयाहा. ⁹ पेन तुमा भेदभाव थोवता वेअरी ता तुमा पाप केअता आने नियमशास्त्राले (वचनाले) नैय माननारे गुनेगार ठेरवाता हा. ¹⁰ काहाका केडोबी माहावु पुरो नियमशास्त्र (वचन) पालेहे आने ऐगोहो नियम की चुकवाये तेबी तो बांदाकी गुनेगार ठेरेहे. ¹¹ काहाका आखलो हाय का, " सिनालो केअहो त्यायेज आख्यो का खुन केअहो नाहा "आमी, तु जर सिनालो केअयो नाहा, पेन तु खुन केअलो हाय ता तु नियमशास्त्र मे उमखालनारो वेअयो. ¹² तेबी स्वतंत्रता नियमाप्रमाने जीया न्याय वेनारो हाय त्याआ आरी गोगजा आने केअरा. ¹³ काहाका, जीयाये दया देखावी नाहा तीया न्याय दयाकी वेअनारो नाहा आने दया न्यायावे विजय मिलवेहे. ¹⁴ माआ पावुहु, ऐगोहो माआहु आखतो वेअरी का "माआवे विश्वास हाय", पेन त्याआवे जर कृती नाहा, तर त्याले काम फायदो? विश्वास त्याले तारी शकी का? ¹⁵ जर का, ऐगोहा पावुहु उगाडो वेअरी आने ऐगोहो बोही उगडी वेअरी आने रोज्या आने ओडचनीम वेअरी. ¹⁶ आने तुमामेनी केडो त्याहीले आखी का, “शांती की जा, ई हेकायल्या आने ताराय ल्या",पेन डेंडी केअता लागनाऱ्या गोठ्या जर तुमा पुरूवता नाहा, ते काय फायदो? ¹⁷ काहाका कृतीशिवाय विश्वास निर्जीव हाय . ¹⁸ आमी, केडो माआवु आखी का, "तुमाहामे विश्वास हाय आने माआमे कृती हाय". तोओ कृती शिवाय तोओ विश्वास माल देखाव आने आय माआ कृतीमेने माआ विश्वास तुले देखावे हे. ¹⁹ एकुजे देव हाये अेहेकी विश्वास अेहेकी विश्वास तु तेअेतो का? पुते सुध्दा विश्वास तेअेतेहे आने थुरथुर कापतेहे. ²⁰ पेन मुर्ख माहावे कृती शिवाय विश्वास निरर्थक हाये, ई तुले होमजा जोजे अेहेडी तोओ इच्छा हाय का?. ²¹ आपु वडील अब्राहाम याये आपु पोयरो इसाहाक इयाले जाहा यज्ञवेदीवे अर्पन केअेयो ताहा तो कृती की नीतीमान ठेरव्यो नाहा का? ²² आमी तिया कृती आरी विश्वासाकी केहेकी काम केअेयो आनी तीया कृतीमेने विश्वास पुरो वीअ गीयो, ई तुले देखायो का? ²³ 'अब्राहामाये देवावे विश्वास थोव्यो आने तो तीया होवे नीतीमान गोगाये गीय,' ई आखनारो शास्त्रलेख पुरो वेअेयो आने त्याले देवा हेंगात्यो आखामे आलो. ²⁴ ते तुमा ई वेताहा का, केडो माहावे एक विश्वासा की नाहा, पेन कृतीकी नितीमान ठेरेहे. ²⁵ तहेकीज राहाब वेश्येये जाहा जासुसाने कोओमे लेदा आने बीहीरी वाटीकी मोकली देदा, तहा ती कृतीकी नीतीमान ठेरी नैय का? ²⁶ काहाका जीया प्रमाने आत्मा शिवाय शरीर निर्जीव हाय त्याच प्रमाने कृती शिवाय विश्वास निर्जीव हाय.