¹ आमी पेअला कराराम देवा भोक्ति केअेता काई नियम आथा आने एक पवित्रजागो आथो. पेने ते पृथ्वीपुजे आथो ² काहाका मंडपामेने खोल्या तियार केल्या आथ्या, बाहेरी खोलीने पवित्रजागो ऐहेकी आखते. तियामे दिव्या चाडवो, मेज आने समर्पित मांडो आथो. ³ आने बिहीरा पोडदा फासाडी एक मंडप आथो, तियाले परमपवित्रस्थान आखते. ⁴ तियाम लबान (ऊद) बालाखतोर होनाआ धूपदाणी (धूप पात्र) वासनो आने पुरो होनावाय मोडावलो करारा कोष लाकडा पेटी आथी. तिया कोषाम एक होना बासनाम मानना (मांडो) आथो, तेहेकी कळ्या आलल्या आहरो नाआ लाकडी वोअ कराराआ दोगडा पाट्या आथ्या. ⁵ तिया कोषा ऊचे गौरवा करुबीन दयासत्रना सावली केअेतोले आमी एक एक किइने होमजावनु दिही नाहा. ⁶ ऐ वस्तु इया व्यवस्थेनुसार याजकलोक भोक्ति केअरा पेअला मंडपात विहीतुला. ⁷ पेन फक्त ऐखलो माहायाजके वोरसामे ऐकुजे दावे बिहीरा मंडपामे जाये, तो सोताखतोर आने लोकां आज्ञाकी वेला पापांबद्दल जो रक्त अर्पण केअेतुले, तो ल्येन्या सीवाये माजमे जातलो नेये. ⁸ इयाकी पवित्रआत्मा देखावे का, पेअलो मंडपे ऊबो हाय तावलगु परमपवित्र जागा वाट प्रकड वेली नाहा. ⁹ तो मांडवो फासला दिहामे दृष्टांन्त हाय. इया अर्थ एहेकी हाय का, देवाले देदला दाना आने तियाले बलीदान अर्पण तिया खातोर भोक्ती केअनारा विवेकभाव पुरो केअरा खातोर पुरो नाहा तो तियालो अर्पण केअते. ¹⁰ ई विदी केवळ शरीरीक गोठी खतोर मांडो आने पायी तेएकीज अलग अलग प्रकारा ऊचे ऊचे थोवलु संबंदीत हाय, ई केवळ जाऊलोग हुदरे तिया कला हुदु लागवी देदल्या हाय. ¹¹ पेन आमी ख्रिस्त ओ वेनाऱ्या हारी गोठी महायाजक बनी आलो आने खुब मोडो आने अधिक पुरू महाहा आथा कि केअये नाहा, तीया इ पृथ्वीपने नाहा, एहेडा मंडपाद्वारे. ¹² बोकडा नेता हाना पाठडा इया रक्त लिइन नाहा, पेन तिया सोताज रक्त लिइन आने तियाय सार्वकालिन छुटकारा लिइन एकुजदाव परमपवित्रस्थानाप गीयो. ¹³ काहा का बोकडा आने डोगरा ईया रक्त; तेहेकीज कालवडी खा इ अशुध्द विजाय फासे शायकी जर सरीरा शुध्दी वेअे आतो पवित्र केअे. ¹⁴ तर तियाय सार्वकालीक आत्मापेने निष्कलंक एहेकी तिया सरीराल देवाल दि देदो, तिया ख्रिस्ता रक्त तुमा विवेकभावाम बिगडुला कामापेने काहानेय शुध्द केअरी तुमा जिवता देवा सेवा केअरा खातोर? ¹⁵ ख्रिस्त इयाखातोर नवा करारा मध्यस्थ हाय का, पेअला करारासंबंधी काहा का तिया मृत्यु द्वारा जो पेअला करारा उपराधा से छुटंकारो वेरा खातोर वेयी, तिया हादयो तियान सार्वकालीक वतना वचन मिले. ¹⁶ जिही मृत्युपत्र केलो हाय तिही ते किइन थोवनारा तो मोअय गियोह, ई सिध्द वेनु जोरुरी हाय ¹⁷ काहाका मृत्युपत्र केअनारो जिवतो हाय तावलागु मृत्युपत्र ध्यानाम आवी शेकतो नाहा. ¹⁸ काहाका पेअला कराराआ स्थापना रगुताकी वेअयी नाहा. ¹⁹ काहाका नियमशास्त्राआ हेरेएक आज्ञा बाठा हुबुंर आख्यों आने मोशेय पायाआरी वासडा आने बोकडा रगुत तेकीज रेशमी पोतडा आने एजोबाआ डाग्या ई बाठो आरी लेदो; आने तो तियाय नियमशास्त्राआ पुस्तकाप आने बाठा लोकाहाप हिपडयो. ²⁰ तियाय आख्यों का, "जो करार पालाकेअता देवाय तुम्हाल आज्ञा केअली आथी तिया करारा ई रोगुत हाय". ²¹ तेहेकी तियाय मंडवाप आने भक्ती आरधाना केअता वापराम आवनारा बाठा सामानाप तो रोगुत हिपडयो. ²² खेरो वेराजाय, ते नियमशास्त्रा प्रमानाकी रोगुतु कि बाठो काय शुध्द वेअहे आने रोगुत पाडल्या सिवय पापक्षामा वेअती नाहा. ²³ काहाका होरगामने गोठ्याआ नमुनाप्रमाने आत्या ते वस्तु यज्ञाआ की शुध्द केरुली जरुरी हाय. पेन तियाआ केअता हारो जाहाको हाऱ्या यज्ञाकी होरगा गोठ्या सावली की शुध्द केअते है. ²⁴ काहाका ख्रिस्ताय माहा आथाकी केअलो पवित्रस्थानाम पाग थोवलो नाहा. ताहा तो जागो खेरी वस्तुअ फोक्त प्रतिरुप हाय. देवा हुबुंर उबी राआ खातोर सोतहा होरगाम तियाय प्रवेश केअयो. ²⁵ जेहेकी महायाजक वोराहा वोरी सोता नाहा ई रोगुत लिइन परमपवित्रस्थानाम जाथो तियाल घेडी घेडी सोता तियाल अर्पण चडुवनु नेये आथो. ²⁶ तेहेकी वेअताे तर ख्रिस्ताल जगाअ स्थापनापेने सोता अर्पण कोअता तेबी दाव केअरा पोडतो. पेन आमी युगा शेवट आपु सोता अर्पणकिइन पाप नुसाकेअता एकदाव प्रकट वेअयो. ²⁷ जिया की लोकाहाल एकुज दाव मरण आने फासला न्याय वेराकेअता नेमी थोवलो हाय, ²⁸ तेहेकीज ख्रिस्त बी, कोअतातेबी पापे उसलीन जाकेअता एकज दाव तो अर्पण वी गीयो आने तिया वाट वेनाराआ पापाकेअता नाहा तर तारणाकेअता बिहीराआ देखायो.