¹ आमा जे आखते ति गोठ एहेकी हाय का, जो स्वर्गाम देवा राज्याम हुदा वेल बोठो एहेडो महायाजक आमने मिल्यो हाय, ² तो पवित्रस्थाना आने केल्लो बी माहा बोनवुलो नाहा, ता प्रभु परमेश्वराये बोनवुलो खेरो सभामंडला सेवक हाय. ³ प्रत्येक महायाजका नेमणुक दाने आने अर्पण सादर केअरा खातोर रेअहे, हाती ईया आरी बी अर्पण केअेरा काय तेबी जरूरी हाय ⁴ जर ख्रिस्त पृथ्वीप रेअतो तर तो याजक बी बोनतो नाय काहाका तिही पेअेलागुज नियम शास्त्राप्रमाणे दाना अर्पण केअनारे आथे ⁵ ते जो काय कामे केअतेहे, ती होर्गोंमने गोठी तिया सारको आने सावली अेहेडे हाय. परमेश्वरा मंडप बोनवताला ताहा देवाय मोशेले जो हुकुम देदली, तेहकीज ई सेवा हाय, काहाका देवाय आखेहे, “तुल डोगुपे माय जो नमुनो देखाव्लो तिया आखला होस हरेएक गोठ केअ ” ⁶ पेन आमी जो करारा मध्य ख्रिस्त हाय तो खुब हाऱ्या अभिवचना स्थापित हाय, तो जोअतो अधिक हारो हाय, ति प्रकारे खुब हारी सेवा तियाल मिली. ⁷ जर पुर्वी करार निर्दोष एहेकी का तिया जागाप बिहीरो करार होदनु गरज नाहा. ⁸ फासे देवाल माहाम दोष देखायो. तियाय आख्यो, परमेश्वर अेहेकी आखे हे, वेअराआ,अेहेडा दिही आवनारा हाय, जहा माय इस्त्राएलाआ कोआवे आने यहुदा कोआवे इयाआरी नोवो वायदो केअहे . ⁹ जेहेकी माय तिया डाया आरी केअलो तेहेकी ओ करार रेअ नाय. ती दिही माय तियाआथ तिइन मिसर देशांमने बारे लिइ आलो, ते माआंरी केल्ला कराराम विश्वासु रिअये नाहा, तीया खातोर माय तियान लक्ष देदो नाहा; एहेकी प्रभु आखे. ¹⁰ ती तिया हीने माय इस्त्राएल लोका आरी एहेडो करार केअेतो; तो हा माय मा नियम तिया मोनाम थोविन, तिया हृदयांप तो लीखे, माय तिया देव वेअेहे ,ते मा माही वेअरी. ¹¹ तुमा परमेश्वराल ओहखा एहकी एकदा माहाय तिया पाहील्या तियाल आपु पाहुल आखनु गरज पोडे नाय, काहाका तियाआरी नाहापने मोडा लुग होग्गा माही मान ओहखी. ¹² काहाका माय तिया खराब कामा बोद्दल दोयावालो वीअ जाअे. आने तिया पापे माय तिया फासे याद केनआरोज नाहा . ¹³ इया करारात नोविन करार आखी पेअलो करार जुनो आखाम आलो. आने जुनो आने परवाय जनआरो हाय, नाय एहेडो वेअेतो आलो हाय.