¹ ओ मालकीसदेक शालेमा राजओ तो होगाज (बादाज) देवा याजक आथो. अब्राहाम राजाले हारवीन फसो अवतलो ताहा मलकीसदेक तीयाले मिलियो. मलकीसदेकाय तियाले आर्शिवाद देदो. ² आने अब्राहाम आपु आख्खी वस्तु दाहावो भाग मलकीसदेकाले देदो. मलकीसदेका नावा अर्थ “नितीमत्त्वा राजो” तीयालुजे शालेमा राजो आथो तीया अर्थ “शांती राजो” एहकी आथो. ³ मालकीसदेका याहकी बाहको नेते तिया ढाये, तियाह जल्मो नेता मरणा लीखलो मिलतो नाहा. देवा पोयरो होस तो मेल खतलो तिया करानसे सर्वाकाला खातोर याजक रेनारो हाय. ⁴ इया पेने तुमा मोनाम लिया, मलकीसदेक कोअतो माहान माहु आथो! मुल माहु अब्राहम ईयाय शुद्धा आपुम लुटीमने दहावो भाग (देशांश) तियाल देदो. ⁵ आने लेवी पोयरामेने जो याजका पद लेहे तिया मोशा नियमशास्त्रा आज्ञे प्रमाणे इस्त्राइलाई माहापने याने अब्राहमापने जल्मो लेदलो आपु पाहुपने, नियम शास्त्राताप्रमाने दशांश ठोलवा. ⁶ मलकीसदेक लेव्या पीढीमेने नेये आथो, तेबी तीयये अब्राहमापने दशांश लेदलो आने जीयाले देवा पेन अभिवचन मिल्लो आथो, तियाल (अब्राहामाला) तियाये आर्शीवाद देदो. ⁷ तीयामे किल्लीजे गोठी शंगा नाहा का, हारोमाहु कनिष्ठाले आर्शीवाद देहे. ⁸ एक गी गोठी याने जो माहु मोअय तो दंशामाश टोलो केरेहे, पेन बीहीरी गोठी याने मलकीसदेक बारेमे, पवित्र शास्त्राम लिखलो हाय तीया प्रमाणे दंशमांश ऐहडा माहाये टोल्याव्या का जो आजीबी जीवतो हाय. ⁹ ऐगो ऐहकी आखी शेके का, लेवी जो दंशमाश अब्राहमा द्वारे मलकीसदेकाले दंशमांश देदवे. ¹⁰ कहाका जाहा मलकीसदेका अब्राहमाले मिल्लो ताहा लेवी याने तिया डाया अब्राहामा शरीराम तीयामुज आथो. ¹¹ लेवी पिडी याजकी पध्दती की माहान नीयमशास्त्र देदे. पेन ती रितीकी याजकी पध्दती की माही धार्मिकदृष्ट्या परिपुर्ण वी नाय सेकते. तीहाल आजी एक याजका जरुरत आथी. तो अहरोनाहोस नाहा पेन मलकिसदेका होस जोजे. ¹² काहाका जाहा याजक बदले तहा नियमशास्त्र बी बोदला ता. ¹³ काहाका ऐ आख्या गोठ्या जीयाबद्दल आखल्या हाय तो, लेवी पीढी से बी बीहरी पीढी हाय आने तिया (लेवी) पीढीमने केडायज वेदी पाही याजकी सेवा केली नाहा. ¹⁴ इ खेरो हाय का, आमा प्रभु यहुदा वंशामने आथो आने इ पिढी संबधी याजकपना बद्दल मोशेय कायेज आख्यो नाहा. ¹⁵ आने जाहा ईया बीहीरा प्रकारा नवो याजक मलकिसदेकोहोस आवे हे ताहा अेज गोठीया आजी हरकी हमजी शकतेअे . ¹⁶ मानवी नियमशास्त्रा हुकुमाम तियाल याजक बोनवाम आलो नाय तर आशा जीवना सामार्थ्या आधारे तियाल बोनवाम आलो. ¹⁷ काहाका इयाजद्वारे तियाबद्दल शास्त्रवचन साक्षी देते “तु मलकी सदेकाहोस युगानुयुगा खातोर याजक हाय” ¹⁸ जुनो करार अलग थोवाम आल्लो, काहाका तो दुर्बल आने काय उपयोगी नाहा हाय . ¹⁹ काहाका नियमशास्त्राअ केल्लीज गोठ पुरी नाहा वेयी आने आमि खुब हारी आशा आम्हाल द्या आली, तिया खातोर आमा देवा पाही आवते. ²⁰ इ आखाज खास हाय का देवाय येशुल बी मुख्य याजक केअेरा खातोर शपथी शिवाय केयो नाहा. ²¹ जहा बिहीरान याजक बोनवाम आलो ताहा ते शपथ आखीन याजक बोनले हाय पेन येशु जहा याजक बोन्यो, ताहा तो शपथ लीयेन बोन्यो. जियाय तियाले आख्यो का 'प्रभुय शपथ लेदली हाय आने तो मोन बदलनारो नाहा, तु कायम युगानुयुगा याजक हाय. ²² इया अर्थ एहकी का, येशु खुब हारा करारा खात्री हाय. ²³ तेहकीज, तिही खुब मोडा याजक बी आथा. पेन ते मरणामुळे याजक पद चालबी सेक्यो नाहा. ²⁴ तिया याजकपद कायमा हाय, काहा का तो युगानयुग रेहे. ²⁵ तिहाल, जो केडो तिया द्वारा देवा पाही आवे तियान तो अनंतकाळा खातोर सामर्थ हाय काहाका तिया खातोर मध्यस्थी केरा तो सर्देव जिवतो हाय. ²⁶ तिहाल इहडोज महायाजक आपुन जोजे तोज येाग्य हाय, तो पवित्र, निष्कपट आने निष्कलंक हाय, दोषीनाहा आने शुध्द हाय, तो पापा हीनी दुर हाय. तियाल वादलासे बी उंच केले हाय. ²⁷ जो मुख्य याजक पहिलीदा तिया सोता पापा खातोर आने फासे माहा पापांखातोर जेहकी अर्पण केअेहे तेहकी तियाल केअेरुला गरज नाहा. तियाय जाहा सोताल अर्पण केअये तिया वेली एक दआ आने कायम खातोर अर्पण चाडवुलो हाय. ²⁸ काहाका नियमशास्त्र माहा कंजोरी लीदे माहा मुख्य याजक हाय अेहकी नेमणुक केअेहे. पेन नियमशास्त्रा फासे शपथु वचन “ युगान युग” बोनवाम आलो तिया खातोर देवा पोयरो ओ अनंतकाळा खातोर (जालामजुगर) पुरोपुरो वेलो एहटो मुख्य हाजक वेअयो .