¹ काहाका आपु ख्रिस्ता बारामे पेअला बाबी बारामे गोगता रेऊला सोडी दिईन आने प्रोढतेप्रत जाहु. फासे एकवार देवापेने विश्वास निर्जीव पेअेला जीवना पश्चाताप, ² बाप्तिस्म्या, मुनकापे आथ थोवलाम, मोलाहा पुनरूस्थान आने सार्वकालीन न्याय निवाडो हीकवलो, इया मुलभुत गोठी ही पायो आपु फासे बोनवुलो नाये. ³ देव वेअरा दी ताहा ई आपु किहु. ⁴ काहाका जीयान एकदाव प्रकाश मिलयो, जीयाय होरर्गीय दाना अनुभव लेदलो हाय आने जे पवित्र आत्मा भागीदारी वेला हाय, ⁵ आने जीयाय देवा वचना आने आवनाऱ्या जुगा सामर्थ्या चोव लेदली हाय. ⁶ तीया फासे ख्रिस्ता पासुन जाहा ते दूर गये ताहा तियाने पश्चतापा होवे वोलुला जाय शकते नाहा , काहाका तीया सोताहा नुकसान केअेता ते देवा पोयराल फासे क्रूसखांबावे खिलाता आने माहा खराब कामा हुबुंर तियाल लावतांहा. ⁷ काहाका जी जमीन घेडीघेडी पोडनाऱ्या पाया पाई पिये आने ज्या माहा होवेने जो पोअतेहे तीया वाटो धान्य ऊगवेहे तियुल देवा होवेने आशिर्वाद मिले हे. ⁸ पेन जी जमीन काटे उगावे हे ती काय कामु नाहा तीयुल शाप मिलुला बीख रेहे तियु आगी की नाश वेहे. ⁹ मा पावुलाहा, आमु तुमान इया गोठ्या आखी रीया हा, पेन आमा खेरोखार तुमापने खुप हारो केअरा आशा केअता हा. आमाहान ऐहडी खात्री हाय का, जे तारण हाऱ्या गोठ्या हाय ते तुमा केअराहा. ¹⁰ काहाका तुमाय केल्ली पवित्र जाहा सेवा, तिया सेवामे तुमा देखावलो सातत्य, तुमाय केअेलो काम, माहा वरगवी की मदद केई आने तुमाय तिया नावापे केल्ली प्रीती इ आखो विहराय जाय अेहडो देव अन्यायी नाहा. ¹¹ पेन आमा ऐहडी इच्छा हाय का, तुमा आशा पुरी वेअ आने तिया पुरी खातरी वेराखातोर तुमनने होग्गाय सेल्ले लोग कामुम अेहडीज लागनी देखावा. ¹² आमान ऐहडो वाटे का, तुमा आल्याहा बोना नाहा, आने जे माहे विश्वासावाय, वोअ धीरावाय देवाय देदलली अभिवचना वारसा मिलवुताहा ऐहडा माहा अनुकरण केअनारे तुमा बोना जोजे . ¹³ जाहा देवाय आब्राहामाल वचन देदो, ताहा तीयाकेअेता केडो मोडो नाहा तीयाकी देवाय सोताहा नावा शपथ लेदी . ¹⁴ आने तीयाय एहकी आख्यो का, "माय तुल खुब आशिर्वाद देहे" आने ''माय तो वंशजाहा मोड्यो रीतीकी बहुगुणित केहे.'' ¹⁵ तीयाल हिम्मत की वाट वेया फासे देवाय जो वचन तीयाय देदलो तो पुरो वेयो. ¹⁶ लोक, किदी बी शपथ लेताहा ताहा तीयाकेअेता जो मोडो रेहे तीया नावाकी शपथ लेता हा काहाका शपथ ई सत्या खात्री होमजावी देऊला आखा वादा शेवटी केरुला ईया वाटो रेहे. ¹⁷ आपु योजेने किदीही नाय बोदलुनारा स्वरुप वचना वारसदारान होमजाहा जोजे ऐहकी देवा इच्छा हाय. तीयाय लेदली शपथ द्वारे इया बाबतीम हमी देदी. ¹⁸ देवाय ऐहकी केयो काहाका ज्या विषयी खोटो केरुला देवा वाटो अशक्य हाय एहड्या बेन नाय बोदलुनाऱ्या गोठी मुळे जे आपु आश्रया वाटो निग्या हा, त्या आपुन त्या आशे संबधाकी खुबुज उत्तेजन मीला जोजे. ¹⁹ आमा खतोर आशा काय मजबुज, सुरक्षित ऐहडा नांगरा होस आत्माल हाय आने ई आशा परमेश्वरा कोआ पडधा पाचलाने माजमे प्रवेश केहे. ²⁰ तीही आमा आगला दोवडुतो येशु आमा खतोर माजमे गेहलो हाय. तो मलकीसदेका प्रमाणे युगानुयुगा खतोर महायाजक बोनलो हाय.