अध्याय १०
1
आगला वेअनाऱ्या गोठया हाय, तियाहा नियमशास्त्राम छाया हाय, पेन तिया खेरो स्वरूप नाहा, तियाहाल ते दरवोअरीही देवाल चोडवुताहा त्याज ज्याज अर्पनाहाकी जागे आवा वेअताहा तियाहान पुरो वेरा खातोर किदीहीज समर्थ नाहा,
2
जर नियमशास्त्र माअहान पुर्ण केअतो ता यज्ञ अर्पन केअनु बोन्द नाय वि जातो का? काहाका सेवा केअनारा सादाखातोर शुध्द वि जाता, आने मोनाम पापा भावना नाय रिइन ते दोषी नाय ठेरता,
3
पेन त्या यज्ञाहाकी दरवोरिही ति पापाहा इत आवती रेअहे,
4
काहाका डोगरा आने बोकडा रेगताहाकी पाप दुर विजाअय एहकी शक्य नाहा,
5
जाहा येशु देव इया दुनियाम आलो, ताहा तियाय परमेश्वर बाहाकाल आख्यो, बलिदान आने भेट इया तुयुय इच्छा नाहा केअयी, पेन मा खातोर एक शरीर तियार केअयो,
6
होमार्पणांकी आने पापा बद्दल अर्पनाहांकी तुल खुषी नाहा मिली
7
इयाखातोर मायुय आख्यो, हे देवा पवित्र शास्त्राम मा बोद्दल निखी थोवालो हाय, तियाहाल तो इच्छेनुसार केअरा आय आलो हो",
8
उचें तियाय आखलो हाय तिया प्रमाणे, नियमशास्त्रानुसार इ अर्पणे केअेरूलाम आवतेहे तेबी बलीदान भेट होमार्पणे आने पापा बोद्दल देदले अर्पने इयाहा तुल इच्छा नाय आथी आने तियाहांकी तुल खुषी बी नाय वेअतली,
9
फासी तियाय आख्यो, हा माय हाय तो इच्छा पुरी केअेरा खातोर माय आल्लो हाय, बिहीराल तिही बोहावा खातोर तो पेअलाल तिहीने उठवी देअहे,
10
देवा इच्छेहेकी येशु ख्रिस्ता शरिरा एकदाव बलीदान वेरुलाहाकी, आपु बादे पवित्र केअरुलाम आलेहे,
11
हरेक याजक ताहा दररोज (रोज रोज ) सेवा केअताहा आने तिया खातोर पाप दूर नाहा जाता अेहकी यज्ञ तो धेडी धेडी अर्पण केअे.
12
पेन आपु पापाहां खातोर येशु ख्रिस्त सदासर्वकाळा केअता एकदावुज बलिदान वेअयोहो आने आमी तो देव बाहाका उजवी बाजुल बोठलो हाय.
13
आने त्या समयापने तिया वाट जोअवी रियेंहे का तिया वैरी तिया पागु थुलेने पिढी बोने,
14
काहाका एकुज बलिदानाहाकी सदासर्वकाळाकेअता तियाहान शुध्द केरुलाम आवी रियोहो.
15
पवित्र आत्मो बी आपनेहेन इ साक्षी देहे. पेअलीदाव तो एहकी आखेहे,
16
परमेश्वर आखेहे, "त्या दीहया फासी आय तियाहाआरी कअरार केअहे, तो ओ माय मा नियम तियाहा मोनाम टाकेहे आने ते तियाहा हृदयाप लिखेहे,"
17
आने आय तियाहा पाप आने खोटा कामाहान किदीहीज नाय इतवु,"
18
जिही इ पापा माफी वेअली हाय, तीही पापाहा खातोर अर्पने वेरा नाय जोजे,
19
तियाहाल पावुहु, येशु ख्रिस्ता रोक्ताहांकी आपुहुन परमपवित्रस्थानाम जावनु हिम्मत हाय,
20
तियाय परदामेने सोता शरीरामने आपु खातोर नोवी आने जिवती वाट तियार की देदी ही.
21
काहाका देवा कोअवा केअता आपनेहेन एक महान याजक मिल्लो हाय.
22
काहाका आपु ह्रदय खाराब विचारहाने दुर वेअराखतोर हिपडुलो आने आपु डिल हारा, पाया वाय तुविहीन तेहेकी आपु खेअरा आंतकरावाय विश्वासाआ पुरा पुरे खातरी किईन पाही जाअहु.
23
आपुहुन जी आशा हाय, तियुलुज आपु घट्ट तिइन रिऊन काहाका जियाय आपनेहेने अभिवचन देदोहो तो विश्वासु हाय.
24
आपु एक बिहिराल होमजी लिअहु प्रीतीआने हारे कामे केअरा केअता एकबिहिराल उत्तेजीत किइहु.
25
आपु कित्येका रितीहीकी एकुज जागे आवुलो नेय सोडता ऐकबिहिराल हाऱ्या गोठ्या हिकवुला, आने देवा दिही जागे आवी रियोहो इ विइन ते गोठ्या अधिकाअधिक आखा.
26
आने खेरो काय हाय इ मालुम पोडी गीयोहो तेबी आपु जानीबुझीन पाप केअते वेरी, ता पापा खातोर फासे बिहीरो बलिदान नाहा.
27
पेन जे देवाल विरोद केअतेहे तियाहा भयंकर एहेडो न्यायनिवाडाकी आने भयंकर एहेडी बालीटाकनारी आगी शिवाय बिहीरो कायुज बाकी रीइयो नाहा.
28
जो मोशे नियमशास्त्र नाकारेहे तियाहा बेन्याहा नेता तिन्याहा साक्षी आधाराहाकी केल्लीज दया नेय देखावता मरणदंड वीअ,
29
तियाहाल विचार किल्या का ते कोताहातेबी कठीन दंडा पात्र विअ, जियाहाय परमेश्वरा पोअयराल पागुहुकी चुंदयो, आने, करार ज्या रोगोताहाकी तियाल पवित्र केअयो त्या रोगोताल अपवित्र आख्यो, आने कृपे आत्मा अपमान केअयो.तो माहु कोअतो जाहकहो दंडा खतोर लायक तुमु होमजाहा?
30
काहाका तियाल जो ओअखे तो आखेहे, “बोदलो लेवनु मा आथुम हाय, माय परफेड केअहे, फासे तो एहकी आखेहे, “प्रभु आपु माअहा न्याय केरी,"
31
जिवता देवा आथुम सापडुनु कोतोहो भयानक हाय.
32
ते पेअलाऱ्या दिही इतवा, जियाम तुमाहान सुवार्ता उजवाडो मीलतोलो ताहा, दु:खा मोडा संकटाम बी स्थिर रिअया.
33
खुब दाव होग्गा हुबुंर तुमाहान अपमानीत केअये आने तुमनेहेन खाराब खाराब शब्द गोग्ये आने खुब दाव एहेडा माहाम तुमनेहेन सहभागी वेअरा पोड्या तियाहान बी एहेडीज वागनुक मिलली
34
जे जेलाम आथा तियाहा आरी तुमा दु:खाम साराबोर वेअया, आने जो तुमाहाप आथो तो तुमाहाप ने मागी लेवुलाम आलो, तेबी तुमा खुषीम आथा काहाका तुमाहाप तीयासे बी हारी आने सादान कादा टिकनारी संपत्ती हाय, इ तुमनेहेन मालुम आथों.
35
तियाहाल हिम्मत नाहा सोडाहा, तिया प्रतिफोल मोडो हाय.
36
तुमा हिम्मत तेअनु खुब गरजे हाय, काहाका जाहा देवा इच्छा तुमा पुरी किइन तियाय तुमाहान देदल्या तिया वचनाप्रमाने तुमाहान प्रतीफोल मिला जोजे,
37
पवित्र शास्त्र एहकी आखेहे; काहाका खुब कोमी टेम रियोहो “जो आवनारो हाय, तो आवी, तो वाअ नाय लागवे.
38
माअ नीतिमान माअहु विश्वासा कि जीवीई; आने जर तो फासला होरकी ता तियाखतोर माअ जीवाल खुषी नाय वेअनारीअ”
39
फासे तिया नाश वेरीई अेहडा फासला जानराआ खातोर आपु नाह; ताहा जीवाआ तारनाखातोर विश्वास थोवनाराहा मने हाय.