अध्याय ११
1
विश्वास जो आशा तेअली गोठीई भोरुसो आने नेय देखानाऱ्या गोठी खात्री एहे न्डो हाय.
2
विश्वास बाबतीम आमा आगला डायाहा साक्षी देवुलाम आली.
3
विश्वासाकी आपनेहेन होमजाहाय का, देवा शब्दाकी दुनिया बोनी, तियाल ज्या गोठ्या देखात्याहा त्या देखात्या गोठीहीपने वेअयो नाहा.
4
विश्वासाकी, हाबेलाय काईनासेबी खुब हारो बलीदान देवाल अर्पन केअलो' तियाहाकी तो नितीमान हाय एहेडो साक्षी देवुलाम आली, काहाका देवाय तिया अर्पना बाबतीम साक्षी देदी, आने तिया खातोर तो मोअय गीयो तेबी आजी बी गोगेहे.
5
हनोखाल मुत्यु अनुभव आवा नाय जोजे आखीन, तियाल विश्वासाहाकी ऊसे स्वर्गावे उसली लेवुलाम आलो; आने तो केडालुज कीही सापड्यो नाहा, काहाका तियाल स्वर्गावे ऊसे उसली लेवुलाम आलो, तीयाल स्वर्गावे उसली लेवुलाम आलो तिया पेअला तिया बोद्दल एहकी साक्षी देवुलाम आली का, तो देवाल पोटे एहेडो काम केअतलो.
6
पेन विश्वासा सिवाय तियाल खुष केअनु अशक्य हाय, काहाका जो तिया पाही आवेहे तियाय विश्वास थोवा जोजे का, तो हाय आने जो तियाल खेरा मोनाहाकी होदेहे यिताल तो प्रतीफोल देनारो हाय.
7
विश्वासाहांकी नोहाय पेअला किदीहीज नेय देखानाऱ्या एहेडी गोठी सुचना मिली तियाप्रमाणे, आदराहाकी बिख थोविन, आपु कुटंबो वाचावा खातोर विश्वासाहाकी उड्यो बोनव्यो; आने तियाहाकी तियाय दुनियाल दोषी ठरव्यों आने विश्वासाहाकी मिलनारो नितीमत्तवा तो वारस बोन्यो.
8
आब्राहामाय, विश्वासाहाकी, तियाल जो जागो वतन तियाल मिलनारो आथो तो केअहेडो हाय आने तो किही जानारो आथो तो इ बी तियाल मालुम नाय आथो तेबी तियाय आज्ञा पाली, आने निगी गियो.
9
विश्वासाहाकी, तो देशाम, जेहकी परदेशाम गोवारांहा होस रियो; आने तिज वतना देशाम तिया जोडी वारीस इसहाक आने याकोब ह्याहा आरी डेऱ्यात वस्ती किइन रेअतला.
10
काहाका, जियाल योजनारो आने बांधनारो देव हाय एहेडा नगरा आब्राहाम वाट जोवतोलो.
11
विश्वासाकीज, सारा डायी, तेबी दिही रेवनु क्षमता मिली, काहाका जियाय तियुल आखलो तियाल तियुय विश्वासा लायकी मानलो.
12
तियाहाल फोक्तो एकापनेज आने तो बी मोअलाहा होस आथो तेबी तियापने आकाशामने जोतेहे तारेहाय तियाहा होस, दारीया तोळी जोतोहो रेअको रेअहे तियाहा होस मोजता नाय आवे ओतिही संतती बोनवी देदी.
13
इ बादे विश्वासाम टिकी रिइन मोअय गिये, तियाहान वचन मिललो नाय आथो पेन तियाहाय दुरनेज विइन खुष वेअये आने तियाहाय मानी लेदो का, आपु इ पृथ्वीप पारके आने प्रवासी हाय.
14
काहाका, एहेडो जो आखेहे तो सोता देश मिलवा होदेहे इ तो देखावेहे,
15
आने खेरोज, ते ज्या देशामने निंगी आलले आथे ते ती देशा फासे विचार केअते, ता तिही फासे फिरी जावनु संधी तियाहान मिलती.
16
पेन आमी, ते इया सेबी हारी दुनिया हाती होरगा देशा इच्छा केअतेहे, इया खातोर तियाहान आपु देवा आखी ला केअता देवाल तियाहा लाज नाहा आवती, काहका तियाल तियाहा खातोर तियाय एक नगर तियार केअयोहो.
17
आब्राहामा, परिक्षा वेअली ताहा विश्वासाहाकी, इसहाका अर्पन केअलो; तियाल, जियाय वचना स्वीकार केअलो तियाय तिया एकुलतो एक पोयरो अर्पन केरा निग्लो.
18
तिया बोद्दल एहेकी आखलो आथो का, 'इसहाकाज वंशाल तुमा पोयरे आखी.'
19
तेबी देव मोअलामने बी तियाल उठवा समर्थ हाय एहकी तियाय मानलो आथो. तो तियाल तिहीने एहेकी जणू लाक्षणिक अर्थाकी ,फासे मिली गेहलो.
20
इसहाकाय, याकोबाल आने एसावाल आवानाऱ्या गोठीही बोद्दल विश्वासाहाकी, आशिर्वाद देदो.
21
याकोबाय मोअनु टेमाप योसेफा बादा पोयराहान विश्वासाहाकी, आशिर्वाद देदो आने आपु डिनकी टोकाप टेकीन पागे पाड्यो
22
योसेफ जाहा मोअनारो आथो ताहा विश्वासांकी इस्त्राएला संतानाहा निगी जावनु गोठ्या केअया आने सोअताहा आटकाहा बोद्दल आज्ञा केअयी,
23
विश्वासाहाकी, मोशे जल्मोवेअयो, ताहा तिया याहकी बाहकाय तियाल तीन मोयना दोबावी थोव्यो, काहाका पोयरो खुब बाहारी देखाहाय इ तियाहाय वेअयो आने तियाहान राजा हुकुमा नाहा बिख नाहा वाटी.
24
मोशेय, विश्वासाहाकी, तो मोडो वेअयो ताहा फारो पोयरो आखावुलासे नाहा कबुल केअयो.
25
तियाल पाप किइन तातपुरतो सुख मिली तिया केअेता देवा लोकाहाआरी दु:ख भोगनु तियाय पसंद केअयो,
26
आने ख्रिस्ताखातोर दु:ख भोगंनु इ मिसर देशा भांडारासेबी मोडो धन होमज्यो; काहाका तिया डोअवा फोल मिलवुनु होवे लागलो आथो.
27
विश्वासाहाकीज राजाआ रोगिल नाय बिअता तियाय मिसर देश सोडी देदो; काहाका जेहेकी काय नाय देखनारी गोठी तियाल देखाय रियोहो तिया होस तो पाक्को रिअयो,
28
विश्वासाहाकी तियाय वल्हाडंन आने रोगोत हिपडुनू विधी पाली, तो इया खातोर का पेअलो जोल्माल आल्लाल माअनाराय तियाहान आथ नाय लागवा जोजे.
29
विश्वासाहाकीज ते लाल समुद्रमेने एहेकी चाली गीये जेहेकी हुकाली वाटीपने आने जाहा मिसरी बी तेहेकीज केअरा गिया ताहा ते बुडी मोअया
30
विश्वासाहाकीज, ते सात दिही, यरोहो पिथडा सोमकी फिऱ्या आने पिथडो पोडी गीयो.
31
विश्वासाहाकीज राहाब वेश्या आज्ञा नेय माननाराहा आरी नाश नाहा वेअवी; काहाका तियुय शांतीहीकी हेराहान सामालीन थोव्यो.
32
आने आमी आजी जास्ती काय आखु? गिदोन बाराक शमशोन आने इफ्ताह, तेहकीज दावीद शमवेल आने संदेष्टा, याविषयी आय आखा लाग्यो ता माल टेम नाय पुरे.
33
तियाहाय विश्वासाहांकी राज्ये जिक्यो, हारे कामे केअले, वचने मिलव्ये, सिंहा मुअयें बोंद केअये.
34
तियाहाय आगी शक्ती पारवावी, तालवारी धारीहीयने वाचाय निग्ये,अशक्तपणाम शक्तीवाला वेअया, युध्दाम पराक्रमी वेअया, तियाहान बिहीरा सैन्याहान ठोकीन नाहवावी देदे.
35
केत्याहा थेयीही तीयुहु मोअलाहान, फासे जिवावीन, फासे मिल्ये. आने कोअतेहान खुब हारे पुनरुत्थान मिला खातोर आपू सुटका नाहा स्वीकार केयो, तिया खातोर तिया हाल हाल केराम आलो.
36
आजी बिहीराही निंधाकिईन आने तेकीज चापकावाय, तेहकीज बंधन वेअ, जेलुम रेहवुला अनुभव वेयो.
37
तियान दोगडाहाकी ठोक्लाम आलो, तियहान करवतिहीकी वाडीटाक्ये, तियाहान परीक्षा वेयी, तेअ तरवारिकी मोअय टाकाम आलो, आने ते दूर केअेले, दु:खावाय नाडलेले आने तरास विईन ते मेडाहा आने बोकराहा चाबडो कीई फागविन फिरे.
38
जग तियाहा लायकी नेय आथो ते जोंगलामने, डोगाहामेने, गुफामेने आने तोरतिमेने, खोडकामने फिरता रिया.
39
विश्वासाहांकीज इयाहा बोद्दल हारी साक्षी देऊलाम आली. तेबी तियाहान प्रतिज्ञा केअली वस्तु नाहा मिली.
40
काहाका तो आपुसिवाय पुरो नय वेअरा जोजो काहाका देवा नोजरीम तियासेबी हारी वस्तु आपुकेअता हाय.