अध्याय १२
1
तियाहाल, आपु ओताहा मोडा साक्षीरुपी वादलाहाकी घेरले हाय तियाहाल आपु बी होग्गा वोजो आने एहेडो ओटकावनारों पाप टाकीन, आपुहुन नेमी देदलो हाय दोवडुनु तीही बागेज दोवडुहु
2
जो विश्वासा कर्तो आने पुरो केअनारा येशु होवे आपु विइहु, तिया ती खुषी केअता जी तिया आगला आथी, लाज नाय थोवता क्रुसा दु:ख सोस्यो आने परमेश्वरा सिंहासना सिदी वेला जायन बोठोहो.
3
इया खातोर इयाप ध्यान द्या का, जियाय आपु विरोधाम पापी माहा ओतोहो विरोध सही लेदो का, तुमा निराश विइन हिंमत नाय आराय जा जोजे,
4
तुमा पापा विरुध्द चुलातला ताहा एहेकी नाहा चुलाया का तुमा रोगोत निंग्यो.
5
आने तुमाहाल पोयरो होस हिकवुल्या गोठ्या विहीराय गियाहा का? मा पोयरा प्रभु हिकवुल्या गोठी अनादर नाहा केअहो आने तियापने दोष उंगुम आवे ताहा दु:खी नाहा वेअहो.
6
काहाका जियाप परमेश्वर प्रीती केअहे तियाल तो शिक्षा केअहे आने जियाहान तो पोयरे बोनवीन जाअगे लेअहे, ती होग्गान तो शिक्षा केअहे.
7
ओ कठीन समय हाय तियाहान शिक्षा सहन केअरा. तो एहकी देखाविहे का, देव तुमाहाल पोयरा होस वागनुक देहे; काहाका एहंडो केअल्लों पोयरो हाय तियाल बाहको शिक्षा नाहा केअतो?
8
पेन जी सिक्षा बादाहान वेअता वेअरी आने तुमनेन नाय वेअती वेअरी, ता तुमा बिहीरा पोयरे हाय आने तुमा देवा खेअरे पोयरो नाहा,
9
आने दुनियामने बाहकाय आमनेहेन शिआ किइन शिस्त लागवी आने आपुहुय तिया आदर केअयो. ता आपुहुय आपु आध्यात्मीक बाहका कोतोहो तेबी प्रमानाम अधिन रिइन जिवन जिवा जोजे?
10
थोडाहा समया केअता आपु जगमेने बाहकाय खुब हारी एहंडी शिस्त लागवी. पेन देव आपुहुन आपु हारा केअता शिस्त लागवेहे, इया खातोर का तिया पवित्रपनाम आपु बी भागीदारी वेरा जोजे.
11
केअल्ली बी सीक्षा तुरूत हारी नाहा लागती,ता दु:खा लागेहे तेबी इया अनुभव मिल्योहो तियाहान आगला, नितीमत्व इ शांती प्रतीफोल देहे.
12
तियाहाल ढील्ला आथ उंचे केअरा आने तुमा कमजोर गुडगे सीधे केअरा.
13
आने आपु पागु केअता सिधो मार्ग बोनवा का, लंगडो भोटकी नाय जाय, पेन हारो विइन जाय.
14
बादा आरी मोयाहारी रेजा आने ती पवित्रता होदनाराहामने ऱ्या जिया सिवाय प्रभु केडोज नाहा विअ सकतो.
15
ध्यानाकी वेअता रेअजा एहेकी नाय वे का तुमा देवा कृपाहारी दुर वि जाहा आने एगदो कोडवो मुलो फुटीन तुमाहान दु:खे देअ केअनारो परमेश्वर देव आने पुरो नितीमाना आत्मे.
16
केडोज बी व्यभिचारी नाय राअ जोजे, आने एका समया मांडा केअता आपु मोडो पोयरो रेवनु जागो वेची देदो तेहेकी एसावा होस जागेक विचार नेय राअ जोजे इ ध्यानाम थोवजा,
17
आने तुमनेहेन मालुम हाय जाहा आशिर्वाद देवनु समय आलो ताहा तो अयोग्य मानाय गियो, तियाय रोडी रोडी आशिर्वाद मिलवा कोशिश केअयी, तेबी पश्चतापाकी तिया बाहका मोन तो बोदली नाहा सेक्यो.
18
जि डोगाहाल आथाकी आथलुता आवेहे; जो आगीहीकी सिलगुलो हाय, जो आंधारो, दु:ख आने वादुळो इयाहाकी पोरालो हाय, एहंडा पर्वता होवे तुमा आला नाहा. ता एक नोवा जागाप आलाहा,
19
आने तुरही आवाज आने गोगनारा एहेडा शब्दा तिया पाही नाहा आला, जिया उनानाराहाय रावाया केअया का,आमी मा आरी आजी गोठ्या नाहा केअरा.
20
काहाका जि आज्ञा देवाय केअली ती तीयाहान सहन नाहा वेअयी, "जर एगदा जनावराय बी पर्वताल आथल्यो तेबी तीयाल दगडझोड केअरुलाम आवा जोजे" .
21
आने तो द्दश्य ओतोहो भयंकर आथो तियाहाल मोशे आखेहे, "माय खुब बीइन" कापुहु .
22
पेन तुमा सीयोन पर्वताजागे आने जिवता देवा नगर हाती होर्गे यरुशलेम, लाखो देवदुत
23
आने ती पेअला पोयराहा साधारण सभा आने मंडळी तियाहा नावे स्वर्गाम लिखले हाय आने होग्गान न्याय केअनारो परमेश्वर देव आने पुरो केअले नीतीमाना आत्मे,
24
आने तुमा नोवा करारा मध्यस्थ येशु इया जागे आलेहे आने तुमा हिपडुलाम आल्लो रोगोताही आलेहे जो हाबेला रोगोतासेबी हारो आखेहे.
25
सावध ऱ्या, काहाका मोशे जो आखनाहीने मुअय नाहा फिरवाहा, काहाका ते लोक दुनियामने चेतावणी चेताराहीने मुअय फिरवीन बी नाय वाचाया, ता आपु होरगामने चेतावणी देनारा ख्रिस्ता हीने मुअय फिरवीन केहेकी वाचाहु,
26
ती टेमाल तिया शब्दाय तोरतीय आलवी देदी, पेन आमी तियाय इ शपथ लेदी ही का, “आने आजी एक दाव माय तोरतीज नाहा ता आकाश बी आलवेंहे.
27
“फासे एकदाव” इ गोठी अर्थ एहकी वेअहे का, ज्या गोठ्या बोनवुल्या हाय ते काडी टाकुलाम आवी. आने ज्या गोठ्या आलवुता आवत्या नाहा ते तेहकी रीअ.
28
तियाहाल आपु इ राज्य विइन कृतस विहु काहाका तो आलनारो नाहा भक्ती आने बिख थोविन परमेश्वरा एहेडी भक्ती किहु जियाहाकी तो खुष वेअहे.
29
काहाका आमा "परमेश्वरा बाली टाकनारी आग हाय,"