अध्याय १३
1
पावुहु बायुहुप प्रीती सादानकादा रेअ.
2
गोवारांहा चाकरी केअरा नाहा विहरायाहा, काहाका खुब दाव एहेकी केअरुलाहाकी देवदुताहा आदर सत्कार माअहाय केअयोहो.
3
जे जेलाम हाय तियाहान एहेकी इतवा का, जेहकी काय तुमा बी तीयाहा आरी जेलाम हाय.आय जियाहा आरी खाराब वेहवार तेअतेहे तियाहा बी एहेकी याद केअजा का तुमाज शरीर हाय.
4
होग्गाही वोराळा आदर केअरा जोजे आने फातारी निर्दोष राअ जोजे काहाका परमेश्वर सिनालो केअनाराहा आने परस्त्रीगामी माअहा न्याय केअरी.
5
आपु जिवन पोयसा लालसअने दुर थोवा आने तुमाहाप जो हाय तियामुज समाधान माना काहाका देवाय एहेकी आख्यों हो, "माय किदीहीज तुल सोडु नाय, माय किदीहीज तुल टाकु नाय".
6
तियाहाल आमा हिम्मतीहीकी आखी सकतेहे, "प्रभु मा साहाय्य केअनारो हाय, माय बियु नाय माअहे मा काय कि ली?
7
जियाय तुमनेहेन देवा वचन देदो ती डायाल तुमा इत थोवजा आने तिया जिवना चालचलणुक वेरा आने तिया विश्वासा होस तुमा बी तेहकीज केरा.
8
येशु ख्रिस्त काल, आज आने सादानकादा जिवतो हाय.
9
जाती जाती हिकवुनिहीकी बेहकाय जाहा नाहा काहाका मोना अनुग्रहाम पाक्को रेवनु हारो हाय. पेन नाय ती खावनु वस्तुकी जियाहाकी ते काम थोवतेले कायज लाभ नाय वेअयो
10
ज्या वेदीपणे मांडो खावनु अधिकारी मंडपाम सेवा केअनाराहान बी नाहा हाय, देहेडो वेदी आपुहुप हाय,
11
यहुदी मुख्य याजक जनावराहा रोगोत पवित्रस्थानाम पापाहा अर्पना केअता ली जाताहा, पेन तियाहा डिल छावणी बारे लि जायन सिलगावतेहे.
12
तियाहाल येशुय बी सोता रोगोताहाकी माहान पवित्र केअरा केअता गावा वेशी बाअरे मरणा दु:ख वेठ्यो,
13
तियाहाल आपुबी छावणी बारे जाअहु आने येशु अपमाना वाटेकरी विइहु.
14
काहाका कायम (स्थायिक) रेअनारो एहेडो नगर आपुल इही नाहा तेअबी भविष्याकालाम आवनारो जोअ नगर(शहर) हाय तियावेला आपु वेअतेहे.
15
तियाहाल तिया नाव माननारे "ओठा फोलवो एहंन्डो स्तुती बली आपु येशुद्वारे देवाल नेहमी अर्पन केअनु".
16
आने बिहीराकेअता हारो तो केअरा आने दानधर्म केअरा विहीराहा नाहा काहाका एहंन्डा अर्पनाहाकी देव खुष वेअहे.
17
आपु अधिकांऱ्या गोठ्या माना आने तिया मानीन चाला जियाहाल हिशोब देवनु रेअहे, तियाहोस तुमा जिवासंबधाहाकी ते जागरुक रेतेहे, तियाहा गोठ्या माना इया केअता का, तियाहाय तियाहा काम दु:ख कि नाहा ता आनंदाहाकी केअनु.
18
आमा खातोर प्रार्थना केअरा. आमा विवेक बुध्दी शुध्द हाय इया बोद्दल आमा खात्री हाय आने होग्गी गोठीम जो हारो हाय तेहकीज सादा हारे चालते रेजा एहेकी आमा इस्सा हाय.
19
आय तुमाहान विनंती कीअहु का, देवाय मान माहरुज तुमाहाय मोकला जोजे इया खातोर कालावाला किईन प्रार्थना केअरा.
20
जी शांती देवाय आपु मेंडा मेंडपाळाल आपु प्रभु येशु ख्रिस्त इयाल रोगोता सार्वकाला नोवा काराराद्वारे उठव्यो.
21
तिया इच्छा पुरी केरा केअता तुमाहाल हाऱ्या गोठी की साबीत केरा आने येशु ख्रिस्ताय तियाल खुश केअनारे काम आपुम केरा, तियाल सादानकदा महिमामान होवे , आमेन.
22
पावुहु, इया मायुय टुकया पेन हाऱ्या गोठया तुमाहान लिख्याहा, ते तुमा हिम्मत तिइन उनाया एहेकी आय विनंती किइहु,
23
आपु पावुहु तिमथ्थ ओ जेलामने सुटी गियोहो, जर तो माहार माअही आलो, ता जाहा आय तुमाहान मिला आवेहे ताहा तो माअही आवी,
24
तुमा बादा डाआयाहान आने बादा देवा पवित्र माहान सलाम आखा, इटलीने विश्वास थोवनारे माअहे तुमाहान सलाम आखतेहे,
25
देवा कृपा तुमा बादा आरी रेअ, आमेन.