¹ तीया केअेता देवा रेवुला जगावे प्रवेश केरा केअता देवापेने लेदलो अभिवचन आजी बी हाय आने इया केअेता तुमा मेनी केडोज तो चुकवा नाहा त्या केअेता कालजी ल्या. ² काहाका आमाले बी सुवार्ता आखाम आली हाय, जीया होस ती इस्त्रायल लोकांहाले आखाम आली आथी, पेन जो संदेश तीहाये उनाया तीयापेने त्याहाले फायदो वेअेयो नाहा काहाका तो संदेश तीहाये उनाया पेन त्याहामे विश्वासाकी लेदो नाहा. ³ जे आपु विश्वास थोवला ते पवित्र शास्त्र मे लिखला प्रमाने (होस्स ) तीया रेवुला जागावे प्रवेश केअेनारा हाय. अेहेकी देवाय आखलो हाय,“ तीया केअेता आम माआ रोगी ईहीमे अेहेडी शोपत लिईन आख्या, ते माआ रेऊला जागावे किदीजे प्रवेश केअेनारा नाहा" जगाले उबाजावुला हीने तीया काम पारवालो आथो ते बी तो अेहेकी आख्यो. ⁴ काहाका पवित्र शास्त्रा मे तो सातवा दिहा बाबत अेहेकी गोगलो हाय का, “आने सातवा दिही देवाये तीया होगा कामामेने विश्रांती लेदी." ⁵ आने फासे तोयाय आख्यो, “ते माआ रेवुला जागावे किदीजे प्रवेश केअेनारे नाहा. ⁶ जीहाले पेअल जे सुवार्ता आखामे आल्ली आथी तीयाहा विश्वास नाय आथो तीयाआ तीईयामे प्रवेश नाहा वैयो, ते बी ई खेरो हाय का, काहीक जावांहा तीया रेवुला जागावे प्रवेश वेनारो हाय. ⁷ तीयाहा केअेता देवाये फासे एक वेल नेक्की नेमली हाय त्याहाले तो “आज” ओ एक ऐहेडो दिही ठेरवोहो आने पेअेलाजे आखल्या प्रमाने ओताहा काळा नंतर तो दावीदा द्वारे अेहेकी आखे "आज, जर तुमा त्याआ आवाज उनायाहा तर आपु मोने वातडे क्याहा नाहा". ⁸ काहाका जर यहोशवा देवाये देदला रेवुला जागावे ली गेलो, ते देव बीहीरा दिहा बद्दल फासे गोगतो नाय. ⁹ काहाका देवाआ माहा केअता आजी बी रेवूलो दिही हाय. ¹⁰ काहाका जो केडो देवा रेवूलो जागा पे प्रवेश केअहे तो तीया आ सोता कामा मेने थाक मुळे हे जीया प्रमाणे देवाये त्याया कामा मेने थाक मुळुलो आथो. ¹¹ तिया केअेता तीया रेवूलो जागा वे प्रवेश केअरा केअेता आपु ये वेअतो वेरी तोअतो प्रयन्त केरुलो. ईया केअेता की, केडाबी इस्राएल लोकहा जो आज्ञा मोडले तिया होस तिया पचाला चालवुलु नाही. ¹² काहाका देवा वचन जीवतो, काम केनारो बेनी होवे धार रेहे तलवारीने बी खुबुज जाहाको चिदलो हाय,जीव,सांधा आने मज्जा यांहाने सिरकावीन आरपार जानारो आने मनामेनी विचार आने हेतु ईमा पारखुनारो हाय. ¹³ आने केल्लो बी उबजावली गोठ तीया पेनी दोबली नाहा आने जीयाये आमाले होगी गोठी हिशाब देवुलो हाय.देवा हुबुंर होग्या गोठ्या उगड्या आने स्पष्ट अेहेड्यो हाय ¹⁴ तियाल जीया केअेता का आमाले येशु देवा पोयरो ओ महान माहायाजक मिल्लो हाय आने जो होरगामे गेअलो हाय, अेहेकी जो विश्वास आपु गाजवुताहा तो सदाजे मजबुत तीईन रिईव. ¹⁵ काहाका आपुले मिल्लो माहायाजक अेहेडो नाहा, आपु कोमजोरी बाबत मदत देखावनार कमजोर हाय, पेन आपुले ऐहेडो याजक मिल्लो हाय का, जो आमा होस होग्गा प्रकारच्या मोहा मेने गीयो तेबी तो पुरापुर पापमेने दुर रियो. ¹⁶ ता हाती आपु देवाआ कृपा राजासना पाहाये हिंम्मत कीईन जाआहु. इया केअता का, आमा गोरजा वेले सहारो मिला जोजे तियाले दया आने कृपा मीला जोजे.