¹ तीया केअेता पवित्र पावुऊ, जे आने होरगा केअेता हादले ते भागीदार हाये, त्याही येशुज विचार केअेहे. तो देवाआ प्रषित आने आमा विश्वास केअेरा महायाजक हाय. ² देवा पुरो घरानामे जेहेकी मोशे देवा आरी विश्वासु आथो तेहेकी जीया देवाये त्याआले प्रषित आने महायाजक आखीन नेम्यो हो तीया आरी तो विश्वासु आथो. ³ जेहकी का कोओवा हिने कोओ बांधनाराले खुब मान रेअहे, तीया होस येशु ओ मोशेहीने खुबुज जाहाको मान पाना मे अेहेडो गोनाम आलो. ⁴ काहाका हर एक कोओ बांधनारो केडो तेबी रेहे पेन बांदो काय बी देवाय बांधलो हाय. ⁵ देवा पुरा घरानामे मोशे ओ सेवक आखीन खुबुज विश्वासु आथो. देवाआ गोठ्या आगला काळामे वेनाऱ्या आथ्या त्या विषयी त्याये लोकाले साक्षी देदी. ⁶ पेन ख्रिस्त ओ पोयरो आखीन देवा कोओ मे विश्वासु हाय, आने जर आमा आपु विश्वास आने आशा ईया अभिमान केअताहा आने धीर तेहता हा, ते आपु बी त्याआ कोअ हाये आपु कायम देवा फासला चाला जोजे. ⁷ तीया केअता पवित्र आत्मो शास्त्रामे आखे, त्याप्रमाणे “आज जर तुमा देवा आवाज उनायाहा, ⁸ ताहा आपे मोने कठीन केअरा नाहा, जीया प्रमाने इस्त्राइल लोकाहाये जोंगलामे देवा परिक्षा वेअेरा केअता देवा विरुध बंडखोरी केअयी. ⁹ जीही तुमा वाड वडीलाये माआ परिक्षा वेअेयी आने माल पारख केअरा लागव्यो ती ही त्याही चालीस वोरेहे माआ कामे वेअेये." ¹⁰ त्याकेअेता आय ईयु पिढीवे रोग की आली आने माय आख्यो, “ ईया लोकांहा अंत:करनामे (मोनामे) सादाजे चुकीचा (खाराबे) विचार आवताहा या लोकांही आमा मार्ग (वाट) कोदीज वोहोखि नाहा. ¹¹ तिया केअेता आय रोग मे शोपत लिईन आख्यो, “लोक माय देदला रेऊला जागावे किदि जे प्रवेश केअनारा नाहा". ¹² पावुहु “जिवता देवाले सोडी देवुलो ओअतो हो विश्वास नाय थोवुलो दुष्टमोन तुमाहीईमे केडा बी नेय वेरा जोजे तीया केअता सामालजा. ¹³ जावलाग, “आज ",आखलो वेळ हाय ताव लाग एक एका दिहाले एक बीहीराले होमजावीन आखा इया केअेता का तुमा हीमे केडा बी पापामे ठोगाय जायने तुमा मोने वातडे वेरा नाय जोजे. ¹⁴ काहाका जर आपु आपु पेअेलो विश्वास शेवट हुग पाक्को तेअेयो ताहाज आपु ख्रिस्ता मे वाटेकरी हाय. ¹⁵ पवित्र शास्त्रामे अेहेकी आखलो हाय “आज जाहाका तुमा आवाज उनायाहा, ताहा इस्त्रायल लोकांये देवा विरुध्द बंड केअेयो' तेहकी आपु मोने वातडे केअया नाहा." ¹⁶ जीहाये देवा आवाज उनाया पेन तीया विरूध्द बंड केअेयो ऐहेडा केडा आथा? तेज लोक नाय का, जीहाले मोशेय मिसर देशामेने बारे लीने गेलो आथो. ¹⁷ आने तो केडाने चालीस वोरेहे रोग केअेतलो आथो ते होगा तेज नाय का, जीहाये पाप केअेये आने ज्याहा मुरदे जोंगलामे पोडले आथे ¹⁸ केडा केअेता देवाये अेहडी शपथ लेदी का ते माआ रेवुला जागावे प्रवेश केनारा नाहाज? जीहाये तीया आज्ञा मुडीया तेज नाय का? ¹⁹ ईया वेअेता आपु वेअेता का, ते लोक देवा रेऊला जागापे तीयाहा ओविश्वास वाय आवी शेके नाहा.