¹ ईया केअेता का जीया सत्याकेअेता आपु उनाला हाय, तीया होवे आपु कालजी की ध्यान द्या जोजे, इया केअेता का,आपु त्या पेने भोटकाय नेय जा जोजे. ² काहाका नियमशास्त्र जो देवदुताकीने आखामे आलो तो ओतोहो प्रभावी आथो आने जर प्रत्येक आज्ञा मुडुला की आने प्रत्येक नाय मानुला कामाले योग्य ती शिक्षा वेअेहे. ³ ते आपु अहेडो महान तारणाहोवे ध्यान नाय देदो, फासे आपु शिक्षा मेनी केहेकी सुटुहु? ईया तारना पेअेली घोषना (माहीती) प्रभुय केअेयी. जीयाही प्रभु उनायाहा तीयाहापेनी ईया खात्री पोटीही ⁴ देवाय बी चिन्हा की, अद्भुत कामाकी, आने जुदा जुदा चमत्कार की, त्यायाआ साक्षीअ भर आने त्यायाआ इच्छा अनुसार पवित्र आत्माआ दाने वाटी देदेहे. ⁵ आमा जीया आगला आवी तीया जगा (दुनिया) केअता , आखता हा तीया अधिकार (सत्ता) तेहेकी देवाये देवदुताहा निवड केअेयी नाहा. ⁶ पवित्र शास्त्रामे एका जागावे अेहेकी लिखलो हाय ''माहावु अेहेडो केडो हाय का जीया चिंता तुल लागेहे? मा पोयरो केडो हाय ईया विचार तुल लगे हे? ⁷ थोडा कालाकेअेता तु त्याले देवदुताहा यने बी कोमी केअेयो हो तु त्याले गौरव आने सन्माना तीया मुकुट पोवलो हाय ⁸ तु बादो काय तीया पागा अेठा थोव्यो हो." देवाये होग्गा कामा त्याआ अधिकारा अेठा थोवुला सोडयो नाहा. पेन आमी आजलाग बाठोकाम तीया अधिकारा अेठा थोव्यो ऐअेकी आपु नोजरी मे पोडतो नाहा खरो . ⁹ पेने आपु येशुल वेअेताहा, जीयाले वायज काळा केअेता देवदुता ने बी वायज कोमी कोअेलो आथो. आमी आमा त्याले, त्याये सहन केअेला मरणा की, गौरव आने सन्मान (मानपान) यांआ मुकुट पोवला की वेअेता हा काहाका देवा कृपा की येशुये बाठा मानव जाती केअेता मरण सहन केअेयो. ¹⁰ देव जीयाये बाठ्या गोठ्या उबजाव्याहा केअेयाहा, आने जीया गौरवा भागीदार वेरा केअता खुबुज पोयरो आने पोयऱ्या लावा केअेता देवाये येशुले दुख:सहन की पुरा-पुर केईन लोकाहा तारनारो बोनव्योहो. ¹¹ जो लोकाले पवित्र केअेहे आने जीईहाले पवित्र केराम आलो हाय, ते बाठे एकुज कुटुबाआ हाये इया केअेता तो त्याहाले पावुहु आखाआ लाजवातो नाहा. ¹² तो आखेहे, आय तो ओ नावा मोठवाय माआ पावुलान आखेहे आये मोंडली हुबुंर तोओ स्तुती केखेहे. ¹³ तियाय आजी आख्यो, “आय माआ विश्वास त्यावे थोवे है." आने तो फासे आखे, ईही आय आने माआ आरी देवाय देदले पोयरे हाय. ¹⁴ काहाका पोयरा रोगोत आने माहा की बोनलो हाय ते बी तीयाहा होस्से रोगोत आने माहा वेअेयो, येशुये ईयाकेअता का ज्याआवे मरनाआ सत्ता (राज) हाय, अेहेकी येशु ख्रिस्ता मरणाकी सैताना (काल्यो पुतयाहा) पारवाव्यो. ¹⁵ आने जे लोक त्याहा बाठा आयुष्यामे (जीवनामे) धाक थोवीन त्याआ आवत्यो (दास) हाय अेहडो जीवा आथो त्याहाले सुट्टो (मुक्ता) केरावी. ¹⁶ काहाका खेरो वेअता, तो देवदुतांहा मोदात्यों नाहा, ते आब्राहामा जे वंशज हाये तीहाले तो मदत केअे ¹⁷ इयाकेअेता का देवाआ सेवामे दयालु आने विश्वासु अेहेडो महायाजक वेरा खातोर आने लोकांहा पापा केअेता प्रायश्चित केअरा केअता येशुले होग्गी गोठी मे आपु पावाहा सारखो वेअेरा खुबे गोरोज आथो. ¹⁸ काहाका जा पोड्यो केअेता येशुले सोता परिक्षामे परिशानीमे) आने वोहखो सहन केरा लाग्यो, तीया केअता जीयाहाले आमी परिक्षामे पोडी रियो त्याहाले मदत केरा केअता तो समर्थ हाय.