¹ १) यीसु उजु तीनुह एक दाखलु कोयु ।

² २) सोरगोन राज तिना राजान होस से ज्यु तेर पुरयान वियावमा खाणेन पोगात बोठाडयु । ³ ३) एने च्यु तेरा पावरोह मुकल्यु के नेवतो आपायाला पावणाहा वीयावमा हादया पुण च्या पावणा आवणे नी हुदया । ⁴ ४) फोसु च्यु दिहरा पोवरोनुह नेवतो कोयणे पावणा पाह मुकल्यु च्या पावरे जायीन पावणाहा कोयु देखु पावणायान खाणो तियार ओय गोयलो से बुयले एने मातल जोनवरे मारनेय आवला से एने आखो तियार ओय गोयलो कोरीन जोलदी वीयावोन पोगातमा आवु । ⁵ ५) पुण च्या तिदरे तिदरे कामे जाती रोया काल्ला खेतोमा एने काल्ला दोदा पोर जात रोया । ⁶ ६) एने दिहरा पावरोनुह देल्ला एने युडाकोह लाजवाडीन मार नाख्या । ⁷ ७) यी खोबोर होबिन राजाहा खुब खोत लागी ते च्यु तेर सोयनि कोनुह मुकलिन ज्या पावरोनुह मारला ओता तिनुह माराव देल्लु एने तीदरा सेहरोह होलगाडाव देल्लु । ⁸ ८) ओवतु च्यु तेर पावरोनुह हादिन कोयु वीयावोन खाणो तियार से बाकीन जिनुह मी हादलु च्या आवणेन लायक नी ओता ।

⁹ ९) कोरीन तुमु गोली गोलीमा जावु एने जोतरा बी माणहे तुमुह मी वायहे तीनु आखाह हाद लावजु । ¹⁰ १०) पावरे च्यार फाटा पोर गोया एने हाजा एने खोराब जोतरा बी मिवायला तीनु आखानुह हादया एने होटो माणहे आव्या तिनामा वीयावोन मोडप बोराय गोयलो पुण । ¹¹ ११) पुण राजा पावणानुह बावणे मायतु गोयु तेतार च्यु एक पावणाहु देख्यु ज्यु वीयावोन लुगडा नी पेरया ओता । ¹² १२) च्यु तिनाहा फुस्यु ए दुस्ती तु वीयावमा वीयावोन लुगडा पेरीन आवणु ओता बाकीन वियावोन लुगडा बीगुर तु काहा आवलु तेतार च्यु ठावकु रोयु । ¹³ १३) तेतार राजा पावरोनुह कोयु एरा आथे पाये बादीन आदारालामा नाख देवु च्याहरी यु कोलपी कोलपीन रोहे एने दाते कीकडाव्णु रोयहे ।

¹⁴ १४) काहाके बुलाडला होंटा से पुण निवावडला थुडा से । ¹⁵ १५) तेतार आखा फारीसी पोथंवाला एखठा ओयीन यीसुह केहेक वातोमा फोसाडजे कोरीन च्या होमचु कोरया। ¹⁶ १६) एने तेरा चेलाह एने सुडीन हेरोदेस राजान माणहोह यीसु पाहा मुकल्यु च्या यीसु हाते आवीन कोया ए गुरु आमु जाणतला के तु खोरु से एने बोगवानोन वातोहा माणहोह खोरो हिकाडतलु तु माणहोण पोरवाय नी कोरे एने माणहोन मुय देखीन वातु नी कोरतलु ।

¹⁷ १७) कोरीन एवी आमुह कोय तु काय सोमजतलु से कयसरोह येहुदी कायदान रिते फावु आपणु ठीक से के नी । ¹⁸ १८) पुण च्या काहा आवला च्यो यीसु जाणतोतु कोरीन ततिनुह कोयु ए डोगडावा तुमु मेहे काहा फारोकतला ।

¹⁹ १९) फावु आपतला तिनामा एक चोदीन रुपायु मेहे देखाड ऐने च्या एक रुपायु लाव्या । ²⁰ २०) यीसु कोया फुस्यु इन रुपायोपोर कुणीन सिक्कु एने कुणीन नाव सापाय रोयोहो । ²¹ २१) च्या कोया कयसरोन यीसु तिनुह कोयु ठीक से मोग जो केयसरोन से च्या केयसरोह आपु एने ज्यो बोगवानोन से च्यु बोगवानोह आपु । ²² २२) च्या यीसुन जोपाप होबीन बोगलाय गोया एने तिनाहा सुडीन जात रोया । ²³ २३) ते दिहुज सोदुकी पोथवाला माणहे मोरीन फोसा मोरलाम दोखा जीवता नी ओये एहे विचार कोरनारा यीसु हाते आवीन फुस्या ।

²⁴ २४) ए गुरु मुसा ओहलु एक नेम येहुदीन कोरता आपलु ओतु वीयाव ओयलु एक माणुह बीगुर पुरयान मोरे ते तेर रोडायली बायोर हाते तेर बायह वियाह कोरनु जुवे एने मोरनारान कोरता वारीस पोयदा कोरनु जुवे। ²⁵ २५) आमरे याहरी सात बायहे ओता तीनुमा पेल्लु बायहो वीयाव कोरयु एने बीगुर पुरयान मोर गोयु कोरीन तेर बायह रोडायली हाते वियाव कोरयु ।

²⁶ २६) इने रिते दुहोरो एने तीसरो बी कोरयु एने सात लोगोन ओहलो ओय ।

²⁷ २७) एने सेवलिवार च्यी बायी बी मोर गोयी ।

²⁸ २८) जेतार मोरला माणहे जीवता ओयहोत ते च्यी कुणीन लाडी कोवायहे काहाके च्यी सातु बी बायहोन लाडी ओती ने । ²⁹ २९) यीसु तिनुह कोयु तुमु पोवित्र पुस्तोको मा काय लेखलो च्यो बी एने बोगवानोन ताकोतोह बी नी जाणतला कोरीन तुमु इन सेहे गोलत सोमजतला ³⁰ ।३०) जेतार मोरला माणहे मोरलाम दोखा जीवता ओयहे तेतार बायी वियावमा आपाये नी मारी वीयाव कोरे नी बाकीन च्या सोरगोमा सोरगदुतोत होस रोयहेज ³¹ ३१) पुण ज्या मोनारया से च्या फोसा जीवता ओयहोत काय तुमु पोवित्र पुस्तोकोम नी वाच्या के तेर बारामा बोगवान तुमुह कोयलु की ।

³² ३२) मी आबराहाम ने बोगवान एने इसाक ने बोगवान एने याकुबोन बोगवान से च्यु मोरलाम नी पुण जीवतलान बोगवान से।

³³ ३३) यीसुन यी वात होबीन माणहे बोगलाय गोया। ³⁴ ३४) जेतार फोरीसी माणहे होंब्या यीसु सोदुकी माणहोन बुलती बोद कोर देल्लु ते च्या एखठा ओया । ³⁵ ३५) तीनु मायला एक येहुदीन नेम हिकाडनार यीसुह फारकणे कोरीन फुस्या ।

³⁶ ३६) ए गुरु मुसान नेमोमा आखा दोखु मोटलु हुकुम काल्लु से । ³⁷ ३७) यीसु तिनुह जोपाप आप्यु तु मारा पोरबु बोगवानोह तारा पुरा मोन दोखु एने पुरो जीव दोखु एने आखी ओक्कोल दोखु मोग कोरजी ।

³⁸ ३८) आखा दोखु मोटलु एने पेल्लु हुकुम युसे । ³⁹ ३९) आखा दोखु दुहरु खास हुकुम युसे के तु तार सी जारीही बी सोताह जेहे मोग कोरतलु तेहेज मोग कोरजी।

⁴⁰ ४०) मुसान आखा नेमे एने बोविस्य कोयणाराह आखा हिके इनु दयुज हुकुमोन आदारे से। ⁴¹ ४१) जेतार फारीसी पोथंवाला टुलवाय रोया ओता तेतार यीसु तिनुह फुस्यु ।

⁴² ४२) मोसीन बारामा तुमु काय विचार कोरतला च्यु कुणीन पुरयु से च्या यीसुह कोया दावुदोन गोराणान से। ⁴³ ४३) यीसु कोयु दावुद पोवित्र आत्मा मा बोरायीन तिनाहा पोरबु काहा कोयतलु ⁴⁴ ।४४) बोगवान मारा पोरबुह कोयु मार जेवडीखेर बोठ जाहातोक मी तार दुस्मन तार पायोन नेचो नी कोर देव ताहालोगोण । ⁴⁵ ४५) जोर दावुद तिनाहा पोरबु कोयलु ते मोग च्यु तेरु पुरयु केहेक बोण सोकतलु । ⁴⁶ ४६) तीदरी बुलती बोद ओय गोयी एने फोसा कुणीह बी तीनाहा काय बी सोवाल फुसणेन हिम्मोत नी ओयी ।