¹ १) जेतार यीसु एने तेर चेला येरुशलम सेहर हाते पुच्या एने बेतफागे गाव हातेल्ला जेयतुन बोयडा पोर आव लागया ते यीसु दुय चेलाह यो कोरीन मुकल्यु । २) ² पोल्लो होबो देखायहे तीन फोव्यामा जावु एने च्याहारी पुछताज एक फुरकी गोरदी रोयहे एने तेर हाते तेरो बोच्चो बी रोयहे एने तेर हाते तीनुह सुडीन मार हाते ली आवजु । ³ ३) जोर तुमुह कुण बी काय कोये ते तीनाहा एहे कोयजु पोरबु एरी जोरवुत से तेतार च्यु उतवावु तिनुह ली मुकली देहे । ⁴ ४) ज्यो बुल बोविस्य कोयणारा कोयला ओता च्यो पुरो ओये कोरीन एहे ओयलो । ⁵ ५) सीरयोण सेहरमाकोयु देख तार राजा तार हाते आवणे बाज रोयु च्यु निचोव्वु से एने गोदडा पोर बोठ रोयुह मोज गोदडीन बोच्चा पोर बोठीन आवणे बाज रोयुह । ⁶ ६) चेला जायीन यीसु जेहे कोयलु तेहेज कोरया ।

⁷ ७) गोदडी एने बोच्चाहा तीनाहाते लाव्या एने च्या तिदरा लुगडा वोच्चायोर पागराव्या एने यीसु तिना पोर बोठ गोयु । ⁸ ८) तेतार गोरदी मायला माणहे तीदरा लुगडा वाटोपोर आथरया एने दिहरी माणहे जाडोन डाव्या तुडीन वाटोपोर वेर देण्या । ⁹ ९) गोरदी मायला माणहे यीसुह ओगोव चालता जायीन एने यीसुह फोसोव फोसोव चालता जायीन आयडीन आयडीन कोयतोता दावुदोन गोराणान पुरयाह होसान्ना हाजु से च्यु ज्यु पोरबुन नावोमा आवे च्यु बारकोतिवावु से आखा दोखा उचा सोरगोमा रोयणारान होसान्ना । ¹⁰ १०) जेतार च्यु येरुसलेम सेहरोमा आव्या तेतार तिना सेहर मायला माणहे यु कुण कोरीन कोलो कोलो कोरने बाज गोया ¹¹ ।११) माणहे कोयणे बाज गोया चु गोलील जिलामा नासरत गावमा चलु बोविस्य कोयणारु यीसु से । ¹² १२) यीसु मोदीरोमा जायीन ज्या मोदीरोमा लेणु देणु कोरतोता तीनु आखानह बारथे काडणे बाज गोयु एने वोयहा ओदला टेबले कोरनारान पाटडा उलटाव देल्लु । ¹³ १३) एने तिनुह कोयु लेखलो से मारो गोर पोरथनान गोर कोवायहे पुण तुमु इनाह चुटया लिकायणेन गुफा बोणाव देल्ला ।

¹⁴ १४) ओवता आदवा एने लेगडा मोंदीरोमा तेर हाते आव्या एने च्यु तिनुह हाजा कोरयु । ¹⁵ १५) मोदिरोमा पुरया आयडीन कोया दावुदोन पुरया होसाना यो होंबीन एने यीसुन चोमत्कार देखीन बोगवानोन डायला पुजारा एने येहुदी नेम हिकाडनारा खुब खोताय गोया । ¹⁶ १६) च्या तिनाह फुस्या याकाय कोयणे बाज रोयाहा तु होबोवलु के यीसु कोयु होव काय तुमु बोगवानोन पुस्तोकोमा यो कोदी वाच्याके तु आयतला पुरया एने दुद पीणारा पुरयान मुये दोखु गुण गावाडतलु ¹⁷ १७) ओवतु च्यु तीनुह सुडीन सेहर दोखु बेतनिया गांव जात रोयु एने च्यांहरी मुक्काम रोयु । ¹⁸ १८) होदारे वेगुज च्यु फोसु सेहर जातोतु तेतार वाटे तिनाहा बुख लागी । ¹⁹ १९) यीसु सोडकोन दोडी एक उबरोन जाडोह देखीन तिनाहाते गोयु पुण पान्टा सुडीन तीनाहा कायीज नी जुडयों कोरीन जाडोह कोयु एवी दोखु तु कोदी फोव नी आपे लोगेज उबरोन जाड हुक गोयो । ²⁰ २०) यो देखीन चेला बोगलाय गोया एने च्या यीसुह फुस्या यो उबरोन जाड लोगेज केहेक हुक गोयो । ²¹ २१) एने यीसु तिनुह जोपाप आप्यु मी तुमुह खोराखोर कोयतलु जोर तुमु मोनमा सोंका बोगुर बुरहु कोरे ते तुमु इना उबरोन जाडोह ज्यो ओयो यो ओतरोज नी पुण इन बोयडाहा बी उखविन दोरीयामा पोड जा कोयहे ते ओय जाहे । ²² २२) एने फोसु बुरहु कोरीन काय बी पोरथनामा मागहे च्यो आखोज तुमुह जुड जाहे । ²³ २३) च्यु फोसु मोदीरोमा जायीन हिकाडतोतु तेतार डायला पुजारा एने येहुदीन नेम हीकाडनारा एने पुजरया तिनाहाते आविन फुस्या तु या कामे कुणीन आदीकार दोखु कोरतलु एने तोहो यो आदीकार कुण आपलो से।

²⁴ २४) यीसु तिनुह कोयु मी बी तुमुह एक वात फुसतलु जोर तिनी वातोन जोपाप आपहे तेतार मी बी तुमुह कोयतुह के याकामे मी कुणीन आदीकार दोखु कोरतलु से । ²⁵ २५) माणहोह बापतिस्मान रीत आपणे होक युहन्ना कुण आपलो बोगवान के माणहे तेतार च्या तिदरे कोयणे बाज गोया जोर आपु सोरगो मायलु बोगवान तिनाह होक आपलु कोयहु ते च्यु कोयहे ते तूमु तिनापोर काहा नी बुरहु कोरया । ²⁶ २६) पुण जोर आपु माणहे तिनाहा होक आपला कोयहु ते माणहे आपुह काय कोर देहे कोरीन च्या माणहोह बीहीतोता काहाके या आखा माणहे युहन्ना खोरु बोविस्य कोयणारु मानतला । ²⁷ २७) ओवता च्या यीसुह जोपाप आप्या आमु काय नी जाणतला तेतार यीसु कोयु मी बी तुमुह नी कोयतु या कामे मी कोणीन आदीकार दोखु कोरतलु से। ²⁸ २८) तुमु काय विचार कोरतला काल्लातोरी एक माणहोह दुय पुरया ओता च्यु पेल्ला पुरयाहाते जायीन कोयु ए पुरया आज तु दोरकस्थान वाडीमा जायीन काम कर। ²⁹ २९) च्यु कोयु मी नी जातु पुण ओवतु च्यु तेरो मोन बोदलावीन गोयु ।

³⁰ ३०) ओवतु दिहरी पुरया हाते जायीन कोयु ओवतु च्यु जोपाप आप्यु होव बाबा जातलु पुण नी गोयु । ³¹ ३१) इन दुय पुरयामा कुण बाबान इस्या पुरी कोरलु च्या कोया पेल्लु पुरयु यीसु तिनुह कोयु मी तुमुह खोराखोर कोरया पुण फावु दुय कोरनारा एने राज तुमु दोखा पेल बोगवानोन राजोमा जाहे । ³² ३२) काहाके युहन्ना बापतीस्मान रित आपणारु तुमुह जीवनोन दोरमी वाट देखाडने आव्या पुण तुमु तिनापोर बुरहु नी कोरया पुण फावु दुय कोरनारा एने राज तीनापोर बुरहु कोरया तुमु यो देखीन बी फोसा मोन नी फिराव्या एने तिनापोर बुरहु नी कोरया। ³³ ३३) यीसु फोसु तिनुह कोयु एवी उंजु एक दाखलु होबु एक मालक दोरकस्थान वाडी लागाडयु अने तेरा सोमखेर वाड बोदयु तीनामा दोरकस्थान रुह काडणे एक खाड खोदाडीन चोक्की बोणाव्यु एने वाडी राखवावी कोरने पोक्कु मावु बोणाव्यु ओवतु च्यु दोरकस्थान वाडी दिहरी गोवादयानुह गोवादयो आपीन दिहरा देसोमा जात रोयु । ³⁴ ३४) दोरकस्थान फोवणेन सिजणोपोर तेर फोवोन इस्सु लेणेन कोरता तेर पावरोनुह तीनु गोवादया पाह मुकल्यु । ³⁵ ३५) पुण च्या गोवादया तेर पावरोनुह दोरीन काल्लहा कुटया एने काल्लाहा मारीन नाख्या एने काल्लहा दोगडाटया ।

³⁶ ३६) ओवतु च्यु पेल्ला दोखा होंटा पावरोनुह तीनुपाहा मुकल्यु एने च्या गोवादया तीनुहाते बी एहेज कोरया । ³⁷ ३७) सेव लिवार मालक गोवादया तेर पुरयान मानधान आपहे एहे विचार कोरीन तेर पुरयाह तीनुपाह मुकल्यु । ³⁸ ३८) पुण गोवादया तेर पुरया आवतलु देखीन तिदरे तिदरे कोया यी आखी वाडीन वारीस ते यु से आपु इनाह मार देता तेतार यी आखी वाडी आपणीज ओय जाहे । ³⁹ ३९) कोरीन च्या तिनाह दोरया एने दोरकस्थान वाडीम दोखा बारथे काडीन मार नाख्या । ^{40 41} ४०) कोरीन दोरकस्थान वाडीन मालक आवहे ते तीनु गोवादयाह च्यु काय कोरहे । ४१) च्या तीनाहा कोया जेतार दोरकस्थान वाडीन मालक आपहे ते तीनु गोवादयाह च्यु मार देहे एने दोरकस्थान वाडी दिहरी गोवादयानुह आप देहे एने च्या टेमो पोर तीनाहा कोमायोन वाटु आप्यु कोरहे । ⁴² ४२) यीसु तिनुह कोयु काय तुमु पोवीत्र पुस्तोकोमा नी वाच्यो के जीना दोगडाह राज मिस्तरया रिकामु सोमजीण बारथे काड देल्ला च्यु दोगडा गोरोन पायान खुणान दोगडु बोरा गोयु यो पोरबुखेर दोखा ओयलो एने आपणी नोजरोमा खुब बोगलाये ओहलो से । ⁴³ ४३) कोरीन मी तुमुह कोयतलु बोगवानोन राज तुमु पोर दोखो साडाड लेहे एने बोगवान काहाके जीवणे कोयतलु तेहे जीवणारा माणहोनोहुज आपहे ।

⁴⁴ ४४) ज्यु इना दोगडा पोर पोडहे च्यु चुराचुर ओय जाहे एने जीनापोर यु दोगडा पोडहे तिनाहा गेदया कोर देहे । ⁴⁵ ४५) मोटला पुजारा एने फारीसी पोथंवाला माणहे तेर दाखलाह होबीन सोमजी गोया के यु ते आमारा बारामा वातु कोरतलु से ।

⁴⁶ ४६) च्या तीनाहा दोरने हुतोता पुण माणहोह देखीन बी गोया काहाके माणहे तिनाहा बोविस्य कोयणारु मानतोता ।