2 होमेस्या नीचोव्वा बोणीन हुंवावा रोयु,एने एक दीहराह नी पोटे ओहलु वेवार दीर दोरीन एने एक दीहरान वेठीन मोंगोमा वागोवणु ।
3 पोवित्र जीव आत्मा तुमुह मीवाडलु कोरीन सांती वार रोयणे मेहनत कोरजु ,एने आखा हाते मीवीन रोयु । 4 येसुन एकुज डील से ज्यी तेरी मोंडली से, एने बोगवानोन एकुज पोवित्र जीव आत्मा से, तोहलोज आपुह एकुज आसा राखीन बुलाडतलु से।
5 एकुज पोरबु यीसु एकुज बुरहु एने एकुज बापतीस्मा से।
6 एने एकुज बोगवान से,एने च्युज आखान बाह से,च्युज आखापोर राज कोरतलु एने आपणा आखान जीवाय मा काम कोरतलु एने आखामाज रोयतलु । 7 पुण यीसु मोसी तेर दोया दोखो तेर काम कोरने एकेक जोणाह बात बातीन खास वोरदान आप रोयुह ।
8 बोगवान पुस्तोकोमा एहे लेखाय रोयोह ,च्यु सोयतानाह आरावीन ओवतु जीक हाते सोरगोमा फोसु जात रोयु ,च्यु दुश्मोन माणहोनुह बांदीन तेर हाते ली गोयु ,एने च्यु तेर माणहोह बात बातीन वोरदान आपलु । 9 च्यु उपोर जात रोयु मोंजे च्यु पेलेन दोरतीन नेवडा जागामा उतरलु ओतु।
10 ज्यु माणुह इन दोरतीमा उतरलु ,च्युज माणुह फोसु आखा चीजोह हाजा बोणावणेन कोरता सोरगो दोखु बी उपोर गोयु । 11 मोंडलीन कोरता येसु मोसी तेर माणहोन खास वोरदान आपतलु ,मोंडलीमा थुडाक माणहोह च्यु नेवतो पुचाडनारा चेला एने थुडाक बोगवानोन बोवीस्य कोयणारा ,एने थुडाक हाजी खोबोर देखाडनारा ,एने थुडाक मोंडलीन गुवाव्या ,एने थुडाक हीक हिकाडनारा नीवाडलु।
12 इने रिते बोगवानोन पोवित्र माणहोह तेर सेवान कोरता , तीयार कोरणे एने पोवित्र मोंडली ज्यी येसु मोसीन डीलोन होस से,च्या बोक्ती मा ओगोव वोडता जाणेन कोरता येसु मोसी खास वोरदान मोंडलीन माणहोह आप रोयुह ।
13 आपु बोगवानोन पुरयु येसु मोसीह जाणनेन ओक्कोलो मा,एने बुरहा मा एक माणहोन होस ऐक ओयीन पुरान पुरु पोक्का बोणने जोतरु येसु मोसी पुरान पुरु पोक्कु से,तोतरोज येसु मोसीन सोबावन होसुज आपणा सेवामा बी पुरान पुरु पोक्का बोणनेन कोरता यो आखो वोरदान आपुह आप रोयुह । 14 कोरीन आपु आयतला पुरयान होस नी रोयणु जुवे ,तेतार आयतो डुडंया ज्यो वाहवु सुटतलु ते इंखेर तीखेर पाणीमा डुलकायतलो तोहलो ठोग हीकाडनारान खोराब हीकोमा आपु नी फोसजे ।
15 बाकिन आपु एक दिहराह मोंग हाते खोरी वात बुलता जायीन येसु मोसी ज्यु मोंडलीन मुंड से ,तेर होस आखी वातोमा वोडता जाहुं ।
16 तीना दोख डीलोन एकेक आंग नोहे ,एने आटका हाते गुथायीन पुहायतलो ,एने आखा जेर तेरो काम कोरतला तोहलो मोंडलीन माणहे। जोर एक दीहरा हाते मोंग कोरता जायीन जेर तेरो काम कोरहोत ते मोसीन ताकोत दोखा मोंडली मायला बोक्तीमा वोडता जाहोता । 17 तीनामा मी तुमुह पोरबु आपलु आदीकारमा चेतावाणी आपीन पोरवु आपतलू के ज्या माणहे पोरबु येसु मोसी पोर बुरहु नी कोरतला ,तीदंरे होस तुमु जुण जीवता ,काहाके तीदंरु वीचार बीगुर कामोन से।
18 च्या सोमजणेमा आंदावा आय गोयला ,एने बोगवान आपतलु जीवाय दोखा च्या सेटा ओय गोयला से,काहाके तीदंरो मोन वातडी कोर लेदया कोरीन च्या बोगवानोह नी जाणतला ।
19 च्या वीण लाज्या ओयीन च्या सीनावान होस आखी बातीन खोराब काम कोरनेन लागाडीन मोज्या ली रोयाह ,च्या ओहला गोंदो काम कोरने सोताह होप देल्ला । 20 पुण येसु मोसी दोखी तुमुह ओहली हीक नी जुडी ।
21 तुमु खोराखोर येसु मोसीन बारामा होंबोवला ,कोरीन तीन दोखा तुमु खोरी हीक रोयाह ।
22 कोरीन तुमु येसु मोसी पोर बुरहु कोरनेन पेल, तुमरी जीवाय मा जुनली खोराब टेव तुमुह ठोगीन बीगाडनेन ओती ,च्यी टेव तुमु काडीन नाख देवु। 23 एने तुमरा मोन एने सोबावमा तुमुह नोवला बोणनेन कोरता पोवीत्र आत्माह काम कोरणे जुवे ।
24 तुमु नोवलो रुप पेर लेवु ,ज्यो बोगवानोन होसुज खोराखोर दोरमी एने पोवित्र बोणनेन कोरता गोडलु से। 25 कोरीन एक दिहराह ठोगणो सुडीन, एक दीहरा हाते खोरा बुलनु, काहाके आपु आखा एकुज डीलोन बात बातीन डील से ।
26 जोर तुमुह खोत चोडे ती बी पाप जुण कोरता दिह बुडणेन पेल ,तुमरु संताप उतरी जाणु जुवे ।
27 बुतडाह तुमरी जीवाय मा पाप कोरावणे सोंदी जुण आपता । 28 जोर तुमु चुरी कोरता ओहे ,ते फोसा चुरी जुण कोरता, पुण सोतान आथो कोरीन इमानदारी मा काठी काम कोरीन कोमाय जुवे, तेतार तुमु जीनुह जोरवुत से तीनुह काय बी आप सोकतला ।
29 तुमरा मुयोम दोखी खोराब वात नीकोवणु नी जुवे,पुण होंबोवणाराह हुव्वावी लागे ओहली वात बुलनु जुवे , तेतार च्या होंब वतला तीनुह बोकतीम वोडनेह फायदु ओय जाहे ।
30 एने तुमुह आप रोयुह पोवीत्र जीव आत्माह दुखी मा कोरु ,काहाके जेदिह बोगवान तुमुह पुरी रीते सुटकारु आपहे ,ताहलोगोणे बोगवान तुमुह पोवीत्र जीव आत्मान सीक्कु लागाडीन समावतलु । 31 कोडवी वात कीचवायला सुब सोंतान जगडु दिहरान नाव वोदी कोरीन ,एने आखी बातीन खोराब सोबाव तुमरा जीवायामा दोखा सेटा कोर देवु ।
32 तेर बोदले दीहरा हाते कीवाता एने लाडका बोण जावु ,यीसु मोसी मा बोगवान जेहे तुमरा पापे माफ कोरले। तेहे ,तुमु बी एक दिहरान गुणा माफ कोरु