¹ ज्यो काय तुमु कोरतला बोगवानोन होस जीव ,काहाके तुमु बोगवानोन लाडका पुरया से।

² येसु मोसी तेर जीव आपणे कोरता बोगवानोह सखुब पोटे ओहलो एने हाजो गोदायण्या बेटोन होस बादान रुपमा चोडावीन आपुह मोंग कोरलु ,तेहेज तुमु बी दीहराह मोंग कोरु । ³ सीनावी इनी बातीन आखो खोराब कामे काल्ली बी चीजो पोर हाय हाय कोरणु या बोठा तुमरा जीवायामा रोयणु नी जुवे ,काहाके च्यो आखो बोगवानोन पोवीत्र माणहोह नी चालतलो ।

⁴ एने चोंगलायली वात बीगुर कामोन वात एने खोराब आंहताय करीन ,मी बोठो वात बोगवानोन माणहोन जीवाय मा होंबे नी बाकीन तुमु बोगवानोह दोन्यवाद कोरता रोयु योज हाजो से। ⁵ सीनावो कोरनारा, एने खोराब काम कोरनारा, एने हाय हाय कोरनारा ,मुरती पुजनारा ओहलो कोरनारा आखा मोसी एने बोगवानोन राजीन वारीस कोदी नी बोणे ।

⁶ कुण बी बुमह तीदंरी वायबार वातोमा ठोगे ते तीदंरे वाये नी लागणु ,काहाके ज्या बोगवानोन वातु नी मानतला तीनुपोर बोगवान सोंताप कोरहे ,एने डोंड आपहे ।

⁷ कोरीन तीनुहाते होंगु जुण लागता। ⁸ काहाके पेल तुमु आंदारला मा ओता ,पुण एवी तुमु पोरबु हाते एखठा रोयतला ,कोरीन तुमु यीसु मोसी मा उज्यावामा आव लागला से,कोरीन उज्यावामा रोयणारा माणहोन होस जीवु।

⁹ काहाके उज्यावो आखी वातोन हाजा कामे ,एने दोरमी , एने खोरा कामोन खुब फोवे लावतलो ।

¹⁰ तुमरी जीवाय मा फारकीन हीकु के पोरबु येसुह काय।

¹¹ बीगुर फोवोन आंदारलान खोराब काम कोरनारा हाते होंगोमा मानो पोडयु ,बाकीन च्या खोराब काम कोरतला कोरीन तीनुह जुरे बुलीन सोमजाडयु ।

¹² काहाके च्या वात कोरने बी लाज आवे ओहला खोराब कामे चुराये करतला ! ¹³ जोर ओहलो काय बी वात उगडी कोरतला ते माणहोन ओगोव च्या खोरा खोर कोहला ,सोताह कोरीन मालुम ओय जाहे उज्यावामा आखोज देखाय जातलो से।

¹⁴ तीनामा एंहे कोय रोयुह के ए हुवणारा जाग जावु,एने मोरलाम दोखा जीवता ओय जावु ,मोसीन उज्योड तुमु पोर पीपलहे । ¹⁵ तुमु केहेंक जीवतला तेर बारामा सोमावीन रोयु, वीण ओक्ल्यान होस जुण जावु ,पुण ओक्कोलवावा बोणीन जीवाय जीवु।

¹⁶ इनु खोराब दीहोमा जीव रोयाह कोरीन जेतार बी सोंदी जुडे ते बोगवानोन हाजो काम कोरीन टेमोह मोंगो सोमजु ।

¹⁷ कोरीन तुमु वीण ओक्ल्यान होस जुण रोयता ,पुण पोरबु येसुन ईश्या काय से कोरीन सोमजी जावु । ¹⁸ हुरु पीयीन साकु मा काहाके इना दोखा खोराब वीचार आवतला ,बाकीन तुमरा जीवोहे पोवित्र जीव आत्मान काबामा रोयणे देवु ।

¹⁹ बोगवानोन गायणो गावीन एक दीहराह हिम्मोत आपु,तुमरा पुरा मोन दोखा गीत गाविन पोरबु यीसुन इस्तुती कोरु।

²⁰ पोरबु येसु मोसीन नावोमा होमेस्या आखी वातोन कोरता बांह बोगवानोह दोन्यवाद कोरु ।

²¹ तुमु मोसीन बीक राखीन एक दीहरान वात मानीन रोयु । ²² ए बाया तुमु पोरबु यीसुन वात केहेंक मानीन रोयतला ,तेहेंज तुमरा माटीन वात मानीन रोयु।

²³ काहाके जेहे माटी लाडीन मुंडको से,तेहेज मोसी तेर मोंडलीन कोरता मुंडको से,एने तेर डील मोंडली से,च्युज तीनुह वाचाडनारु से।

²⁴ मोंडली येसु मोसीन वात मानली , तोहलोज लाडयानुह बी माटीन आखी वात मानीन रोयणु पोडहे । ²⁵ ए माटीहो मोसी तेर मंडलीह मोंग कोरलु ,एने तीदंरे कोरता सोतान जीव लोगोन आण देल तोहलो ,तुमु बी तुमरा जेर तेरा लाडयानुह मोंग कोरु ।

²⁶ मोंडलीन माणहोह पोवित्र बोणावणे कोरता तेर सोतान जीव आपलु बोगवानोन वात कोरीन ,पाणी कोरीन ,बापतीस्मा आपीन तीनुह दुवीन सुखला कोरे ।

²⁷ तेर मोंडली मायलाह बीगुर डागोवाला , नी ते चीमटायला एक बी डामचु नी रोये ,ओहलो पोवीत्र एने भी बीगुर गुनावालान होस खुब होवाली मोंडली बोणावीन तेर सोतान जीव आपलु से। ²⁸ ए माटीहे तुमु सोतान डीलोह केहेंक मोंग कोरतला ,तोहलो तुमरा लाडयानुह बी मोंग कोरनु जुवे, काहाके एक माटी लाडीन मोंग कोरे ते च्यु सोताह मोंग कोरतला कोवाय ।

²⁹ काहाके कुण बी सोतान डीलोह कोदी हीगीह नी कोरे ,पुण एकेक माणुह तेर सोतान डीलोह कोदी हीगीह नी कोरे,पुण एकेक माणुह तेर सोतान डीलोह पुहतलू ,तेहेज मोसी मोंडलीन माणहोह पुहतलु ।

³⁰ काहाके आपु तेर डीलोन एक आंग से। ³¹ तीनामा बोगवानोन पुस्तोकोमा लेखाय रोयोह ,एक माणुह तेर आया बाबाह सुडीन तेर लाडी हाते मीवीन रोयणु जुवे,एने च्या दुय एकुज डील बोण जाहोत।

³² मी एक मोटी लीकायली वात से ,पुण मी मोसी एने तेर मोंडलीन बारामा कोयतलु ।

³³ एने तुमु आखा तुमरा लाडयानुह सोताह जेहे मोंग कोरतला, तोहलो मोंग कोरु,एने लाडया तुमरा जेर तेरा माटीन आबरु मेकु।