2 खोराखोर तुमु होंबी रोयाह के बोगवान दोया देखाडीन मेहे निवाडीन यीसुन हाजी खोबोर तुमुह कोयणेन खास सेवा होपलु से। 3 बोगवान तेर बोजोटोन लीकायली वातोह मेहेपोर उगडी कोर देल्लु,इनी वातोन बारामा मी पेलेन तुमुह लेख देल्लु से।
4 येसु मोसीन लीखायली बोजोटौन बारामा मी बोराबोर जाणतलु कोरीन जोर तुमु यो वाचे ते तुमु सोमज सोकतला ।
5 पेल्लु जोमानामा बोगवान तेर लीकायली वातोह कुणीह नी देखाडयु ओतु ,पुण एंवी पोवित्र जीव आत्मान मोदत दोखा च्यु तेर बोजोटोन नेवतो पुचाडनारु चेलानुह एने बोगवानोन बोवीस्य कोयणारानुह देखाडलु से। 6 बोगवानोन लिखायली वात यी से, के यहुदी एने बीगुर येहुदी माणहोमा ,च्या यीसु मोसी हाजी खोबोर पोर बुरहु कोरतला,ते च्या बोगवानोन पुरया हाते बोराबोर आख अधिकार जुडनेन वारीस से, एने च्या एकुज डीलोन आंग से, एने येसु मोसी दोखु बोगवान आपतलु वायदान वाटान गोवादया बी से ।
7 बोगवानोन दोया एने मोटली ताकोत दोखी तेरी हाजी खोबोर कोयणेन यी खुब मोटली सेवा मेहे आपायली से। 8 मी बोगवानोन आखा पोवित्र माणहोम दोखु आयतु से,ती बी बोगवान मेहेपोर खुब कुरपा देखाडीन यीसु मोसीन हाजी खोबोर ज्यी मोजाये नी ओहला होंवटा आसीरवादोन खोजानो से,च्यी वात बीगुर येहुदीनुह कोयणेन कोरता मेहे मी सोंदी आपलु से।
9 बोगवान ज्यु आखो गोडनारु च्या तेर मोरजी दोखो आखो गोडणेन पेलेन लीकाडीन मेकलु ,बोजोटोन बारामा आखानुह कोयणेन कोरता सेवा मार आथोमा होप रोयुह । 10 च्यु एहे कोरलु कोरीन,एंवी सोरोगोन आखा राज कोरनारा मुखी एने होको मायला आखानुह आपु बोगवान कोतरु ओक्कोलवावु से, एने तेर मोंडलीन कोरता कोतरो हाजो ओयजाहे ।
11 बोगवान आखा चीजे गोडणेन पेलेन बोजोट लागाडलु ओतु , च्यो बोजोट पोरबु येसु मोसीहोह लागाडीन पूरो कोरलु । 12 येसु मोसीपोर बुरहु कोरनेमा एने तीनाहाते मीवीन रोयणेमा आपु हिम्मोत एने पोक्का बुरहा हाते बोगवानो ओगोव होक हाते जाय सोकतला।
13 कोरीन तुमरे कोरता मी दुख वेठतलु तेर कोरता तुमु नाराज जुण ओयता ,कोरीन मी तुमुह रावण्या करतलु ,काहाके मारो आखो दुख तुमरा फायदान कोरता से। 14 जेतार मी बोगवानोन तिनी मोटली बोजोटोन बारामा वीचार कोरो ते मी तीना बोगवान बाबा हाजीर। ओपीन मांडा टेकीन पोरथना कोरतलु।
15 च्यु सोरोग एने दोरती पोरलो आखा गोराणान बोगवान एने जीवायोन जडमुव से।
16 च्या तेर पोवित्र जीव आत्मा दोखु ,एने ताकोत दोखु तेरी मोहिमान ताकोतोह लागाडीन च्यु तुमरा जीव आत्मान मायला जीवायोह पुरोन पूरो पोक्को कोर देहे। 17 एने तुमु येशु मसीह पोर बुरहु कोरला कोरीन च्यु तुमरा मोनमा वोहे,जेहे जाड उडो जोड मुवांडा नाखीन वोडतो जायीन मोजबुत ओयतलो ,तेहेज तुमु बोगवानोह एने एक दीहराह मोंगोमा पायु नाखीन वातडा रोयु।
18 बोगवानोन आखा पोवित्र माणहो हाते मोसीन मोंग सीबये नी ओहलो चौवडी कोतरो नांबो कोतरो उचो एने कोतरो ऊंड़ो से,कोतरो सोमजणेन ताकोत तुमुह बी जुडे कोरीन ।
19 उंजु यो मोंग आपणा सोमजोन बारथ से ती बी,येसु मोसीन मोंग सोमजणेन ताकोत वावा बोणनेन कोरता बोगवानोन आखा गुणे तुमरी जीवाय मां पुरान पुरा रोयणु जुवे कोरीन मी पोरथना कोरतलु। 20 एवी बोगवानोन बोडायी जोलोम ओयती रोये, के आपु काय मांगतला एने काय विचार कोरतला तीना दोखो बी खुब वोडीन आपणी जीवाय मा काम कोरणेन बोगवानो पोर सोक्ती से।
21 यीसु मोसीहोह लागाडीन विडीन पीडी ज्यो काय च्यु हाजो काम मोंडलीमा कोरलू,तेर कोरता जोलमकीज बोडायी ओयती रोये आमीन।