¹ एक टेमे तुमु पापोम एने गुनामा मोर गोयला ओता,बोगवान तुमुह जीवतु कोर्यू ।

² तुमु इन कोवीन खोराब माणहोन होस जीवता ओता , वाहवामा रोयणारा खोराब जोमोन मुखी बुतडान वात तुमु मानताओता ,च्युज आज लोगोण ज्या बोगवानोन वात नी मानतला,तीनुह खोराब काम कोरावणे काबोमा राखीन चालाडतलु ।

³ बोगवानोन वातु नी मानीन ,आपु आपणा डीलोन एने मोनोन खोराब इशय मानिन चाल्ला,आपु बी तोहला माणहोन होस बोगवानोन डोंड जुडनेन लायक ओता। ⁴ पुण बोगवान गोण दोयावु से एने आपुपोर खुब मोंग दोखु मोंगकरतलु कोरलु कोरीन।

⁵ आपु आखा आपणा पापोमा मोरला ओता ते बीबोगवान येसु मोसी हाते आपु आखानुह जीवतु कोरलु बोगवानोन दोयामा ओतराज आपु आखा आपणा पापोन डोंड दोखा वाच गोयला से।

⁶ बोगवान मोसी हाते आपुह बी मोरलाम दोखु जीवतु कोरीन आपुह यीसु मोसी हाते सोरगोन राजगदीपोर बोठाड़लु काहाके आपु आखा यीसु मोसी हाते जुडाय गोयला से।

⁷ इने रीते येसु मोसीहोह लागाडीन च्या तेर दोया आपु आखापोर देंखाडलु तीनामा आपु आपणा बुलो कोरीन सोमजाड नी सोकतला ओहला मालदोनोन होस तेरी कोतरी मोटी दोया से कोरीन आवणेवाली कोवीमा माणहे देखाडहे। ⁸ तुमु येसु मोसीपोर बुरह कोरला कोरीन बोगवान तेर कुरपा दोखुज तुमुह तुमरा पापोन डोंड दोखु वाचाडलु यो ते हाजा कामे कोरला कोरीन नीम्बे पुण बोगवानोन मोटली कुरपामाज तुमु वाच गोयला से पुण यो ते बोगवानोन फुकटोन वोरदान से कोरीन कुण बी सोतान बाराम मोठाया नी कोर सोकतला।

⁹ होहलो नी रोयनु जुवे की तुमु घमण्ड कोरनु जुवे।

¹⁰ बोगवान आपुह हाजा कामे कोरनेन कोरता येसु मोसीमा नोवली जीवायमा गोडलु से एने आपु बोगवानोन आथोन कामोन चीज से एने च्या हाजा कामे आपु कोरीन जीवणेन कोरता बोगवान पेलन बोजोट लागाड रोयुह। ¹¹ तुमु गोया दीहोमा केहेंक रोयला च्यो और कोरू पोयदा ओयला तेतार दोखाज तुमु येहुदी नीम्बे , एने बोगवानोन नेम मानीन नी जीवतोता येहुदी तुमह चामडो कातोरनेन रीत नी कोरनारा कोरीन बुलाडता ओता ।

¹² तीन टेमे तुमु येसु मोसी हाते दोखा सेटा रोयीन जीवाय जीवता ओता तुमु बोगवानोन खास नीवाडला इसरायेल माणहेनी ओता बोगवान येहुदी माणहोन कोरता ,बुली कोरलु तेर वायदामा तुमरु वांदु नी ओतु , इनी कोवीमा तुमु बोगवानोह नी जाणतला ,एने आखान बीगुर जीवाय जीवतोता ,यो आखो तुमु ओर कोरजु। ¹³ पेल तुमु बोगवानो हाते दोखा खुब सेटा रोयीन जीवता ओता पुण एवी येसु मोसीन लुयी कोरीन तुमु यीसु मोसी हाते आवलागला से।

¹⁴ येसु मोसी आपुह सांती आपणारू से येहुदी एने बीगुर येहुदी या अंवा संवा वीरूद कोरीन आंगे आंगे रोयतला जेहे के तींदरी विस्मा एक बीतडो उबो कोर रोयलो पुण येशु मोसी तेर डीलोन बादा चोडावीन मोरलु कोरीन इनु आंगे आंगे कोरनारा बीतडाह उदारीन सेटी कोर देल्लु।

¹⁵ च्यु मोरलु कोरीन मुसा लेखलु नेम एने ऐ तोह नास कोरीन येहुदी एने बीगुर येहुदी माणहोह तेर हाते ,मेवाण कोरावीन एकुज नोवलु माणुह बोणाव देल्लु।

¹⁶ येसु मोसी कुरूसोपोर मोरलु कोरीन आपुपाह दुय हुवाना दगडाहा नास कोर देल्लु येहुदी एने बीगुर येहुदी माणहोह एकुज डीलोन होस एखठा कोरीन बोगवानो हाते मेवाण कोर देल्लु। ¹⁷ येसु मोसी आवीन तुमु ज्या सेटा ओता एने ज्या हाते ओता, तीना दुय टुवानुह मीवाणनेन हाजी खोबर देखाडलु।

¹⁸ कोरीन आपु आखा पोवित्र जीव आत्मान मोदत दोखा बाह बोगवानो पाह जाय सोकतला। ¹⁹ कोरीन एंवी तुमु आखा ओनजावणा एने पोराया नींबे , पुण तुमु पोवित्र माणहो हाते एकुज सेहरोन एने बोगवानोन गोराणान से।

²⁰ आपु आखा बोगवानोन गोर से,तीन गोरोन पायु नेवातो पुचाडनारा चेला एने बोवीस्य कोयणारा से, एने येसु मोसीन तीन गोरान पायान खुणान दोगडु से।

²¹ जेहे बांदलो मोटलो गोर पाया हाते जुडाय रोयतलो तेहेंज आपु आखा पोरबु येसु मोसी हाते जुडाय रोयुला ,एने आपु बोठ बोगवान रोयणेन पोवित्र मोंदीर बोण गोयला से ।

²² इना मोंदीर हाते बी एकठा ओयीन बोगवानोन आत्मा दोखा तेर रोयणेन खास जागु बोण रोयाह ।