¹ Ñanno Ruben, Gad atöödö, jooje cönä'ja'cä chäcönö'como. Yaawä tönwanno cöneeneato yää Jazer, Galaad nonodö mmaja, aashicha yää nono cönä'ja'cä chäcönö'como weichojo'je. ² Yääje yeijäcä ñanno Gad, Ruben atöödöcomo mmaja, cöneejoto cönaadeuwöicho yaawä Moises wwä, Eleazar ñäädä Sacerdote wwä mmaja, yää jata edhajätoncomo wwäiñe mmaja, cönä'döa'to: ³ "Edä yää jata e'ta'como ñaa neneejödö: Atarot, Dibon, Jazer, Nimra, Hesbón, Eleale, Sebam, Nebo, Beón mmaja. ⁴ Edä yää nono Cajiichana Wanaadi cönwonotoicho Israelita'coomo owaajo, Aashicha yää cönä'ja'cä jaaca weichocomo' je. Ñaa, sootoi, ñaa ecöntö'mo jooje naato." ⁵ Cönä'döa'cä: "Aashicha adhenjatawä iñää wääneajäcä, ñaa wwä u'tääcä edää nono osootoi weicho'como je. Jordan mma ñaa wwä maniyojoi." ⁶ Yaawä Moises cöne'cwa'jäacä ñanno Gad, Ruben atöödö: "¿Aaquene canno äjimmä tä'da naicho wäänä aaca atää aweeconecatameiñe nonojo? quee cönä'döa'cä. ⁷ ¿Aneecotojo canno Israelita ewaanö'como coneeda männöjotädööde, nötä'ña'to iyää nono Cajiichana Wanaadi nutuudu naadö döiña? quee. ⁸ Mädääje mmaja cönnöicho dea ñanno yuumötoncomo yaawä Cedes Barnea nonodö eneejo wennojaneetodawä. ⁹ Tönwanno cönnöicho yaawä Escol ña chuutajano ña. Yää nono cöneeneato yaawä, mädääje ñanno soto Israelitacomo ewaanö'como coneeda cönnöjoicho, yääje yeijäcä omoomö'da cöneiyato yää nono Cajiichana Wanaadi nutuudu aca. ¹⁰ Yää anooto Cajiichana Wanaadi cönä'tömai jooje. Töwö juraje cönä'döi cönä'döa'cä yaawä: ¹¹ Yääje yeijäcä ñanno dhanwacomo Egipto ñancomo cöneejacaichodö, tooni soto weduucomo jonno maadädä natoodö, neeneato'de yää nono wecammanedö Abraham wwä, Isacc wwä, Jacob wwä mmaja, tameedä wanontädö woijeda yeijäcäiñe, canno mmane wishancwaja'to'de chojonnoiñe. ¹² Caleb, Jefone ñäädä cenezeo nnedö, Josue, Nun nnedö mmaja. Canno mma ñanno woijacomo tameedä yeichö wa'cä. ¹³ Yaawä töwö Cajiichana Wanaadi cönäätömai jooje Israelita jääcäiñe. Wä'cajeeda i'chäto'coomo cönnöi yeedennato'como je'da aacä soto weduuto wa'cä jata' jemjönö aca, ñanno inñacontoncomo jödö, wataamedöcomo wa'cä, ñanno conemjönö cönnöichodö chämjatawä cönaacoichajoicho yaawä. ¹⁴ Eneecäjane'ma, änwanno mmaja omootoncomo wacancomo je maato, conemjönö'como dhanwa'como je, jooje'cä jeene mejoodöja'to Cajiichana Wanaadi wäätömatojo Israel jäcäiñe. ¹⁵ Änwanno mmaja shancwa'jäcä chääjadä aweichöcomo, töwö nenemmaja'de yaawä ñanno Israelitacomo chuuta jemjönö aaca mmaja, mädääje änwanno macoichaja'tode tameedä ñanno soto." ¹⁶ Yääje mma yaawä Moises döiña cöneejoto cönä'döa'to yaawä: "Ñaa ecöntomo cudaadai tödööjai ña nai, ñaa jatadö ñaa wäjimmä'tädö weicho'como mmaja, quee cönä'döa'to. ¹⁷ Yaawäne chänönge töwä'döe dea mma ñaa naade töwaichaqueiñe mmaja Israelita töweewänätamo jadäiñe ñaa wötäädö wettä yaawä, adhaadädöcomo jonaane yeichocomo döiña. Yaawä ne ñaa wäjimmä'tädö naatode yää jata jöduujato tawä, edä nono dewä natoodö aneejacomo soto.