Marvin_Rodriguez-mch_gen_text

7 ¹ Cajiichana Wanaadi cönä'döacä Noe wä: "Odhoomoncä cudiyaada adai'joto aca, tameedä äwä'jimmä'tädö adhe'sawä naatodö jaadäiñe ,amäädä mma öwö woije adheenetä weijäcä, canno soto eduuwa naatodö antawäiñe. ² Tameedä odoocoja'como tänäaamoje naatodö amonno'jocoto'de äjaadä aacä amoojato (7) dhanwacomo, aacä amoojato mmaja wodiiñamo, ñanno odoocoja'como tänäamoje'da naatoodö maane aacäiñemma amonno'jäcooto'de, dhanwa, wodi acä quemma. ³ Mädääje mmaja ñanno tadiiñanmo caaju o'cääcä töwaadema weneenetodö amonno'jäcooto'de aacä amoojato (7) dhanwacomo, aacä amoojato mmaja wodiiñamo, yeejamöödöcoomo wetä yä'jeje, edä nono de'wä. ⁴ Aacä amoojäto anoototo ai conoojo inñanö'jodö waajäntotoojo weijäcä, aacä soto 40 anooto, aacä soto 40 coijaicho mmaja. Tameedä wacoichaja'de edä nono de'wä naamode'nädö naatodö," que cönä'döaacä Wanaadi Noe wä. ⁵ Mädääje Noe cönnöi Wanaadi necamma'jödö nönge. ⁶ Noe cönä'jaacä 600 wedu tunaamä cönta'dawä edä nono de'wä. ⁷ Yaawä tunaamä nontädööje Noe cönoomomöicho cudiida adaijoto aca, töjiinñamo acä tönnacoomo jadäiñe, töjadantomo jadäiñe mmaja. ⁸ Odoocoja'como tänäaamo, odocaja'como tänämjöncomo mmaja, tadiiñamo, nono de'wä töweenöca'como wötäädö mmaja, ⁹ Aacäiñe, dhanwa wodi acä, cöneejoto Noé wadäädä, cönoomomöicho yaawä cudiida adaijäto aca, Wanaadi necammajödö nönge Noé wwä. ¹⁰ Mädääje aacä amoojato anoototo ai conoojo töwöiñadö cönaajäntäi, nono tönnadöödö cönaajäntäi yaawä tunaamä'que. ¹¹ Yaawä Noe cönä'jacä 600 wedu , aacä nuunätoai, juujatonnoto de'wä aacä 17 anooto yeichö, tuna juducomo cönäätättacajätöi, caju cönaata'ducai chea. ¹² Mädääje conoojo töwöiñadö cönajäntäi nono de'wä, aacä soto anooto, aacä soto coijaicho mmaja. ¹³ Yää anooto awä dea Noe cönomomöicho cudiida adaijoto aca, tönnacoomo jadäiñe ñanno Sem,Cam,Jafet, Noé jiiñamo mmaja, aaduwaawä ijaadantomo mmaja. ¹⁴ Tameedä ñanno chuutacancomo mädä mmaja ä'sacancomo äcöönöje weneenetodö tameedä ñanno töweneca'como wötäädö nono de'cäcä iju'jocomo wadäi tameedä yeicho wa'cä ñanno tadiiñamo. ¹⁵ Yääje ma yaawä Noe wadäädä cöneejoto ñanno odoocoja'como nuudä cönä'jatodö,cönääwacaicho jidaawa aca. ¹⁶ Tameedä ñanno odoocoja'como dhanwa wodi acä cönomomöicho wanaadi necamma'jödö nöngedea mädääje wanaadi mönatata cönadui jidaawa nata'tadö tameedä yomongacomjäcä inchadhedä'noiñe. ¹⁷ Yääje ma yaawä coonojo cönäiñai aacä soto anooto tuna cuncumai jooje nono waneje'da tödööene jidaawa cöntawaatai nono de'wänno. ¹⁸ Tameedä nono cönönñadöi chuuma'jödö'que jidaawa cöntawatai nono de'wä töweichö jonno. ¹⁹ Tuna jooje cönancui nono de'cäi ,jöö cawo'como cönönñadö'jätöi tameedä caju a'cää naadö cuncumai. ²⁰ Tuna jooje cuncumai aacä amoojato metros tödööene töwädetöene mmaja (metros y medio) jöö'como änedä tödöene. ²¹ Mädääje tameedä soto cönä'jajoicho edä nono de'wä cönäjatodö tadiiñanmo äcöönö chuutacomo conemjönä'como töweenöca'como wötöödö nono de'cäcä. ²² Tameedä ñanno nudä cönä'jatodö edä nono de'wä töwoodemwa cönä'jatodö mmaja cönä'jajoicho ²³ Mädääje soto cönä'jajoicho edä nonodö de'wä cönäjatodö tunaamä canaadöje ñanno chuutacancomo conemjönäcomo tadiiñamo töweenöca'como wötäädö mmaja Noe maane cönäwanacaicho yää jimmätädö mmaja jidaawa aca chäjadä cönä'jatodöödä. ²⁴ Ciento cincuenta anooto (150 dias) cönä'jato jidaawa aca.