8 ¹ Noé jäcä Wanaadi cöntö'tai yaawä, jaadaca aca tameedä odocaja'como chuutacancomo jadäiñe yeichö jäcä, odocaja'como inñejenca'como jadäiñe yeichö jäcä mmaja. Yääje yeijäcä jejeichä Wanaadi cönne'joi joojato nono de'cäi, tuna cönaajäntäi yaawä töseede'tadö. ² Nono o'nono tuna weejödö cöneedennai yaawä, conoojo mmaja cöneedennai chea, töwiiñadö cönä'cai yaawä. ³ Tuna chuumaajä jo'wadootoje cönse'de'taacä yaawä, ciento cincuenta anoototoai cönsede'tai. ⁴ Jaadaca cönsede'tai yaawä jöö Araratjödö de'wä, aacä amäjato (7)nuunätoai, amoojadooto de'wä aacä amäjato(17) anoototoai yeichö. ⁵ Tuna jo'wadootoje cönsede'tai amoojadooto nuunä (decimo) aca tödöjoone. Jööcomo cöneeja'cajäätöi chea yaawä tooni nuunä anoototoai. ⁶ Cuarenta anoototoai yeichö yaawä, Noé cöna'ducai jaadaca mentaanai'chädööje inñödö cönä'ja'dö. ⁷ Cönanñö'jojoi yaawä tonoodo judumato jödo'na, ñäädä tonoodo cönämamnäjöi yaawä cacääcäi nono sede'tadö jonaane. ⁸ Yaawä jaduuma daaja cönanñö'joi chea, tuna töwa'dhana yeichö eneedö wetä töwwä, ⁹ yaawä'ne jaduuma anendatä'da cöneiyacä töwä'totoojo, cönennacai chea yaawä yöiña mmaja jaadaca döiña, sö'je deea yeijödö weijäcä tuna. Noé tajäädöque cönänwojoi chäwwadäädä, cönaamonno'joi yaawä töjaadä jaadaca aca. ¹⁰ Aacä amoojato anooto mmaja cönwomoocöi chea yaawä, jaduuma anñö'jodö wetä yaawä töwwä. ¹¹ Jaduuma cönnenacai chäwwadäädä yaawä cho'mamöödawä. Oliva adö ajamjacaanö dha'me cönä'jaacä töjootödö jäcä. Mädääje Noé towaanäcä cönnöi tuna töseede'ta yeichö. ¹² Töwö conwomoocöi chea yaawä aacä amoojato anooto mmaja, jaduuma anñö'jodö wetä mmaja yaawä töwwä. Yaawäne jaduuma ennaca'da cöneiyacä chäwwadäädä. ¹³ Yaawä seisciento uno wedu Noé weichö, nono cönsede'tai, yää cönä'jaacä awa'deeto nuunäto awä, yää awa'deenato anooto nuunäichädö yeichö. Noé cöna'ducai yaawä jaadaca a'duneije cönä'ja'dö, cöneene'mai yaawä jödo'na, cöneedantäi yaawä nono sedeeje yeichö. ¹⁴ Aacä nuunätoai, veintisiete anootoichädö awä, nono sedeeje cönä'jaacä yaawä. ¹⁵ Wanaadi cönä'döaacä Noé wwä: ¹⁶ "Adheeja'cacä jaadaca acanno amäädä, ajinñamo mmaja, ännacoomo mmaja, ännacoomo jinñantomo mmaja. ¹⁷ Ajaadä u'cacääto tameedä canno odo'caja'como, tadiiñaamo mmaja, nono de'wä töweenöca'como wötäädö mmaja, ejaamöiyeto tameedä nono weichö wa'cä," quee cönä'döaacä. ¹⁸ Mädääje Noé cöneeja'cai jaadaca acanno töjinñamo acä, tönnacoomo jadäiñe mmaja, tönnacoomo jinñantomo jadäiñe mmaja. ¹⁹ Tameedä odocajaacomo mmaja, tameedä töweenöca'como wötäädö mmaja, tadiiñamo mmaja, tameedä yää jaadaca aca cönä'ja'todö cöneeja'caicho. ²⁰ Noe cönaamäi Cajiichaana Wanaadi wonooje odoocaajato ya'cwatoojo a'täi. Mädääje töwö cönaamönñä'cai tooni odoocajaato no'ssajemjönö, tooni tadiiñemö nossajemjönö mmaja, cönna'cwai yaawä ofrenda aashichaatoje yää odoocajaato ya'cwatoojo de'wä tödöödö'jo. ²¹ Cajiichaana Wanaadi töwaacö'je yää jodö cönjo'joi, cönä'döaacä yaawä töwwäädä: "mädä wa'cä nono äncone'ma'da wa'de eduuwa, soto conenjönööje yeijäcä, yennu'jödö jonnoto'jödöödä conemjönö wadäädä töttä töwö na. Anaacoichajo'da mmaja waato'dede tameedä naamode'nädö. ²² Nono töweiye yeichö wadaadäädä, töweiye na'de ñaatö'totoojo anootoi'chädö, amu'tojo anootoichä'dö mmaja, cämme yeichojo anootoichädö, taane yeichojo anootoichädö mmaja, weduuje yeichojo anootoichädö, conoojoje yeichojo anotoichädö mmaja." quee cönä'döaacä.