Marvin_Rodriguez-mch_gen_text

6 ¹ Yääje mma yaawä edä nono de'wä jooje soto cöneejanga'to, wodiinñamooje mmaja cönennecaicho deea, ² Yaawä Wanaadi nacoomo cöneedantoicho ñanno soto nacontoncomo wodiiñamo, iiñatajenñe. Tumjummadöcomo woije cönä'döjätöicho chääjadäiñe. ³ Yääje mma yaawä Cajiichaana Wanaadi cönä'döacä: "Yeichödäje chääjadäiñe weichojo'je'da na, soto mmaane yeiya'como yääje yeijäcä tönwanno nudä naato'de eduuwa 120 wedumma" quee cönä'döaacä. ⁴ Töweiye cönä'ja'to edä nono de'wä soto adaijäcoomo, yaawä Wanaadi nacoomo yenneca'comjäcä ñanno soto nacontoncomo wodinñamo jadäiñe, töweiye mmaja cönä'ja'to deea soto adaijäcoomo, ñanno jaiñoone cönä'ja'to soto jäduujacomooje, tacaada'comooje mmaja. ⁵ Yaawä Wanaadi cöneene'maacä jooje soto cone'nadiyöcoomo edä nono dewä, conemjönö tödöödö jäcämma chötajäätödööcomo cönä'jaacä yeichöje. ⁶ Yaawä Wanaadi wentumje cönä'jaacä soto amoode'nä'jödö weijäcä töwwä, jooje se'ne chäwwä cönä'jaacä täwaanö jadäädä. ⁷ Yaawä Wanaadi cönä'döaacä: ''Tameedä wacoichajaato'de canno soto edä nono de'wäncomo naamode'nädö naatoodö, tameedä odoocojacomo, ñanno töweenaca'como wötäädö mmaja, tameedä tadiiñanmo mmaja, wentumje wa amoode'nä'jäcoomo weijäcä,'' que cönä'döaacä Wanaadi. ⁸ Yaawä'ne Noe aashicha cönääneaacä Wanaadi emjatawä. ⁹ Edä yää Noe weijödö, Noe cönä'jacä aashichaato dhanwa, töwö mma aashichaatoje soto antawäiñe töweiye cönä'jaacä, Noe cönä'jaacä Wanaadi woije yeichöje. ¹⁰ Noe nacomo cönäja'to Aaduwaawä, Sem, Cam mmaja, Jafet mmaja. ¹¹ Yaawä edä nono de'wä cönä'jaacä jooje conemjönö,Waanadi emjataawä, jooje mmaja wä'tu'de'tänä. ¹² Yaawä Wanaadi cöneeneaacä tameedä edä nono de'wä yeecone'maajä, tameedä soto conemjönö tödödöjemma yeijäcoomo weijäcä. ¹³ Wanaadi cönädöaacä Noe wä: ''Tameedä edä nono de'wä naatoodö wacoichajaato'de, jooje conemjönö tödöödö weijäcä chäwwäiñe, nono wacoichaja'de, tameedä soto mmaja. ¹⁴ Yääje yeijäcä, äcudiiyaadai adaijooto ännöcä, dee ciprés weichö que, chaaca aco'jäcä'de, cadiimaniiche emancä'de yaawä, chaaca, ye'wä mmaja. ¹⁵ Edääje tödööcä'de: 135 oneeja'jödö tödööcä'de nuwe yeichö, tajujuiñe yeichö mmaane 22,5 oneeja'jödö, cawä yeichö'quene 13,5 oneeja'jödö. ¹⁶ immaichäcä'de yaawä, 45 annaicho oneeja'jödö'cä wa'cä inwaju'jä jonno, mönaatata tödööcä'de shuuda'wawä, mentaana mmaja tödööcä'de annaicho oneeja'jödö'cä wa'cä dhaadö jonno yeichö. ¹⁷ Etaacä eduuwa, öwwä tunaamä enno'jatoojo aca ä'döjai nä'döi edä nono de'cäi, tameedä edä nono de'wä naatoodö acoichajoodö wetä, tameedä edä nono de'wä naatodö näja'ato'de yaawä. ¹⁸ Yaawäne, äwwä wääcammaadö chäänönge wödöa'de, aamäädä odhoomonga'de cudiiyada adai'joto aca, ajinñaamo mmaja, änacomo mmaja, ajaadantomo mmaja. ¹⁹ Tameedä nudä naatoodö edä nono de'woncomo mmaja amnno'jocooto 'de cudiiyada adai'joto aca ajaadä , tooni dhanwa ,tooni mmaja wodi, ääma'da yeichöcoomo wetä. ²⁰ Tameedä tadiiñaamo, odoocajacomo mmaja iju'jä waadäi, töweenöca'como wötäädö mmaja, aacäi chääwaadäiñe ne'ato'de ädöiña, äwwä ewaanacaadööcomo wetä. ²¹ Adhewaashiiñö ani'jummacä, mishoomaiye yaawä, odoocaja'como ewanshiñöcomo mmaja, adheewanshiyööcomo'je yeichö wetä yaawä,"quee cönä'döaacä Wanaadi. ²² Määdäje Noe cönnöi tameedä töwwä Wanaadi necamma'jödö nönge.