¹ Ntyo bube ba lwiganyo lwa N'namahanga,nka bana bazigirwa; ² Mugenderer'omu buzigire,oku lwiganyo lwa Kristu,owarhusimaga,anachihana yen'emwa N'namahanga enyanya zirhu nka nterekero na ntulo y'ibaya linja. ³ Obugonyi,kand'erh'izinga lyoshi lyoshi,erh'olwifinjo,birhachikumuzibagw'omu karhi kinyu,nkoku bishinganin'abachesebwe. ⁴ Birhayunvikanag'ebinwa bye nshonyi,kandi erhi bya kadali,erhi bya kalimi,chikone rhukayunva mwavug'omunkwa. ⁵ Bulya,mumanye bwinja,oku nta mugonyi,erhi muntu w'izinga,erhi wa lwifinjo,kokuderh'oku,okachikumb'enshushano,arhagwerhi mwimo omu bwami bwa Kristu na N'namahanga. ⁶ Omuntu yeshi yeshi arhamurhebaga n'ebinwa bo buhwinja,buly'ebyo byo birhuma oburhe bwa N'namahanga bwaj'oku banamwanga. ⁷ Murhagwarhe lushangi mweshi. ⁸ Burhanzi mwali mwizizi,chi lero mukola bulangashane muli Kristu.Mugendage nka bana ba bulangashane. ⁹ Buly'amalehe go bulangashane gabineker'omu bwinja,om'okuli n'obushinganyanya. ¹⁰ Mukalolerez'ebyaka simisa N'nahamwirhu. ¹¹ Murhaka shangir'ebijiro by'omwizizi birhanaleheka,chi koki mukabishoholera. ¹² Bulya ziri nshonyi okuderh'ebi bakajir'omu ihwe. ¹³ Buly'ebya shoholirwe binaka bonekana n'obwalagale omu bulangashane,buly'ebiyalagazibwe buli bulangashane. ¹⁴ Cho chirhumire bidesirwe:Tuluka w'ohunire,zuk;omu mifu,na Kristu akulomekera. ¹⁵ Musingirize bwinj'oku mwaja genda,arhali nka bihwinja,chi nka bengehushu. ¹⁶ Murhahez'akasanzi buly'ensiku ziri mbi. ¹⁷ Cho chirhumire murhabe ba busha,chi mumanye buhi bulonza bwa N'nahamwirhu. ¹⁸ Murhaka laluka amanvu,mub'obugonyi,chi muyunjuzibwe na Muka. ¹⁹ Mukashambazanya omu nyimbo z'emurhima,mukayimba n'okukuza n'omurhima gwoshi irenge lya N'nahamwirhu. ²⁰ Muka kua larha N'namahanga,ngasi mango,okw'izino lya N'nahamwirhu Yesu Kristu. ²¹ Muka kengana haguma n'okuyoboha Kristu. ²² Mwe bakazi mukenge ba balo nkoku munakenga Kristu; ²³ buly'omulume ye mukulu w'omukazi,nkakula Kristu ye mukulu wa kanisa,gwona mubiri gwage,y'onai muchiza. ²⁴ Aho,nkakul'akanisa kakenga Kristu abakazi nabo bashinganin'okujira ntyo emunda biba bali oku bintu byoshi. ²⁵ Mwe balume musime bakinywe,nkakula Kristu asimaga akanisa,lero achihana yene enyanya lyako. ²⁶ mpu lyo akachesa kugerer'akanwa,enyuma lyokukashuk'oku bubatizo bwa mishi, ²⁷ alonz'abone akanisa karhagwerhi ishembo,karhali kw'izabe,erhi lukunye kunye,chi kabe kimana na keru kweru. ²⁸ Ntyo kwa bashemuka bakwanin'okusima bakabo nkoku bachisima bonne,nka mibiri yabo bone,osima mukage eerhi yen'ochisimire. ²⁹ Bulya ntaye osingi gay'omubiri gwage,ch'anaka gulisa,anagukombere,kula Kristu anakomber'akanisa. ³⁰ Bulya rhuli birumbu bya mubiri gwage. ³¹ Chochirhumire omulume anasiga ishe na nnina,anachishwekere ko mukage,n'abo bombi babe mubiri muguma. ³² Eri ihwe liri linene chi ndesir'enyanya lya Kristu na Kanisa. ³³ Oku bisigire,ngasi muguma winyu asime mukage nkoku achisima yene,n'omukazi akenge iba.