¹ Ntyo, bene wirhu batakatifu,mwe mushangire enshokano y'empingu. mulolekwo Yesu,yo ntumwa na mudahwa mukulu w'obwemere bwirhu. ² Ye lubiyunvubwa na Nnamahanga,owamuyimikaga,nkakulya Musa naye anali munvi omu mulala gwa Nnamahanga gwoshi. ³ Neci Yesu abwine irenge lilushire erya Musa,nka kulya omubasi analusha enyumpa ayubakaga. ⁴ Bulyala ngasi nyumpa ejira owayiyubakaga,n'owayubakaga byoshi ye Nnamahanga. ⁵ Musa ali mwemezi omu mulala gwage goshi nka mushizi,mpu abe muhamirizi wa ngasi ebyaderhwe. ⁶ Ci Kristu yehe kwali mwemezi nka mwene nna_nyumpa mpu arheeke abamwo boshi.N'eyo nyumpa yo rhwe casinga rhusere burhashubira nyuma oku bulangalire n'oku mwishingwe gw'oku rhwahike omu mpingu. ⁷ Kwo kurhumire nkakulya Muka Mutakatifu aderhaga,erhi: '' Ene_ene mukayunva izu lyage ⁸ murhajiraga emirhima yinyu nkakulya byabaga omu bugoma,lulya lusiku lw'eshumi omwirungu. ⁹ Bulya basho winyu bantagulaga mpu bandole,n'obwo bali erhi babwine ebijiro byani myaka makumi ani goshi. ¹⁰ Kwokwarhumire nnakunirira eri iburha,naderha,"Bali bamurhima gwa muhaba;barhishi enjira zani." ¹¹ Omu bukunizi bwani nanacicigasha nti: "Barhankalabarha omu luhukiro lyani." ¹² Mumanye,bene wirhu,murhabagamwo ow'omurhima mubi n'omubula_bwemere mpu aciyengule na Nnamahanga in'obuzine. ¹³ Ci mukahanulana bwaca bwayira obu lwene lucihali,lyomurhagirhegamwo owomurhima muzibu,amarhebwa n'ecaha. ¹⁴ Kali rhwe rhukola baguma na Kristu,casinga rhulage obwemere bwirhu buzibu kuhikaokufa,nkokulya rhwanarhagiraga. ¹⁵ Kwo rhwabwizirwe,mpu: "Ene_ene,mukayunva izu lyage murhajiraga emirhima yinyu mizibu,nkakulya byabaga omu bugoma." ¹⁶ Bahi balya bagomaga barhanayunvagya izu lyage? Karhali balya boshi barhengaga e Misri,balongolirwe na Musa? ¹⁷ Na bandi Nnamahanga akunirira myaka maku ani? K'arhali balya bajiraga ebyaha,bonabalya emirhumba yabo yalambikagwa omu irungu? ¹⁸ Nabahi acigashiraga mpu barhakalabarha omu buluhuko bwage,aha nyuma lyabalya bamugomeraga? ¹⁹ Kwo byanabire rhuyishi oku barhalabarhagamwo erhi kubula obwemere bwabo burhuma.