¹ Wacala futsi wafundzisa eceleni kwelwandle, sucuku lesikhulu sambunganyela. Wagibela esikebheni lesasise lwandle, wahlala phansi kuso. Sonkhe sicuku sasiselugwini eceleni kwelwandle. ² Wabafundzisa tintfo letinyenti ngemifanekiso, etifundzisweni takhe, naku lakusho kubo. ³ "Lalelani! Umlimi waphuma wayohlanyela inhlanyelo yakhe. ⁴ Asahlanyela, lenye yawela emgwacweni, tafika tinyoni tayidla. ⁵ Lenye inhlanyelo yewela emhlabeni losetikwelidvwala, lapho bekute khona umhlaba lowanele. Masinyane yachuma, ngobe beyite umhlaba loshonako. ⁶ Kodvwa nakuphakama lilanga, letitfombo tashiswa lilanga, futsi ngoba betite timphandze, toma. ⁷ Lenye inhlanyelo yawela etihlahleni temanyeva. Emanyeva akhula ayicindzetela, ayizange ikhicita sivuno. ⁸ Lenye inhlanyelo yawela emhlabeni lomuhle yatsela titselo yakhula yakhicita yefika emashumini lamatsatfu,lasitfupha futsi nase khulwini." ⁹ Wase utsi, ''Loyo lonendlebe yekuva, akeve!" ¹⁰ Nasekayedvwa Jesu, labo bebadvute naye kanye nalabalishumi nakubili bambuta ngalemifanekiso. ¹¹ Watsi kubo, "Nine ninikiwe imfihlakalo yembuso waNkulunkulu. Kodvwa kulabo labangaphandle yonkhe intfo ingumfanekiso, ¹² khona nababuka, yebo bayabuka, kepha ababoni, futsi khona uma beva, yebo bayeva, kepha abacondzisisi, ngobe funa bagucuke bese Nkulunkulu uyabacolela." ¹³ Watsi kubo, "Aniwucondzisisi yini lomfanekiso? Nitayicondzisisa kanjani ke yonkhe imifanekiso?" ¹⁴ Umhlanyeli uhlanyela livi. ¹⁵ Laba ngulabo labasendleleni, lapho kuhlanyelwe khona lelivi. Uma baliva, Sathane uyefika masinyane asuse lelivi lelihlanyelwe kubo. ¹⁶ Lena ngulenhlanyelo lehlanyelwe elukhetseni; lekutsi, uma beva lelivi ngekushesha bayalemukela ngekujabula. ¹⁷ Kepha bete timphandze kubo, kepha baligcina sikhashana. Emvakwaloko uma tinhlupheko noma kutingelwa kufika ngenca yelivi, basheshe bawe endleleni. ¹⁸ Kunjalo labanye ngulobo labahlanyelwe emanyeveni. Ngulabo labalivako lelivi, ¹⁹ kodvwa banake titfo temhlaba nekukhohlisa kwebunjinga netinkhanuko taletinye tintfo tiyefika tikhabe lelivi, bese alisakhiciti. ²⁰ Labo labahlanyelwa emhlabeni lomuhle ngulabo labeva lelivi, balemukele batsele titselo, emashumi lamatsatfu, emashumi lasitfupha, noma ke likhulu lonkhe bunyenti. ²¹ Jesu watsi kubo, "Ningenisa sibane ekhatsi endlini kusibeka phasi kwelibhasikidi noma ngaphansi kwembhede? Uyasingenisa usibeke etafuleni lwesibane. ²² Ngoba kute lokufihlakele lokungeke kwatiwe, futsi kute lokuyimfihlo lokungeke kuphumele ebaleni. ²³ Uma khona lonendlebe yekuva,akeve!" ²⁴ Watsi kubo, "Nakisisani loko lenikuvako, ngoba lesilinganiso lenisisebentisako kuyawuba silinganiso sakho, futsi lokunyenti kuyawengetwa kuwe. ²⁵ Ngoba loyo lonako, kuye kuyawengetwa lokunyenti, futsi loyo lotawube ete, naloko lanako kutawutsatfwa." ²⁶ Watsi futsi, "Umbuso waNkulunkulu ufana nendvodza lehlanyela inhlanyelo yayo emhlabatsini. ²⁷ Uyalala ebusuku avuke emini, inhlanyelo iyachuma ikhule, naloku angati kutsi kanjani. ²⁸ Umhlaba utsela emabele ngekwawo: Kucala lihlanga, bese kuba yinhloko, bese kuba ngemabele lavutsiwe. ²⁹ Uma sekuvutfwe lesivuno, ngekushesha utfumela lisikela ngoba kuvuna sekufikile.'' ³⁰ Waphindze watsi, ''Singawulinganisa ngani umbuso waNkulunkulu, noma ngumuphi umfanekiso lesingawusebentisa kuchaza wona? ³¹ Ufaniswa nenhlavu yendlulamitsi, letsi, uma ihlanyelwa, yincane kwendlula tonkhe tinhlavu letikhona emhlabeni. ³² Kantsi, uma ihlanyelwe, iyakhula ibe yinkhulu kwendlula tonkhe titfombo letikhona engadzeni, yakha emagala lamakhulu, khona tinyoni tezulu titowakhela tidleke emtfuntini waso.'' ³³ Ngemifanekiso leminyenti lefana nalena wakhuluma livi kubo, kangangaloko labebangakucondza, ³⁴ akazange futsi wakhuluma nabo ngaphandle kwemfanekiso. Kodvwa uma sekayedvwa, wachaza tonkhe letintfo kubafundzi bakhe. ³⁵ Ngalelo langa, nase kuhlwile, watsi kubo, "Aseweleleni ngesheya." ³⁶ ngako bashiya sicuku, bahamba naJesu, asese, ngekhatsi emkhunjini. Kwakunaleminye imikhumbi leyayihambisana naye. ³⁷ Kusenjalo kwaphakama sivunguvungu semoya, emagagasi abengena ngekhatsi emkhunjini kangangekutsi lomkhumbi besewubange kugcwala emanti. ³⁸ Kodvwa Jesu lucobo lwakhe abengemuva emkhunjini, alele emcamelweni. Bamvusa, batsi, ''Mfundzisi, awunandzaba kutsi naku sesitawufa?'' ³⁹ Wavuka, wawekhuta umoya, watsi elwandle, ''Kuthula! Mani!'' Umoya wema, kwaba nekuthula lokukhulu. ⁴⁰ Wase utsi kubo, ''Nesabani? Solo nite kukholwa?'' ⁴¹ Bagcwala kwesaba lokukhulu batsi kungamunye ngamunye, ''Ngubani kantsi lona, ngoba ngisho nemoya nelwandle kumtfobela?''