¹ Waphindza futsi Jesu wangena ekhatsi esinagogeni, lapho kwakunendvodza leyayinesandla lesincane lesifinyele. ² Labanye bantfu bamcaphelisisa Jesu bagadze kubona kutsi utayiphilisa yini lendvodza ngeLisabatha kute batombeka licala. ³ Jesu wakhuluma kulendvodza leyayinesandla lesincane lesishwaphene watsi,' Sukuma ume lapha emkhatsini wabobonke labantfu.' ⁴ Wabese sewutsi kulabantfu,' Ngukuphi lokusemtsetfweni, kwenta lokuhle noma kwenta lokubi ngelilanga leliSabatha; kungaba kusindzisa umphefumulo noma kubulala?' Bavele bonkhe babindza batsi dvu. ⁵ Wasuluka wababukisisa agcwele kukwata, weva buhlungu enhlitiyweni ngenca yebulukhuni betinhlitiyo tabo, wase utsi kulendvodza,' Yelula sandla sakho'. Lendvodza yaselula lesandla, sandla sayo saluleka sabuya saba kahle. ⁶ Bafarisi baphumela ngephandle, ngekushesha bacala bahlanganisa licebo neBaherodi kutsi bangaze bambulale kanjani. ⁷ Emvakwaloko Jesu wahamba nebafundzi bakhe baya elwandle, sicuku lesikhulu sebantfu sabalandzela sichamuka eGalile, eJudia, ⁸ eJerusalema, eIduma nangesheya kwemfula iJodane naseThaya naseSidoni. Emva kwekutsi bantfu labanyenti beve ngetintfo letinkulu lebetentiwa nguJesu, sicuku lesikhulu seta kuye. ⁹ Ngenca yesicukule lesikhulu, watjela bafundzi bakhe kutsi bamlungisele sikebhe lesincane labetawuma kuso kute ticuku tingamuminyanisi. ¹⁰ Phela Jesu abephilise bantfu labanyenti kakhulu kangangekutsi wonkhe wonkhe labenekuhlaseleka weta kuye aphokophele kutsi amtsintse. ¹¹ Ngasosonkhe sikhatsi nangabe imimoya lengcolile imbona, yayiwa phansi embikwakhe imemete itsi,' Wena uyindvodzana yaNkulunkulu.' ¹² Jesu wayiyalisisa kutsi ingembuli kutsi ungubani. ¹³ Wakhuphukela entsabeni wase ubita labo lebekabadzinga, beta kuye. ¹⁴ Emkhatsini wabo wakhetsa labalishumi nababili (labo -ke wabetsa watsi bapostoli) kute bahlale banaye kute akhone kubatfuma bayewumemetela umbiko (welivangeli), ¹⁵ nekutsi abanike emagunya ekucosha emadimoni. ¹⁶ Wakhetsa naba labalalishumi nababili: Simoni, lametsa watsi nguPhetro; ¹⁷ Jemusi indvodzana yaZebedi, naJohane umnakabo Jemusi, lalababili wabetsa watsi boBhwanejisi, lokusho kutsi, emadvodzana embane; ¹⁸ naEndru, Filiph, Bhatholomu, Matewu, Tomasi, Jemusi indvodzana yaAlfiose, Thadeyusi, Simon umZilothi, ¹⁹ naJudasi Iscariothi, lona labetawumkhaphela. ²⁰ Emva kwaloko wabuyela ekhaya, ticuku tebantfu nato tabutsana kabusha, baze behluleka ngisho kudla lokungenani noma sesinkhwa nje. ²¹ Na umndzeni wakubo wuva ngaloko, wase uyaphuma uyawumbamba, ngoba bewutsi,' Uphambene ingcondvo'. ²² Babhalimibhalo lebebabuya eJerusalema batsi', Ungenwe nguBhelzebhali' nekutsi' ukhipha emadimoni ngemholi wemadimoni.' ²³ Jesu wababitela kuye wase ukhuluma ngemifanekiso watsi,' Kodvwa kungenteka kanjani kutsi Sathane aticoshe? ²⁴ Nangabe umbuso sewumacembucembu umelene wodvwa, lowo mbuso ngeke ukhone kuma. ²⁵ Nendlu nayehlukene yamelana yodvwana, leyondlu ingeke ikhone kuma. ²⁶ Na Sathane asativukele futsi ehlukene ekhatsi. angeke akhone kuma, kodvwa usuke asafike esiphetfweni sakhe. ²⁷ Futsi -ke, kute umuntfu longangena endlini yesichwaga antjontje tintfo taso angakacali kucala wakhunga lesichwaga, khonane atewukhona kutibutsela endlini yaso. ²⁸ Ngekweliciniso ngitsi kini, tonkhe tono letentiwa ngemadvodzana ebantfu titawucolelwa, ngisho nako konkhe kuhlambalata labakukhipha ngemilomo yabo, ²⁹ Kodvwa noma ngubani lohlambalata Moya Loyingcwele akasoze emukeliswe kucolelwa, kodvwa unelicala lesono saphakadze.' ³⁰ Jesu wakusho loko ngobe bebatsi ,' Unemoya longcolile'. ³¹ Kwabese kufika make wakhe kanye nabomnakabo befika bema ngaphandle. Batfumela, bambita. ³² Sicuku sasihleti simkikile , sase sitsi kuye,' Make wakho nabobhutiwakho balapha ngephandle, bayakufuna.' ³³ Wababuta watsi,' Ngubani make wami nabobhuti bami?' ³⁴ Wabuka acalata bonkhe laba lebebamkakile wase utsi.' Niyabona, nangu make wami nabomnaketfu! ³⁵ Ngobe noma ngubani lowenta intsandvo yaNkulunkulu, loyoke nguyena bhuti wami, dzadzewetfu kanye namake.'