¹ Mualolo tolilileni kuli viye Yehova na handekele, ''Hindukeni na ku haka mukanda kumesho a mukinya; liga mikinya yitolilile lijui lyeni. ² Tolilileni, eni mikinya, vyali na ku vangeya Yehova, eni vaka luvula lua hantci. Muomu Yehova ali na vidhala vya kupangula hamo na vantu vendi, keho endi akalua mu chipangulo na va Yisaleli. ³ Vantu vange, vika vinja viyitha kuli nyeni? Vati nja ku mi teuetheleyeni? Nji kuanyeni! ⁴ Muomu ange nja mituhuithile yeni kutunda mu chifuti cha Yingito na ku myohela yeni kutunda ku njivo ya kayando. Nja tumine Mosesa, Alone, na Miliyame kuliyeni. ⁵ Vantu vange, thinganyekeni vika Mbalake muene ua Moave, na vati Mbalame muna ua lyala ua Mbeole ua kuanyene yikeye ngue yeni mua yile kutunda ku Shitime ku Ngilangale, ngocho eni linga mudhivuke vuchili vipanga vya Yehova. ⁶ Vika njika hana kuli Yehova, ngue nji tcikamena kuli Kalunga ua kuilu ndi? Nji kenja kuli yikeye hamo na vikombeleyo vya kutcimika ndi? Na vana vingombe va vakuluntu ndi? ⁷ Yehova vika muya ku mbunge na makulukadhi a vinjui vya vimala, ndi likumi lya makulukadhi a vindinga vya madhi ndi? ⁸ Endi ua milekele yeni nguendi, muntu, vika vya chili, keho vika vyana yongola Yehova kuli yeni: Panga vya chili, chidhango cha chili, na kuenda na ka thingimiko hamo lika na Kalunga kove. ⁹ Lijui lya Yehova lipanga vuovoke kuli vaka membo akama_nambe mualolo teua lidhina lyove: ''Tolilileni ku lijui, na kuli umo uye ami haka mu muhela. ¹⁰ Kuye kua kala vufuko mu njivo ya vaka ku vihya vaye vaku yeneka kutcelela, na vaye vapanga vya ku vihya. ¹¹ Kuatha nji shuame muntu ku kala kua kulikehetha nga endi apanga vyaku viyitha, hamo na ku kuata vulemu ndi? ¹² Muntu muka kufuka ali na muyoyo ua kama, endi ua kala na ku handeka vishaki, na vindaka vyavo mu kanua kavo vye ku kuitha. ¹³ Ngocho vene ange njika panga yeni mu vavale, na ku mihiluitha munima, kupanga yeni mukale vakushoka muomu lya milonga yeni. ¹⁴ Muka lya vuno kumu kekuta; vungocho vueni vuka kala mukati keni. Muka pungula vya chili ku lahako vuno kuvi ka vanda, keho vika uuka panga uovoke njika hana ku mukuale. ¹⁵ Uka kuna vuno ku uka kunguiya; uka tombeka viti vya olive vuno ku uka livuavetha yove vavenya na madhi; uka tcekenyena manjembele vuno ku ka nu vinyu. ¹⁶ Mua talele vitume vya Omeli, na vipanga vya njivo ya Ahambe. Eni muendele mu vingila vyavo, ngocho vene ange njika mihana ku tuvakanena ku ku viyitha na ku kala ku vipanga, keho eni mukema lipungu lya ku vantu vange.