¹ Chikele change! Ange nji nakala ngue mbunga ya vushuka vua njombo, keho ngue manjembele aye uva natambuile; kuye kukua kele chiti cha manjembele aku lya, ku kua kele chiti cha vushuka ua ku livanga chiye muvila uange uka yongola. ² Vaye vaka kutcelela vamo vadhimanganene kutunda ku chifuti; kuye ku kua kele muntu ua vungulu mu vantu voshe. Vakevo voshe vaka vishaki mu ku tatela ku muanya maninga; nkala umo aka ta munayina ua lyala na vuanda. ³ Mavoko avo achili mu ku panga vyaku vihya: muka shika akehula vimbongo, muka kupangula endi na li vuayethela ku kuitha, na muntu ua ndhili yikeye aleka vakuavo viye vya yongola yikeye. Muomu vakevo va likunguiya kumo lika. ⁴ Vachili vavo vana kala ngue va kuvihya, vavengi va vuchili vana kala kutuvakana nchongo ya manja. Liklyo litangua liva muylekele vantu vaka kutalela, litangua lyeni lya kayando. Mualolo ntcimbu yavo yaku va kuitha. ⁵ Keti muka tcelele vamo va mahalambo veni; keti muka hake ndhili yeni mu vamo va vuthamba veni. Kutunda nambe mukentu uye nakotha mukushangala kutakametha ku kovela mukanua kove. ⁶ Muomu muna ualyala kaka thingimika yishe, na muna mukentu aka shituka na ku luitha vayina, na va yina mueno va luitha va nayemueno. Na muka chidhindo ua lyala vakevo vantu va muimbo lyendi vavenya. ⁷ Vuno ngue muomu yange, njika tala kuli Yehova. Njika tatela kuli Kalunga ua vuovoke vuange; Kalunga aka njuvua yange. ⁸ Keti muyolele hali yange, vaka chidhindo change. Kunima nji nau, njika hinduka. Muye munji tumama mu muthithi, Yehova akala cheke kuli yange. ⁹ Muomu njina panga mulonga kuli Yehova, njika kala na kathingimiko noho endi nethela na ku pangula yange. Endi aka njineha yange ku cheke, keho njika mona vungulu vuendi. ¹⁰ Keho vaka chidhindo change vaka chimona, na shuama yikenja kuli uye umo ua handekele kuli yange nguendi, ''Kuiko ali Yehova Kalunga kove?'' Na mesho ange aka tala yikeye; endi vaka mulyatangela ngue lilova lya mu vingila ¹¹ Na litangua kutunga vi vumbe vyeni likenja; ha litangua liye vivumbe vyoshe vaka vishueneyha kula hako. ¹² Ha litangua liye vantu vakenja kuli yove, kutunda ku Asiliya na membo akama aku Yingito, kutunda Yingito na ku ya Ku Ndonga, kutunda ku kalunga ndonga ku kalunga ndonga, kutunda ku mukinya ku mukinya. ¹³ Vuno chifuti chika kala cha kushoka muomu vantu vaye vakala muye, muomu lya vushuka vua vipanga vyavo. ¹⁴ Takametha vantu vove na mulamu, na vutanga vuove vua kuhinga. Vakevo vakala likalyavo mu ku kala, mukati ka chifuti cha viti. Linga va lime mu Mbashane na Ngileande ngue mu matangua a laya. ¹⁵ Ngue mu matangua muye ove mu ua tuhukile mu chifuti cha Yingito, ange njika va leketha vakevo vikomoketho. ¹⁶ Na mishovo yikamona na ku kala na shuama na vindhili vyavo vyoshe. Vakevo vaka haka mavoko avo mu milomo yavo; matui avo akala tuthinda matuitui' ¹⁷ Vaka kalya likungu lya linoka, ngue vya kupanga viye vili koka hantci. Vakevo vaka tuhuka na lyova; vaka kala na lyova lyove, Yehova Kalunga ketu, keho vakevo vaka kala na lyova muomu yove. ¹⁸ Yiya Kalunga ngue yeni_uye atambula milonga yeni, uye a hititha milonga yeni ku kuhinga chendi ndi? Endi keku shueketha vukalu ku myaka yoshe muomu endi ahaka cheke mu chikombeleyo chendi cha lutcelelo. ¹⁹ Uka kala na ngodhi ha li yetu; uka lyatangela milonga kuintci lya vilyato vyove. Ukombila milonga yetu yoshe muintci lya Kalunga ndonga. ²⁰ Uka hana vungulu kuli Yakomba na chikombeleyo cha kutcelela kuli Avilahama, ngueyove ua lithingile kuli va shukulu ku ncimbu ya laya.