¹ Mualolo yinjeni kumo mu ndhita, vana va vakentu va vakandhita! Na chivumbe chi va hakele hakati ketu! Na milamu va pupile vaka kupangula va Yisaleli ha hanga. ² Vuno eni, Mbeteleheme Efelatahe, nambe ngocho eni muva vandende hakati ka mushovo ua Yunda, kutunda muli yeni umo akenja kuli yange ku shika mu Yisaleli, vaye vashangumuka vakevo kutunda ku ntcimbu ya shukulu, ku kalelela. ³ Ngocho vene Kalunga aka vahana vakevo kuilu, nohontcimbu muye mukentu uye ali muku thema kanike, na va munayina voshe va vamala vaka hiluka kuli vantu va Yisaleli. ⁴ Endi akemana na ku takametha vutanga vuendi mu ndhili ya Yehova, mu vukama vua lidhina lya Yehova Kalunga kendi. Vakevo vaka thala, muomu keho endi aka kala uakama ku ku manethela kua hantci. ⁵ Yikeye aka tuhana chivovo. Muye va Siliya vakenja mu chifuti chetu, muye mu vakenda na vilyato kuli yetu, keho tuka hinduka tulue na vakevo vaka kutakametha vatanu na vavali na va ntuamena vatanu na vatatu kuilu lya vamala. ⁶ Vakevo vaka takametha chifuti cha Siliya hamo na mukuale, na chifuti cha Nimelonde mju vukovelelo vuacho. Yikeye aka tuoyela kuli va Siliya, muye muva kenja mu chifuti chetu, muye mu vakenda mukati ka vingamba vyetu. ⁷ Mushovo ua Yakomba uka kala mukati kava vantu vavengi, ngue lime litunda kuli Yehova, ngue mema ali ha muila, aye kekutatelela muntu, keho vakevo kuve kutatelela vanike va vantu. ⁸ Mushovo ua Yahcomba uka kala hakati ka mishovo, hakati ka vantu vavengi , ngue ndumba ali hakati ka tuthitu vamu muthenge, ngue vana vandumba vali hakati ka vutanga vua vinjui. Muye muaya hali vakevo, endi ava jajetha vakevo na ku vatavula vakevo mu vimbalavala, keho ku kala umo aka vovola vakevo. ⁹ Livoko lyove vaka lijundula kuli vaka chindhindo chove, keho lika va viyitha vakevo. ¹⁰ ''Vika kala mu litangua liye''_Evi vikevyo vyana Handeka Yehova nguendi_''Ngechiye njika viyitha tukambe veni kutunda hakati keni keho njika njika thanyuona matemba eni. ¹¹ Njika viyitha membo akama mu chifuti cheni na kumbila hantci vimua fuka vyoshe. ¹² Njika viyitha vya vulodhi mu mavoko eni, keho eni kumu kapanga lalo vya vulodhi. ¹³ Njika viitha vya kushonga vyeni na mavue eni avi ngundhikutunda hakati keni. Eni kumu lemetha lalo vipanga vya muntu vya panga na livoko. ¹⁴ Njika shitula mikambo yeni ya Ashela kutunda hakati keni, keho njika viyitha membo eni akama. ¹⁵ Njika luitha mu matoto na vukalu ha mishovo yiye ku ya tolilile.''