¹ Vuno mu matangua aku manethela ku kenja vya vuye mukinya ua njivo ya Yehova vaka yitunga ngue muene ua kuilu lya mikinya yikuavo. Vaka yishangala kuilu lya mikinya, na vantu vka kala kuli yikeyo. ² Mishovo ya yingi yikaya na ku handeka nguayo, ''Yinjeni, lingeni tukanduke ku mukinya ua Yehova, ku njivo ya Kalunga ua Yakmba. Yikeye aka tulongetha yetu vingila vyendi, keho tukenda mungila yendi.'' Momu kutunda Siyono lishiko lika tuhuka, na lijui lya Yehova kutunda Yelusalema. ³ Yikeye aka pangula hakati kavantu vavengi na ku thinganyeka kushuama muvalu ua mishovo ngila ya ku lahako. Vakevo vaka pupa mikuale yavo muku pulula na makunga avo. Mushovo ku uka yundula kuilu mukuale ku katukila mushovo ukuavo, ndi vaka longetha muomu lya ndhita lalo. ⁴ Nambe, vakevo vaka tumama nkala muntu muintci lya vinyu yendi na muintci chiti chendi cha mukuyu. Naumo uahi aka va teuetha vakevo, muomu kanua ka Yehova ua vimbunga muana handekele. ⁵ Muomu vantu voshe vakenda, nkala umo, mu lidhina lya lya kalunga kavo. Vuno etu tukenda mu lidhina lya Yehova Kalunga ketu ku myaka yoshe kuye kulenga. ⁶ ''Ha litangua liye''_ evi vikevyo vyana handeka Yehova ngendi_''Njika kunguiya vilema na ku kungulula vaka kuthinga na vaye voshe vunja yandethele. ⁷ Njika tengulula vilema linga vende, na vaye vamo vashingile mushovo kundhili, keho yange, Yehova, njika shika vakevo ha Mukinya ua Siyono, mualolo na ku myaka yoshe. ⁸ Ngue muomu yeni, vaka kutakametha muomu lya vutanga, mukinya ua vakentuva Siyono_kuli yeni vikenja, ueni ua kunima ya kuvula vaka hindula, vumuene vuye vua kala kuli vakentu va Yeliusalema. ⁹ Mualolo, vika mutambakanena ngocho muakama?Ku mua kele na muene hakati keni ndi? Vaka ku mishika veni vatca ndi? Evi vikevyo vivavaletha ngue mukentu mu ntcimbu ya kuthema yiviyitha yove ndi? ¹⁰ Kala mu ku vavalana muku thema, vana vakentu va Siyono, ngue mukentu ali muku thema. Muomu mualolo uka ya muimbo lyakama, ku kala mu lihya, na kuya ku Mbambilone. Kuye vaka kuovola. Kuye Yehova aka tambula yove kutunda kulivoko lya muka chidhindo chove. ¹¹ Mualolo mishovo ya yingi vana likungulula kuluitha yove; vakevo va handeka nguavo, 'Lingeni tu viyithe yikeye; lingeni mesho etu amone kuye ku Siyono.' ¹² Vakevo kuva dhivukile mangana endi vya Yehova, nambe ku tolilila vithinganyeka vyendi, muomu endi na va kunguiya ngue vishaku vya mbuto vana vuayethela kuvitua vunga. ¹³ Hindukeni na ku yandetha, vana vakentu va Siyono, muomu njika panga vimbinga vyeni ku kala vikungu, keho njika panga chikanda chove chikale livue lya chili. Ove uka thanyuona vantu vavengi keho uka va thindiya vakevo kuvihya kutambula kuli Yehova, vufuko vuavo kuli Muene ua hantci hoshe.