¹ Nja handekele nguange, ''Tolilileni mualolo, eni vantuamena va Yakomba na vaka kushika membo a Yisaleli: Keti kuma vya vingulu yeni ku tolilila kuhitha ndi? ² Yeni vaye mua dhinda vuchili na ku yongola kuvihya, yeni vaye shuva chikanda chavo ha mivila, keho ntcitu yavo ku vitcihya vyavo_ ³ yeni vaye lalo mulya ntcitu ya vantu vange, na ku shuva chikanda chavo, na ku va tetanga mu vi mpindi vimpindi, ngue mbunda ya mu ndeho, ngue mbunda yamu poto. ⁴ Keho eni vaka kushika muka tambakana kuli Yehova , vunoendi ka ka mikuanya yeni. Aka sheka chihanga chendi kuli yeni ha ntcimbu yiye, muomu eni muna panga vipanga vya ku vihya.'' ⁵ Yehova ua handekele evi nguendi, ''Ngue ku va polofeto vaye vatuamena vantu vange ku ku vihya, nga umo ahana vakevo vimo vyuma vya kulya, vakevo vaka yongola, 'Chivovo.' Vuno nga endi ahaka na vimo vyahi mu milono yavo, vakevo vaka yongola vakevo vavenya ku fueto ya ndhita hali yikeye. ⁶ Ngocho vene, kuka kala matciki muomu eni kumona vimona vyeni kuahi; ku kala muthithi linga keti muka mukali hangunuke. Litangua lika shelela hali va polofeto, keho litangua lika dhivala hali vakevo. ⁷ Vaka ku mona vaka va haka ku shuama, vaka vungulu vakovua shuama. Voshe vakevo vaka fuika milungu yavo, muomu kuye ku kua kele kukuanya kutunda kuli Kalunga.'' ⁸ Vuno ngue muomu yange, njika shula na ndhili yaku Mpundhi ya Yehova, keho ange njina shulu muku hitha na vukama, ku handeka ku mulonga ua Yakomba, na kuli Yisaleli milonga yendi. ⁹ Mualolo tolilileni kuli evi, eni vantuamena va njivo ya Yakomba, na vaka kushika ku njivo ya Yisaleli, eni vaye mua yeneka kuyongola chihitho, na kuyengula nkala vyoshe viye vya vingulu. ¹⁰ Yeni mua tungile Siyono na maninga na milonga ya Yelusalema. ¹¹ Va ntuamena veni vapangula muomu lya vishaki, va sasendote veni va longetha muomu lya ndando, na vapolofeto veni vapanga vungulu muomu lya vimbongo. Keho eni muashuama hali Yehova na ku handeka ngueni, ''Keti Yehova ali netu ndi?Na umo mulonga ukenja hali yetu,'' ¹² Ngocho vene, muomu yeni, Siyono lika kala lihya lya ku pulula, Yelusalema lika kala vithanyu thanyu vya mavue, na mukinya ua tembele uka kala muhela ua laha ua kama.