¹ Yesu ua kovelele mu vuato, ua yavukile, keho uedhile kuimbo lyendi lyakama. ² Taleni, va munehelele yikeye muntu umo muka kalepa ua kothele ha muhela. Keho ha kumona kutcelela kuavo, Yesu ua handekele kuli muntu maka kalepa nguendi, ''Munange, vyukilila. Milonga yove va na yechela.'' ³ Taleni, vamo va ka kuthona vamo vali handekethele mu vimbunge vyavo vavenya nguavo, ''Lyala ou a shaula.'' ⁴ Yesu ua dhivukile vithinganyeka vyavo keho ua handekele nguendi, ''Vika muthinganyekela vya ku vihya mu vimbunge vyeni? ⁵ Muomu cha chingulu ku handeka nguendi, 'Vana kuechela milonga yove,' ndi na ku handeka nguavo, 'Katuka na kuenda?' ⁶ Vuno ngechiye mudhivuke ngechiye Muna Muntu ali na ndhili hano hantci kuechela milonga,...'' ua handekele kuli muka kalepa, ''Katuka, ambata muhela uove, keho kaye ku njivo yove.'' ⁷ Keho na muntu ua katukile keho ua yile kunjivo yendi. ⁸ Muye mbunga yamuene evi, vakele na lyova na ku shangala Kalunga, uye ua hanene ndhili yiye ku vantu. ⁹ Ngue Yesu ua tu vakanene kuye, uamuene muntu ua kuluka Mateu na tumama ha ku tambula lithimu. Ua handekele kuli yikeye nguendi, ''Nji shuame.'' Ua katukile na ku mushuama yikeye. ¹⁰ Ngue Yesu mua tumamene mu kulya mu njivo, taleni, vavengi vaka ku tambula lithimu na vaka milonga vedhile keho va tumamene hamo lika na Yesu na vandonge vendi. ¹¹ Muye va Faliseo vamuene viye va handekele kuli vandonge vendi nguavo, ''Vika mulongithi ueni alya hamo lika na vaka lithimu na vaka milonga?'' ¹² Muye Yesu uo vuile evi, ua handekele nguendi, ''Vantu va ka vukangule mu mivila kuva thetela chimbanda, vaye lika va vavala. ¹³ Vuno kayeni na ku lilongetha mana ano: 'Njili na liyango lya ngodhi keti chikombeleyo.' Muomu konjedhile mu ku thana va ka vungulu, vuno vaka milonga. ¹⁴ Keho vandonge va Youano vedhile kuli yikeye na ku handeka nguavo, ''Vika etu na vaFaliseo tue kuli kela kulya, vuno vandonge vove kuve kulikela kulya?'' ¹⁵ Yesu ua handekele kuli vakevo nguendi, ''Vaka kuambata kuatha ku kala na vuthiua ntcimbu vavenya vulo achili navo ndi? Vuno matangua akenja omo va ka vatundithila vavenya vulo, keho voshe va ka likela kulya. ¹⁶ Na umo uahi atongela chivando cha ntanga ya yiha ku vidhala vya laya, muomu chivando chiye china vuahela kudhikamo chika tavula vidhala, keho chihametha mbengua. ¹⁷ Nambe vantu ve kuhaka vinyu vya kuvihya ko ku vilongela mu vinjeke vya chikanda cha laya, nga vapanga ngocho, na vinjeke vika vituika, na vinyu ya chikata yika vihya. Umba, va longela vinyu mu vinjeke vya viha, keho va vitakametha vyoshe.'' ¹⁸ Omo Yesu ua handekele vyuma evi kuli vakevo, taleni, kuedhile umo muka kuhana lishiko, ua tcikamene kuli yikeye. Ua handekele nguendi, ''Munange ua mukentu natci mualolo vene, vuno yinja ukambeke livoko lyove hali yikeye, keho akovoka.'' ¹⁹ Keho Yesu ua katukile na ku mushuama yikeye, keho ngocho vapangele vandonge vendi. ²⁰ Taleni, mukentu umo uye ua yandele myaka likumi na yivali vuvedhi ua kuhita maninga uedhile ku nima ya Yesu keho ua kuatele livoko ku mukunduilo ua vidhala vyendi. ²¹ Muomu yikeye ua handekele kuli yendi vavenya, ''Nga nji kuata livoko lika ku vidhala vyendi nji ka kanguka.'' ²² Vuno Yesu ua tengulukile ua mumuene yikeye, na ku handeka nguendi, ''Vyukilila muna mukentu, kutcelela kuove kuna ku kanguitha.'' Keho na mukentu ua kangukile ha ntcimbu yiye vene. ²³ Muye Yesu uedhile munjivo ya muka kuthika, ua muene vaka kuthika malumbendo na mbunga ya kele na ku neha muyoyo, ²⁴ Ua handekele nguendi, ''Shondolokeni, muomu muna mukentu katcile, vuno ali mutulo.'' Vuno va muyolele na ku mushaula yikeye. ²⁵ Muye mbunga va yituhuithile hanja, ua kovelele munjivo ua mukuatele ku livoko muna mukentu ua hindukile. ²⁶ Na mudhimbu ua vyuma evi ua lishandanganene kumembo oshe amandende. ²⁷ Ngue Yesu ua tuvakanene kuye, tupuputua vavali vavala vamushuamene yikeye. Vatambakanene na ku handeka nguavo, ''Tu vuile ko ngodhi, Muna Ndaviti!'' ²⁸ Muye Yesu uedhile ku njivo, tupuputua va vamala vedhile kuli yikeye. Yesu ua handekele kuli vakevo nguendi, ''Muna tcelela ngechiye njatha ku vipanga evi ndi?'' Va handekele kuli yikeye nguavo, ''Mukemo, Muene.'' ²⁹ Keho Yesu ua kambekele mavoko kumesho avo na ku handeka nguendi, ''Linga vachipange kuli yeni kushuama ku kutcelela kueni,'' ³⁰ keho mesho avo ashukile. Keho Yesu ua ve shikile na ku handeka navo nguendi, ''Taleni ngechiye na umo uahi avi dhivuka evi.'' ³¹ Vuno vamnala vavali vayile hanja na ku tcimanetha mudhimbu ua vyuma evi muimbo liye lya lindende. ³² Ngue vaye vamala vavali vayile, taleni, na lyala ua kuholoka kumpundhi ya ku vihya va munehele kuli Yesu. ³³ Muye mpundhi yaku vihya vayi tuhuithile mo, na muntu ua kuholoka ua handekele. Na mbunga ya komokele na kuhandeka nguavo, ''Evi kanda tu vimone kumesho ava Yisaleli!'' ³⁴ Vuno va Faliseo va handekele nguavo, ''Ue kuleka vimpundhi vya kuvihya, ue kutunditha vimpundi vya kuvihya.'' ³⁵ Yesu ua hitanganene muaya membo akama na ku membo amandende. Ua longethele mu vithinangonga vyavo, ua mbuluile mudhimbu ua chili ua vumuene na ku kangukitha mavedhi oshe. ³⁶ Muye mua muene mbunga, ua kele na ngodhi ya vakevo, muomu vakele mu vitanga na ku va dhembeleka. Va kele ngue vinjui va ku yeneka muka ku va takametha. ³⁷ Yikeye ua handekele kuli vandonge vendi nguendi, ''Na mbuto yili ya yingi, vuno vaka kupanga va vandende. ³⁸ Ngocho vene lombeni kuli Muene ua vimbuto, ngechiye linga aka tume vaka kupanga mu lihya lyendi.''