¹ Yesu ua thanene vandonge vendi likumi na vavali kumolika keho ua va hanene ndhili ya ku tunditha vimpundhi ya kuvihya vakevo, keho na ku va kanguitha ku mavedhi oshe. ² Mualolo madhina ava positolu vaye likumi na vavali. Ua kulivanga, Simone (Yikeye lalo ua kuluka Petulu), na Anduleu munayina; Tiango muna Zembende, na Youano munayina; ³ Filipu na Mbatolomeu; Tomasi, na Mateu muka kutambula lithimu; Tiango muna Alefeu, na Tandeu; ⁴ Simone ua ku kanana, na Yundasa Yisakalyota, uye ua muendele vungungu yikeye. ⁵ Ava likumi na vavali Yesu ua va tumine. Ua ve shikile vakevo na ku handeka navo nguendi, ''Keti muye ku mihela ya vaka vifuti, keho keti muka kovele mu membo aku Samaliya. ⁶ Vuno kayeni ku vinjui va kudhimbala va ku njivo ya Yisaleli; ⁷ keho ngue yeni muya, ambululeni na ku handeka ngueni, 'Na vumuene vua muilu vuli muhyehi.' ⁸ Kanguitheni vaka mavedhi, shituleni vaka kutca, toketheni vaka vikeka, na ku tuhula vaka vimpundhi vyaku vihya. Muna tambula ngocho, va haneni. ⁹ Keti mu kambate mavue avunchele, livue lya kutoka, ndi livue lya kuvuaha mu miva yeni. ¹⁰ Nambe mukompyo ua vungendhi vueni, ndi vikovelo vivali, ndi vinkuaku, ndi mulamu, muomu vaka kupanga navuayela vyakulya vyendi. ¹¹ Nkala limbo lyakama ndi limbo lyo muka kovela, nambe ku chikolo, na ku kala kuye noho muka tunda ko. ¹² Ngue momu ka kovela munjivo, li thambeleleni. ¹³ Nga vaka njivo yiye va vangulu, linga chivovo cheni chinje hali chikecho. Vuno nga ku ya vuahele, keho chivovo chi ka tenguluka kuli yeni. ¹⁴ Keho uoshe uye ka mitambula yeni ndi ku mitolilila ku majui eni, muye mu tuhuka kunjivo yiye ndi limbo lyakama, kukumuneni likungu ku myanja yeni. ¹⁵ Vungulu nji handeka kuli yeni, ku vihya kua limbo liye kuka tuvakana lya Sondoma na Ngomola mu matangua aku pangula limbo liye lyakama. ¹⁶ ''Taleni, nji na mitumu ngue vinjui vili mukati ka vinkuidhi, ngocho vene kaleni vaka mana ngue manoka na ku likehetha kua nkuti. ¹⁷ Litakametheni ku vantu! Muomu va ka mituala ku mbunga ya ku pangula, keho vaka mipupa yeni muvithinangonga vyeni. ¹⁸ Keho vaka mituala kumesho a nguvulu na muene muomu lyange, ngue mukaleho kuli vakevo na kuli vaka Vifuti. ¹⁹ Muye mu va ka mituala yeni, keti mukome vimbunge ndi vika muka handeka, muomu ha ntcimbu yiye vene vaka mihana viye vi mu kahandeka. ²⁰ Muomu keti yeni mukahandeka, vuno Mpundhi ya Yisho yeni uye aka handeka muli yeni. ²¹ Munayina aka tuala munayina ku kutca, na yishe na munendi. Vanike va ka katukila vithemi vavo na ku vatcihya. ²² Neni voshe vaka midhinda muomu lidhina lyange. Vuno muka kukoletha na ha ku manethela, ngechiye muntu akovoka. ²³ Muye vami yandetha kuimbo lyakama eli, teueleni ku limbo likuavo, muomu vungulu njihandeka kuli yeni, komu ka manetha membo oshe akama amu Yisaleli kumesho a Muna Muntu nenja. ²⁴ ''Ndonge keti aka tuvakane mulongethi uendi, ndi ndungo kuilu lya muene uendi. ²⁵ Ndonge na ka puitha mo nga aka kala hamo lika ngue mulongithi uendi, na ndungo ngue muene uendi. Nga vana mutumbula Mbelesembulu, ko va ka tuvakana vaka njivo yendi! ²⁶ Ngocho vene keti mu vovuile lyova, muomu ko kua kele chaku fuika ko chika fukuka, chikale chaku shueketha ko vaka chiyombolola. ²⁷ Evi vinji ka mileka mu muthithi, vihandekeni ha mutanya, keho nevi vi mu kovua mulituitui lyove, vya mbululeni haka nchongua ka njivo. ²⁸ Keti muvue lyova lya vaye vatcihya muvila vuno ko vatha kutcihya muono. Vuno, kaleni na lyova lya uye atha kutcihya muono na mivila yoshe mu ngehena. ²⁹ Ko ve ku landetha tudhila tuvali tua tundende na lumbongo lumo lika ndi? Vuno na umo uahi vavo aka uila hantci kuyeneka mangana a Yishe. ³⁰ Vuno nambe vinkambu vya mu mitue yeni va na vitanda vyoshe. ³¹ Keti ukale na lyova. Vuino vueni vuna tuvakana tudhila va vengi. ³² Ngocho vene nkala uoshe uye aka njitava kumesho a vantu, nange nji ka muitava lalo kumesho a Tata uye ua muilu. ³³ Vuno uye aka njivyana kumesho a vantu, nji ka muvyana lalo kumesho a Tata uye ua muilu. ³⁴ ''Keti uthinganyeke ngechiye njedhile kutuma chivovo hano hantci. Konjedhile kutuma chivovo, vuno mpoko ya utuethi. ³⁵ Muomu njedhile ku tepetha muntu na yishe, na muna mukentu na va yina, na vayina mueno na va nayemueno. ³⁶ Keho vaka njivo ya muntu vakevo va ka kala vaka chi dhindo chendi. ³⁷ Uye ayongola yishe na va yina ku nji tuvakana yange yikeye kanji yongele yange; uye ayongola mona ua lyala ndi ua mukentu kunji tuvakana yange yikeye ka nji yonguele yange. ³⁸ Uye ka kakula chiti chaku lindakana na ku nji shuama yikeye ka nji yongola yange. ³⁹ Uye auana muono uendi aka udhimbaletha. Vuno uye adhimbaletha muono uendi muomu yange aka u uana. ⁴⁰ ''Uye ami tambula yeni na nji tambula yange, na uye anjintambula yange na tambula lalo uye ua njituma yange. ⁴¹ Uye atambula kapolofeto mulidhina lya kapolofeto aka tambula fueto ya ka polofeto, keho uye atambula muntu muka vungulu aka tambula fueto ya muntu muka vungulu. ⁴² Nkala uoshe aka hana mulidhina lya ndonge nganja yamema atontola kuli umo ua va va vandende linga anue, mua vungulu nji handeka kuli yeni nguange, ka kadhimbaletha fueto yendi.''