¹ Keho chakele ngechiye muye Yesu na manethele kuishika vandonge vendi likumi na vavali, endi ua tundile ko kuye muku longetha na mu kuambulula ku membo avo akama. ² mualolo omo Youano uovuile mu kamenga vya vipanga vya Kilistu, ua tumine lijui kuli vandonge vendi ³ na ku handeka nguendi, ''Yove vene uye akenja, ndi tuka tatelela ueka?'' ⁴ Yesu ua kuanyene ko na ku handeka kuli vakevo nguendi, ''Kayeni muka mbulule kuli Youano vika muna mono na kuvua. ⁵ Tupuputua vamona, vilema vo venda, vaka vikeka vo vatoka, tuthinda matuitui vo vovuako lalo, vatci vashituka ku muono, na mudhimbu va uambuluila ku vihutu. ⁶ Ua vedhuka nkala uoshe uye ka uana choua cha ku mutambula muli yange. ⁷ Ngue muye vayile vamala ava mungila yavo, Yesu ua shangumukile ku handeka ku mbunga vya kuli Youano nguendi, ''Muna yile mulimbalanda lya kuholoka ku ka mona vika? lihongo lya kuli nenganga na mpundhi ndi? ⁸ Vuno vika mua yile kuka mona ko - muntu nadhala vya ku vuaha ndi? Taleni, voshe vaye vadhala vidhala vya ku votcika mu vinjivo ya vimuene. ⁹ Vuno vika muna yile na ku mona - kapolofeto ndi? Mukemuo, nji na handeka kuli yeni nguange, vingahi vya kutuvakana kapolofeto. ¹⁰ Ou yikeye uye yiva thonene nguavo, 'Taleni, nji ka mutumina kanganda kange kumesho achihanga cheni, uye aka vuayetha vingila vyeni kulutue lyeni.' ¹¹ Vungulu nji handeka kuli yeni ngechiye hakati ka vaye vana themuka ku vakentu, ko kua katukile na umo uahi ua kutuvakana Youano muka kumbuitika. Vuno muntu nakala ua mundende mu vumuene vua muilu ua kutuvakana yikeye. ¹² Ku matangua a Youano muka ku mbuitika na mualolo, na vumuene vua muilu na ku vu kovela na ndhili, keho vaka ndhili vali na ku vatumbula. ¹³ Muomu vapolofeto na majui a mashiko va mbuluila vupolofeto na ku matangua a Youano; ¹⁴ keho nga muna yongola ku chitava, Yikeye Eliya uye akenja. ¹⁵ Endi uye ali na matui akuvua, linga yikeye ovue. ¹⁶ Vuno mushovo ou nji ka upuitha na vika? Vana kala ngue vanike va na tumama ku vitanda vatambeka kuli vakuavo, ¹⁷ na ku handeka nguendi, 'Tuna thikile vimbendo muomu yeni, keho komua kinine. Tuna linyengele, keho ko mua lilile. ¹⁸ Muomu Youano uedhile keti mu kulya ndi mu kunua vinyu, va handekele nguavo, 'Yikeye ali na vimpundhi vya ku vihya.' ¹⁹ Na Muna Muntu nenja kulya na kunua vahandekele nguavo, 'Taleni, uatca mu kulya na mu kunua vya kupendetha, vuthamba ua vaka lithimu na vaka milonga!' Vuno mana athambua ku vipanga vyendi.'' ²⁰ Keho Yesu ua shangumukile ku handekela ku membo akama aye mukati kavo na pangele mo vikomoketho, muomu vakevo kova tengulukile. ²¹ ''Chikele kuli yeni, Kolazine! chikele kuli yeni, Mbetesayinda! Nga va na vipangele mu Tile na Sindone vikomoketho evi vyakama vi va napangele muli yeni, nga vana litenguluithile laya na ku dhala vikeleya na ku tumama mu lito. ²² Vuno, nji mileka nguange, ha litangua lya kupangula milonga, muka mona ku vihya kua kama kua ku tuvakana kuye kua Tile na Sindone. ²³ Nove Kapenama mpano vaka kushangala na muilu ndi? Kuahi, uka shuluka ku vukalo vua ku vatci. Muomu nga vikomoketho vya kama viye va na vipangele muli yove, nga va na vipangele mu Sondoma nga lina kalaho na ku litangua lya lelo. ²⁴ Vuno nji handeka kuli yeni nguange ha litangua lya kupangula milonga uka mona kuvihya kua kama kua kutuvakana kuye kua chifuti cha Sandoma.'' ²⁵ Ha ntcimbu yiye Yesu ua handekele nguendi, ''Njina ku shangala, Tata, Muene ua muilu na hantci, muomu mu vyuma evi ua vi shuekethele ku vaka mana na ku vaka mana, keho una viyomboluela ku vanike va vandende. ²⁶ Mukemuo, Tata, muomu vina vuaha ngechiye ku mesho ove. ²⁷ Vyuma vyoshe Tata na vi kundika kulyange; na umo uahi adhivuka Mona kuvanga Yishe, na umo uahi adhivuka Yishe kuvanga Mona nkala uoshe uye yana shovola Mona mu ku muyombolola yikeye. ²⁸ Yinjeni kuli yange, eni voshe vaye muli na ku fuitangana na ku hona, ange nji ka mihuimitha. ²⁹ Tambuleni njoko yange kuli yeni, keho lilongetheni kuli yange, muomu njina lithingimika na ku likehetha mu mbunge, keho uka uana ku huima kua muono uove. ³⁰ Muomu njoko yange ya yathi na vutengi vuange vua vuehu.''