¹ Hantcimbu yiye Yesu ua hitile ku mehya ha litangua lya thapalalo. Keho vandonge vendi vakele nanjala keho vashangumukile kuhela vimbuto keho valile. ² Vuno muye va Faliseo vamuene ngechiye, va handekele kuli Yesu nguavo, ''Taleni, vandonge vove viva li na kupanga evi kavi tava kupanga ha litangua lya Thapalalo.'' ³ Vuno Yesu ua handekele kuli vakevo nguendi, ''Ko mua tandele chiye cha pangele Ndaviti muye mua kele na njala, na vamala vaye vakele hamo lika nendi? ⁴ Ngue omo ua kovelele mu njivo ya Kalunga ua lile mbolo yiye va hakele kulutue, yiye ko ya mu vuayelele ku yilya yikeye nambe vaye vakele hamo lika nendi, kuvanga va sasendote lika. ⁵ Nambe komua tandele ku majui alishiko ngechiye va sasendote ve ku dhilula thapalalo mu tembele vuno ku vaka milonga ndi? ⁶ Vuno nji handeka kuli yeni ngechiye umo ua kutuvakana tembele ali kuno. ⁷ Nga muna dhivukile mana a majui ano, 'Njili na chidhango cha ngodhi keho keti chachikombeleyo,' Nga ko mua hithile vaka milonga. ⁸ Muomu Muna Muntu yikeye thapalalo.'' ⁹ Keho Yesu ua tundile kuye, ua kovelele mu thinangonga yavo. ¹⁰ Taleni, kuye kua kele muntu umo na livoko lya kuthekua. Va Faliseo ve huile Yesu, na kuhandeka nguavo, ''Vuino ku kanguitha mu litangua lya thapalalo ndi?'' Ngechiye linga vamu vangeye milonga. ¹¹ Yesu ua handekele kuli vakevo nguendi, ''Muntu yiya hakati keni ali na yinjui yendi yimo lika, keho nga yinjui auila muchina ha litangua lya thapalalo, ko ukatha ku mu kuata na ku mutunditha mo ndi? ¹² Keti kuvuaha kua muntu kutuvakana kua yinjui ndi! Ngocho vene vuino ku kapanga vya vingulu ha litangua lya thapalalo.'' ¹³ Keho Yesu ua handekele kuli muntu uye nguendi, ''Olola livoko lyove, keho ua lyoluele lya kangukile ngue livoko likuavo. ¹⁴ Vuno va Faliseo va tuhukilemo vayonguele hakati kavo vati vatha ku mukuata yikeye. ¹⁵ Yesu, mu ku vidhivuka evi, ua tundileko kuye. Vantu vavengi va mu shuamene yikeye, keho endi ua va kangukithile vakevo voshe. ¹⁶ Ua veshikile vakevo keti va mu tcimanethe. ¹⁷ Linga chikale ngechiye chiye chiva handekele kuli kapolofeto Yisaya, ua handekele nguendi, ¹⁸ ''Taleni, ndungo yange uye nji na shovola; umo muka chidhango change, yikeye ua njiya ku mbunge yange. Nji kahaka Mpundhi yange hali yikeye, keho aka langulula chihitho kuli vaka Vifuti. ¹⁹ Yikeye ka kandungula ndi ku tambeka kuakama; nambe umo uahi akovua lijui lyendi mu vingila. ²⁰ Lihongo lya ku thanyuoka ka ka lipokola; na vuanda vua ku tcima vuntca ka ka dhimi ku vanga na tumu chihitho kuli vaka kuvula, ²¹ keho mu lidhina lyendi va ka kala na lutcelelo.'' ²² Keho Yesu vamutualelele umo muka kapuputua na chipulupulu, uye uakele na vimpundhi vya kuvihya. Ua mu kangukithile yikeye, ngechiye chipulupulu ua handekele na ku mona. ²³ Keho vimbunga vyoshe vya komokele na ku handeka nguavo, ''Lyala ou kuatha akale Muna Ndaviti ndi?'' ²⁴ Vuno muye va Faliseo vovuile vikomoketho evi, va handekele nguavo, ''Lyala ou katunditha vimpundhi vya ku vihya kuvanga na ndhili ya Mbelezembulu, muene ua vimpundhi vya kuvihya.'' ²⁵ Vuno Yesu ua dhivukile vithinganyeka vyavo keho ua handekele kuli vakevo nguendi, ''Vumuene vuoshe vua ku litepa vukatca, keho namembo oshe akama ndi njivo yika litepa vavenya keti kuimana. ²⁶ Nga Satana atunditha Satana, na lihangununa yendi vavenya. Vumuene vuendi vukemana vati cho? ²⁷ Keho nga nji tunditha vimpundhi vya kuvihya kuli Mbelezembulu, kuli yiya hani vana veni aka va tunditha cho? Muomu vakevo vakakala vaka kupangula. ²⁸ Vuno nga nji tunditha vimpundhi vya ku vihya na Mpundhi ya Kalunga, keho na vumuene vua Kalunga unenja hali yeni. ²⁹ Vati umo atha ku kovela munjivo yamu ka ndhili na ku tambula mo vufuko vuendi, ha ku livanga akuta mu ka ndhili? Keho aka puanja vufuko vua munjivo yendi. ³⁰ Na uye ka li vandakana nange yikeye muka chidhindo change, na uye umo keku likungiya hamo lika nange na shanduoka. ³¹ Ngocho vene nji handeka kuli yeni nguange, nkala mulonga na ka shaundu koshe va ka vechela ku vantu na Mpundhi koyika muechela. ³² Uye uoshe akahandeka lijui limo lya ku shaula Muna Muntu, ngechiye yikeye vaka muechela . Vuno uye uoshe aka shaula Mpundhi Yakuyela, ngechiye yikeye ko vaka muechela, nambe mu chifuti chino, ndi muntcimbu yiye yikenja ko. ³³ Pangeni chiti cha chili na vushuka ua chili, ndi pangeni chiti cha ku vihya na vushuka ua ku vihya, muomu chiti uchimuena ku vushuka uacho. ³⁴ Eni vana va mambuambua, muatha ku handeka vyuma vya chili vati? Muomu kanua kendi ke ku handeka viye vina shulu kumbunge. ³⁵ Na muntu ua chili ku vufuko vuendi vua chili ue kutuhula vya chili, keho na muntu ua ku vihya ku vufuko vuendi ua ku vihya ua mu mbunge yendi ue kutuhula vya ku vihya. ³⁶ Nji handeka kuli yeni ngechiye nguange, majui oshe a ngocho vantu va ka handeka va ka va pangula ha litangua lya ku kuhandeka. ³⁷ Muomu ku majui ove uka thambua, na ku majui ove uka uana mulonga.'' ³⁸ Keho vamo vaka kuthona na va Faliseo vakuanyene Yesu na ku handeka nguavo, ''Mulongithi, tuthetela ku mona chidhivukitho kuli yove.'' ³⁹ Vuno Yesu ua vakuanyene na ku handeka navo nguendi, ''Mushovo ua kuvihya na vukuidhi uthetela chileketho. Vuno chidhivukitho na chimo cha hi va ka kuhana cho kuvanga chidhivukitho cha Yona ka polofeto. ⁴⁰ Muomu ngue Yona ua kele matangua atatu na matciki atatu mu lidhimo lya yintci ua kama, ngocho vene Muna Muntu aka kala matangua atatu na matciki atatu mu mbunge hakati ka hantci. ⁴¹ Na vamala va ku Niniveyi vaka katuka ha litangua lya kupangula hamo lika na mushovo ou, keho vaka uuana mulonga. Muomu vatengulukile vimbunge vyavo ha kuambulula kua Yona, keho taleni, umo ua kutuvakana Yona ali kuno. ⁴² Muene uye ua mukentu ua mu vuihi ua chimoshue ua chifuti aka katuka ha litangua lya kupangula milonga hamo lika na vamala va mushovo ou. Muomu yikeye ua tundilile kuye kua lenga mavu mu kuvua mana a Solomone, keho taleni, umo ua ku tuvakana Solomone ali kuno. ⁴³ Muye vimpundhi vya ku juala yitunda ku muntu, yi hita ku muhela kuye ko kua kele mema na ku thetela ku huima, vuno ko cha uanene ko. ⁴⁴ Keho chika handeka nguacho, 'Nji ka hiluka ku njivo yange kuye ku njina tundile.' Mu ku hiluka, cha ku uana njivo ya ngocho - va na kombo mo muna toko na ku vuayetha mo. ⁴⁵ Keho chiya na kuneha vimpundhi vikuavo vitanu na vivali vya kuvihya kutuvakana vavenya, keho voshe vakenja ku kala muye. Keho ku vihya kua kumanethela kua muntu uye kutuvakana ua kulivanga. Ngocho vene chika kala lalo na mushovo uno ua ku vihya.'' ⁴⁶ Muye Yesu ua kele na ku handeka na mbunga yiye, taleni, vayina vendi na va munayina vendi vemanene hanja, va yonguele ku handeka na yikeye. ⁴⁷ Umo ueka ua handekele nendi nguendi, ''Tala, vanoko na vamunanoko va vamala vanemana hanja, va yongola ku handeka nove.'' ⁴⁸ Vuno Yesu ua kuanyene ko na ku handeka kuli yikeye uye ua mulekele yikeye nguendi, ''Yiya vanana na veya vamuna nana va vamala cho?'' ⁴⁹ Keho uoluele livoko lyendi kuinika vandonge na ku handeka nguendi, ''Tala, vanana na vamuna nana va vamala! ⁵⁰ Muomu uye uoshe apanga chidhango cha Tata uye ua muilu, ngechiye muntu yikeye muna nana ua lyala na muna nana ua mukentu.''