¹ Ha litangua liye Yesu ua tuhukile mu njivo na ku tumama keho ua tumamene kumukulo ua Kalunga ndonga. ² Mbunga yakama ya mudhengelekele yikeye, ngocho endi ua kovelele mu vuato keho ua tumamene ntcimbu mbunga yoshe yemanene kuntunda ya Kalunga ndonga. ³ Keho Yesu ua handekele vyuma vya vingi kuli vakevo mu vithimo. Ua handekele nguendi, ''Taleni, muka kuva ua tuhukile mu ku kuva mbuto. ⁴ Ngue ua kuvile, Mbuto yimo ya uililile ku shongo ya ngila, na tudhila vedhile na kuyilya. ⁵ Mbuto yikuavo ya uililile ha mavue, haye kuvya kele nalivu lya lingi. Keho vya shokele vuathi muomu livu ko lya lovele ko. ⁶ Vuno muye litangua lya tumbukile, vya uemene muomu ko vya kele na midhi, keho vyomine. ⁷ Mbuto yikuavo ya uililile hakati ka vimbimbo. Keho vimbimbo vya kulile hamo lika na ku yitcihya. ⁸ Mbuto yikuavo ya uililile ha livu lya chili, keho vye mine, yimo chihita, yimo makumi atanu na limo, keho yimo makumi atatu. ⁹ Uye ali na matui, linga ovueko.'' ¹⁰ Na vandonge vedhile na ku handeka kuli Yesu nguavo, ''Vika uli na ku handeka navo mu vithimo?'' ¹¹ Yesu ua vakuanyene na ku handeka kuli vakevo nguendi, ''Vana hana kuli yeni kudhivuka mahungu a vumuene vua muilu, vuno kuli vakevo ko va va hanene. ¹² Muomu uye uoshe ali navyo va ka muhana vyeka, keho aka kala na vya vingi. Vuno uye uoshe ka kele navyo, nambe evi vya li navyo vaka munyanga vyo yikeye. ¹³ Evi vikevyo nje ku handekela navo mu vithimo: Muomu mu ku tala, ku ve kumona, keho muomu mu kuvua keti vovue ko, ndi kudhivukitha. ¹⁴ Ku li vakevo kapolofeto Yisaya yikeye na puithamo, ngechiye ahandeka nguendi, ''Kutolilila, mu kovua, vuno komu kovu ko; Na kutala, muka tala, vuno ko muka vidhivuka. ¹⁵ Muomu na mbunge ya vantu ava yina kolo, matui avo ana thindi, na mesho avo vana lalameka . Kuteua va mona na mesho ngano, na kuvua na matui avo, na ku dhivukitha kumo lika na vimbunge vyavo na ku tenguluka lalo, keho nji ka va kanguitha vakevo.'' ¹⁶ Vuno mesho eni ana vedhuka, muomu ali na kumona; na matui, muomu ali na kuvua ko. ¹⁷ Vungulu nji handeka neni ngechiye nguange vapolofeto vavengi na vamala va ka vungulu va yonguele kumona vyuma viye vi muli na ku mona keho ko va vimuene vakevo. Va yonguele kuvua vyuma viye muli na kuvua keho ko va vyuvuile vakevo. ¹⁸ Ngocho vene tolilileni chithimo chiye cha muka kuva mbuto yendi. ¹⁹ Muye umo uye ovua majui avumuene vuno kavyuvuile, na umo muka kuvihya enja na ku vinyanga viye vi va ku vile mu mbunge yendi. Eyi yikeyo mbuto yiye yuvakuvile ku mukulo ua ngila. ²⁰ Yiva kuvile ha mavue yikeye muntu uye ovua lijui keho vuathi vuathi na tambula na ku yolela, ²¹ Vuno kakele na midhi muli yikeye vavenya keho aka kala ho kantcimbu. Muye lamba ndi kayando vikenja muomu lya lijui, endi aka tanguka. ²² Na yiye vakuvile hakati ka vimbimbo, yikeye muntu uye ovua lijui, vuno kuyongola vyuma vya hano hantci na ku kokoya cha vufuko vi tcihya lijui, keho ka kemi vushuka. ²³ Na mbuto yiye va kuvile ha livu lya chili, yikeye muntu uye ovua lijui na ku tolilila. Ema vushuka na ku hana mbuto, mu nchako yimo vihita, mu yikuavo makumi atanu nalimo, keho mu yikuavo vintcimbu makumi atatu ngue muye muva vi kuvile.'' ²⁴ Yesu ua va telelele chithimo chikuavo vakevo. Endi ua handekele nguendi, ''Na vumuene vua muilu vuna kala ngue muntu uye akuva mbuto ya chili mulihya lyendi. ²⁵ Vuno ntcimbu vantu vana kothele, muka chitodhi chendi uedhile ua kuvile muila hakati ka tiliku keho ua yile. ²⁶ Vuno muye mbuto ya thokele yemine, muila ua shokele lalo. ²⁷ Na vandungo va lyavenya njivo vedhile na ku handeka kuli yikeye nguendi, 'Muene, ko ua kuvile mbuto ya chili ku lihya lyove ndi? Vati muka kala muila lalo? ²⁸ Ua handekele kuli vakevo nguendi, 'Muka chidhindo na vipanga evi.' ''Na vandungo vahandekele kuli yikeye nguavo, 'Ngocho uyongola yetu linga tuye na ku vitukula mo ndi?' ²⁹ ''Na lyavenya lihya ua handekele nguendi, 'Kuahi. Muomu ntcimbu yimuli na ku tukula muila, kuatha muka tukule hamolika na mbuto. ³⁰ Vyetheleni vikule vyoshe hamo lika noho ha kutya mbuto. Ha ntcimbu ya kutya nji ka handeka na va ka kutya nguange, ''Ha kulivanga tukule nimo muila na ku ukuta linga muka utcimike ukeuo, vuno kunguiyeni mbuto mu chishete change.''''' ³¹ Keho Yesu ua va lekethele chithimo chikuavo kuli vakevo. Yikeye ua handekele nguendi, ''Na vumuene vua muilu una kala ngue kambuto kamuthalata muntu vua ka nonene na ku ka kuva mu lihya lyendi. ³² Ka keko ka ka ndende muakama ku vimbuto vyoshe. Vuno muye yina kulu, yakama kutuvakana vishoni vyoshe vya mu lihya. China kala chiti vene, ngechiye tudhila va muilu vedhile na ku tunga ko mashua avo ku mintango ya chiti.'' ³³ Keho Yesu ua va telelele chithimo chikuavo nguendi. ''Na vumuene vua muilu vuna kala ngue chimbaluuila cha tiliku mukentu ua tambuile keho ua chishuekele mu vi njongo vitatu vya vunga noho vya futumukile .'' ³⁴ Vyuma vyoshe Yesu ua vi handekele mu vithimo; keho na chimo chahi cha handekele navo kuvanga vithimo. ³⁵ Linga chikale ngechiye cho va handekele hali kapolofeto linga vika pue mo, muye mua handekele nguendi, ''Njika shama kanua kange mu vithimo. Njika handeka vyuma viye viva shuekethele ku kushangumuka kua chifuti.'' ³⁶ Keho Yesu ua thile mbunga yiye na kuya munjivo. Vandonge vendi vedhile kuli yikeye na ku handeka nguavo, ''Tu langunuine chithimo cha muila lya mu lihya.'' ³⁷ Yesu ua vakuanyene na ku handeka nguendi, ''Uye ua kuvile mbuto ya chili yikeye Muna Kalunga. ³⁸ Na lihya likelyo hano hantci; keho na mbuto ya chili, ava vakevo vana va vumuene. Na muila vakevo vana va muka kuvihya, ³⁹ keho na chitodhi uye ua va kuvile yikeye Satana. Keho litangua lya ku tya likelyo litangua lya ku manethela kua chifuti, keho vaka kutya vakevo tungelu. ⁴⁰ Ngocho vene, ngue omo vana kunguiya muila na ku utcimika ku tuhya, ngocho vene vaka panga haku manethela kua myaka. ⁴¹ Na Muna Muntu aka tuma tungelu tuendi, keho vaka vakunguiya mu vumuene vuendi vyuma vyoshe vya ku shevuitha na vaye vapanga milonga. ⁴² Keho vaka vombila mu lutengo lua tuhya, kuye kukala kulila na ku lishumanga kumadho. ⁴³ Keho vantu vaka vungulu vaka tangeka ngue litangua mu vumuene vua Yishe yavo. Uye ali na matui, linga yikeye ovueko. ⁴⁴ ''Na vumuene vua muilu uli ngue vufuko vua ku shitika mu lihya. Muntu aka u uana keho endi aka ushueka. Na ku yolela endi akaya, na ku landetha vyoshe vya fukile, na ku landa lihya liye. ⁴⁵ Lalo, vumuene vua muilu ngue muntu uye muka kuthetela nganyo ya chili. ⁴⁶ Muye ua uanene umo uye ua vinganyo vya chili, ua yile na ku landetha vyoshe viye vya fukile na ku lilanda. ⁴⁷ "Lalo, na vumuene vua muilu una kala ngue vuanda vuye vu va nate mu Kalunga ndonga, ngechiye ku kunguiya vantci voshe. ⁴⁸ Muye mu va shulithile, vaka kukuata vantci vakokele vuato kuntunda. Keho va tumamene hantci na ku kushovola vya chili mu vitenga, vuno vya ku vihya va vyumbilile. ⁴⁹ Ngechiye chika kala ku tcimbu ya ku manethela. Na tungelu va ka tuhuka, vaka shovola vaka ku vihya ku vaka ku vungulu. ⁵⁰ Va ka vombila mu lutengo lua tuhya, muye vaka kala na kulila na ku lishumanga ku madho. ⁵¹ ''Mu na tolilila vyuma vyoshe evi ndi?'' Vandonge va handekele kuli yikeye nguavo, ''Mukemuo.'' ⁵² Keho Yesu ua handekele kuli vakevo nguendi, ''Ngocho vene uoshe muka kuthona uye na lipuitha ndonge ku vumuene vua muilu ngue lyala uye vavenya njivo, uye ue kutuhula ku vufuko vuendi vyuma vya viha nevi vya laya.'' ⁵³ Keho Yesu ua manethele vithimo evi ua tundile ko. ⁵⁴ Keho Yesu ua hetele kuimbo lyendi, ua va longethele mu vi thinangonga vyavo. Ngocho vene vakomokele na ku handeka, ''Kuiko kuana uana muntu ou mana na vikomoketho evi na ndhili kuiko? ⁵⁵ Ou keti muna nkulungu ndi? Keti vayina vendi Maliya ndi? Na vamunayina keti va Tiango, Yosefe, Simone, na Yunda ndi? ⁵⁶ Vamunayina va vakentu keti vali hamo lika netu ndi? Kuiko kua na uana vyuma vyoshe evi? ⁵⁷ Keho va dhivalele vimbunge omo yikeye. Vuno Yesu ua handekele kuli vakevo nguendi, ''Kapolofeto ko vaka muthingimika kuvanga mu chifuti chendi na va vushoko vuendi vavenya.'' ⁵⁸ Keho muomu vimpata vyavo ka pangele ko vi komoketho vya vingi.